Milli qəhrəmanlar daim ürəklərdə yaşayacaq

YAP Yasamal rayon təşkilatında 1995-ci ilin 13-17 mart hadisələrində şəhid olan milli qəhrəmanların anım tədbiri keçirildi

Dünən YAP Yasamal rayon təşkilatının qərargahında Milli Qəhrəmanlar İnformasiya Mərkəzinin sədri və "Milli Qəhrəman" qəzetinin baş redaktoru Mirbəşir Seyidzadənin təşkilatçılığı ilə Azərbaycanın şəhid milli qəhrəmanların - Xasiyev Samir Zirəddin oğlu və Xəlilov Eldar Xəlil oğlunun anım gününə həsr olunmuş tədbir keçirildi. Tədbirdə dövlət və hökumət nümayəndələri, elm və ictimaiyyət xadimləri, gənc fəallar və KİV təmsilçiləri, eyni zamanda milli qəhrəmanların ailələri iştirak edib.

Tədbiri giriş sözü ilə açan YAP Yasamal rayon təşkilatının sədri Fikrət İsmayılov qeyd etdi ki, hazırda anım günü olmasına baxmayaraq, eyni zamanda, Azərbaycan xalqı əziz bayram ərəfəsini yaşamaqdadır. Lakin Azərbaycan xalqının bu gün firavan yaşaması üçün canlarından keçən igidlərimiz var:"Bizim xalqımız çox müsibətlər çəkib. Azərbaycanda Səfəvilər dövləti süquta uğradıqdan sonra xalqımız 400 il fars, 300 il rus əsarətində yaşamışdır. Ancaq qeyrətli oğul və qızlarımız daim müstəqillik və azadlıq uğrunda canlarından keçməyə hazır olublar. Çünki bizim xalqımızda üç dəyərli məfhum ən çox önəm kəsb edən amillərdəndir. Onlardan biri ana, biri vətən, biri də millətdir. Bugünkü tədbirimizdəki məqsədimiz də indiki gənclərə bu cür qəhrəmanlıqları aşılamaqdan ibarətdir. Adları çəkilən hər iki övladımız vətənin müstəqilliyi uğrunda canlarından keçiblər. Onların valideynləri isə əsla bundan qəhərlənməməlidirlər. Əksinə, qürur duymalıdılar. Çünki ən yüksək şərəf şəhidlik zirvəsidir və Samirlə Eldar bu zirvəni fəth ediblər".

Fikrət İsmayılov onun da vurğuladı ki, məhz Ulu Öndərimizin qətiyyətli və iradəli siyasəti, müdriklik addımları sayəsində xalqımız öz müstəqilliyini qoruyub-saxlamağa müvəffəq oldu. Bu yolda şəhid olan hər iki övladımıza, Samir Xasıyevə və Eldar Xəlilovu milli qəhrəman adı ilə təltif etdi.

Sonra tədbirin təşkilatçısı, YAP Yasamal rayon ilk partiya təşkilatının sədri Mirbəşir Seyidzadə çıxış etdi. O da öz çıxışında şəhidlərimizə Allahdan rəhmət dilədi: "Əgər bu şəhidlərimiz yaşasaydılar, əminliklə deyə bilərəm ki, onlar Azərbaycana daha çox xeyir verə, ölkəmizin inkişafı naminə bütün zəhmətlərə qatlaşa biləcək qürurlu vətəndaş ola bilərdilər.Onların valideynləri öz övladları ilə qürur və şərəf hissi keçirməlidirlər. Mən inanıram ki, Azərbaycanda minlərlə belə oğul və qızlarımız var və onlar da vətən uğrunda hər an canlarından keçməyə hazırdırlar".

Sonra YAP Yasamal rayon təşkilatının idarə heyətinin sədri, Biznes Universitetinin rektoru İbad Abbasov da, xüsusilə, vurğuladı ki, Azərbaycanın 22 min şəhidi var və onların hər biri insanların ürəklərində əziz xatirə kimi yad edilirlər: "Onlardan ikisinin bugünkü anım tədbiri, eyni zamanda, bütün şəhidlərimzin anımı kimi qəbul edilə bilər. Onların valideynləri ən ali hörmətə layiq olan insanlardırlar. Allah bütün şəhidlərimizə rəhmət eləsin". Daha sonra Ədliyyə Nazirliyində Ədliyyə Akademiyasının rəhbəri İlham Abbasov və digərləri də öz çıxışlarında Samir və Eldar kimi qəhrəmanların unudulmayacağını bildirdilər. Tədbirin sonunda Mirbəşir Seyidzadə Azərbaycanın milli qəhrəmanları Xasıyev Samir Zirəddin oğlunun və Xəlilov Eldar Xəlil oğlunun valideynlərinə onların şəkilləri həkk olunmuş portretlərini təqdim etdi.

RÖVŞƏN RƏSULOV

Səs.- 2011.- 18 mart.- S. 9.