Azərbaycanda insan hüquq və azadlıqlarının müdafiəsi
tam təmin olunub
Rəbiyyət Aslanova: "Yaradıcısı və
memarı Ulu Öndər Heydər Əliyev olan Azərbaycan
dövlətinin bayrağı daima yüksəklərdə
dalğalanacaq"
Azərbaycanda insan
hüquq və azadlıqlarının müdafiəsi ilə bağlı dövlət hər
zaman öz üzərinə düşən bütün məsələləri
həll edir. Azərbaycan Respublikasının
Konstitusiyasında vətəndaşların hüquq və
azadlıqları dövlətimizin ən ali məqsədi
sayılır. Bu isə, o deməkdir ki, Azərbaycanın
milli qanunvericiliyində qanuna edilən hər bir əlavə və
dəyişikliklərin əsas məğzi, qayəsi Azərbaycan
insanının bütün mənalarda hüquqlarının
tam təmin olunmasıdır. Təsadüfi deyil ki, Azərbaycan
dünyada qəbul edilmiş ən mühüm, vacib konvensiyalara qoşulmaqla
özünün bu sahədə nə qədər maraqlı
olduğunu və beynəlxalq qurumlar qarşısında
öhdəliyinin yerinə yetirildiyini bir daha təsdiq edir. Azərbaycanda insan hüquq və
azadlıqlarının müdafiə olunması ilə
bağlı Milli Məclisin İnsan Hüquqları Komitəsinin
sədri Rəbiyyət Aslanova qəzetimizə öz
münasibətini bildirdi:
"Elə dövlətlər
var ki, onlar insan hüquq və azadlıqlarının
qorunması sahəsində mühüm konvensiyalara imza
atmır. Azərbaycan dövləti isə, bütün
dünyada bəyan edir ki, "mənim böyük məqsədim
vətəndaşların
hüquqlarının qorunması, onların istək və
arzularının gerçəkləşməsidir. Bu sahədə
də çox mühüm sənədlər
qəbul edilib və bütün təbəqələrin
hüquqlarının qorunması sahəsində ciddi
addımlar atılıb" deyə millət vəkili R.Aslanova
qeyd etdi.
Millət vəkili əlavə
etdi ki, bu gün hansısa bir bölgədə ən
kiçik qanun pozuntusu olarsa belə, dərhal dövlət tərəfindən
ciddi tədbirlər görülür və qarşısı
alınır: " Azərbaycan bir sosial dövlət kimi
formalaşır. Sosial dövlətin isə əsas prioritet məqsədi
insanların sosial, iqtisadi, siyasi, mədəni durumunun təmin
olunmasıdır. Bu gün hansısa beynəlxalq qurumlar, qərəzli
QHT-lər dövlətimizin ünvanına obyektivlikdən uzaq
olan fikirlər səsləndirirsə, bunlar birmənalı
sifarişli ifadələrdir. Azərbaycan artıq milli və
lokal etirafdan beynəlxalq etirafa yüksəlmiş bir dövlətdir".
Millət vəkili
vurğuladı ki, dünyada müqayisələr aparmaq
imkanı olan hər bir şəxs Azərbaycan dövlətinin
20 il ərzində əldə etdiyi uğur və nailiyyətləri
dana bilməz: "Bu il Azərbaycan dövləti öz
müstəqilliyinin 20 ilini qeyd edəcək. Dövlətimiz
bu 20 il ərzində müxtəlif tarixi mərhəlləri
həm əziyyətlə, həm də çox uğurla
keçib. Keçid dövrünü qətiyyətlə dəf
edərək modernləşmə, müasirləşmə xəttini
seçən Azərbaycan dünyada ən nüfuzlu dövlətlər
sırasındadır. Hər bir azərbaycanlı fəxr etməlidir
ki, bu gün onun Azərbaycan adlı böyük,
güclü, söz sahibi olan dövləti var. Azərbaycanın
20 il ərzində qazandığı bütün
uğurları, nailiyyətləri danmaq dövlətimizə
qarşı ən böyük haqsızlıq olardı".
Millət vəkili dünyanı iqtisadi böhranın
bürüdüyü halda, bunun qətiyyən Azərbaycana təsir
etmədiyini də bildirdi.
Onun sözlərinə
görə, buna səbəb əvvəlcədən müəyyən
edilmiş önləyici tədbirlərin görülməsi
idi. Bununla əlaqədar olaraq, çox ciddi addımlar
atılmışdı.
R.Aslanov dövlətimizin
iqtisadi tərəqqi yolunda çox mühüm uğurlara
imza atıdığını da qeyd etdi və
vurğuladı ki, bu gün Azərbaycan özünün ən
dinamik, sürətli inkişaf tempini yaşayır.
"Azərbaycanın dünya xəritəsində yerinin və rolunun möhkəmlənməsindən xarici qüvvələrlə yanaşı, daxildə də bəzi hüquq müdafiəçilərini narahat edir. Daxildəki qüvvələrin narahatçılığı nədən qaynaqlanır" sualına cavab olaraq, R.Aslanova bildirdi ki, cəmiyyətdə dövlətini sevməyən insanlar həmişə olub:"Ona görə də, Azərbaycan cəmiyyətində belə insanların olmasını çox adi hal kimi qəbul etmək lazımdır. Dövlətinə, xalqına və millətinə qarşı çıxan qara niyyətli insanlar şərin xidmətçiləridir. O tip insanlar milli heysiyyət hissindən məhrumdurlar. Onlar əslində dövlətimizin, dövlət başçımızın dünyada qazandığı o böyük nüfuzuna, hörmətinə sevinməlidirlər, amma sevinmirlər. Çünki onlar pulu, şəxsi ambisiyalarını və nökərləri olduğu xarici qüvvələri sevirlər. Bu gün dövlətimizlə mübarizə aparan bəzi şər qüvvələr zaman-zaman öz səhvlərini daha aydın şəkildə anlayacaqlar. Azərbaycan dövləti böyük, qüdrətli və əzəmətlidir. Bunu, birmənalı olaraq, hər kəs qəbul etməlidir. 20 il ərzində böyük çabalarla qazandığımız nüfuzumuza, uğurumuza kimlərinsə arzu və istəyi ilə qətiyən kölgə sala bilmərik. Yaradıcı və memarı Ümummilli Lider Heydər Əliyev olan Azərbaycan dövlətinin bayrağı daima yüksəklərdə dalğalanacaq".
AYLANA RZAYEVA
Səs.- 2011.- 18 mart.- S. 10.