YAP Gənclər Birliyi Novruz bayramı münasibəti ilə xeyriyyəçilik aksiyası keçirdi

Bu aksiyada Nərimanov rayon ərazisində yaşayan 60-a yaxın imkansız ailələrə bayram sovqatları paylanıldı

Dünən YAP Gənclər Birliyinin təşkilatçılığı ilə Novruz bayramı münasibəti ilə Bakı və paytaxtətrafı rayonlarda yaşayan 60-a yaxın aztəminatlı ailələrə bayram sovqatları paylanıldı.

YAP Gənclər Birliyinin sədri Seymur Orucov jurnalistlərə müsahibəsində bildirdi ki, Azərbaycan dövləti hər zaman sosial layihələri daha öndə tutub və biz də Yeni Azərbaycan Partiyası Gənclər Birliyi aparılan siyasətə dəstək olaraq sosial yönümlü fəaliyyətimizi daha geniş şəkildə davam etdiririk: "Əsas məqsədimiz aparıcı partiya olaraq insanlara diqqət və qayğı ilə yanaşmaqdır. Keçirdiyimiz bu aksiya Bakının bütün rayonlarını əhatə edəcək. Kimin ən çox ehtiyacı varsa, onlara kömək etməyi nəzərdə tutmuşuq. Azərbaycan dövləti hər zaman kimsəsiz, aztəminatlı ailələrə qayğı ilə yanaşır. Biz də hakim partiyanın gəncləri olaraq buna dəstək üçün bayram tədbirini həyata keçiririk. Bu, bizim ənənəvi xarakter alan tədbirlərimizdəndir. Növbəti ildən isə bayram ərəfəsində belə tədbirlərin bölgələrdə də təşkil etməyi və orada yaşayan aztəminatlı ailələri də sevindirməyi nəzərdə tuturuq".

Bayram sovqatı ilk olaraq YAP-ın Mərkəzi Qərargahında Binəqədi rayonundan olan kimsəsiz ailələrə təqdim edildi. Daha sonra isə Bakının digər rayonları üzrə ailələrə sovqatlar qrup halında təyin edilmiş şəkildə paylanılmağa başlanıldı.

YAP Gənclər Birliyi tərəfindən həyata keçirilən aksiyada Nərimanov rayon ərazisində yaşayan kimsəsiz, tənha sakinlərə bayram sovqatları YAP-ın Nərimanov rayon təşkilatının sədri və üzvləri, eləcə də, KİV nümayəndələrinin iştirakı ilə paylanıldı. Sovqatlar Əhalinin Sosial Müdafiə Mərkəzi sosial məişət sektoru tərəfindən qeydiyyata alınan kimsəsizlərə təqdim olundu.

Nərimanov rayonunun 6 sakininə - Ofeliya Hacıyevaya, Əhəd Məhərrəmova, Ənvər Məmmədova, Suğra Rzayevaya, İsrafil Şabanova, Məmməd Ələkbərova təqdim olunan sovqatlar onların ikiqat bayram sevinci yaşamasına səbəb oldu. Gənclərin belə bir xeyriyyəçilik missiyası ilə çıxış etmələri Azərbaycan gəncliyinin yüksək dəyərləri özlərində yaşatmaları ilə ifadə etdilər. Hər bir sakinin qəlbi bu sevincli günü onlara bəxş etdiklərindən, fərəhli idi.

O.Hacıyeva bu bayram günündə kimsəsiz qadın olaraq sovqatla qapısını döyülməsindən nə qədər sevincli anlar yaşadığını bildirdi. 40 il L.Şmit adına Maşınqyıma zavodunda çalışan xanım uzun illər ictimai fəaliyyətdə olmuşdur. Belə ki, o, vaxtilə Nərimanov rayon qadınlar şurasının sədri, Respublika qadınlar şurasının üzvü olmuş, sədaqətlə vətənə xidmət göstərmişdir. O, yaşının bu vaxtında anılaraq ona qayğı ilə yanaşılmasını həyatının ən xoş anı kimi dəyərləndirdi. Bu gün sizin gəlişiniz mənim üçün toy-bayramdır - deyən Ofeliya xanım dövlətimizdə hökm sürən əmin-amanlıqdan razılığını bildirdi. O, ölkə Prezidenti İlham Əliyevə, yaradılan mövcud şəraitə görə, minnətdarlığını bildirdi: "Biz kimsəsiz qocalara YAP Gənclər Təşkilatı tərəfindən belə diqqət göstərildiyinə görə, təşəkkür edirəm."

Kimsəsiz qocalar onlara təkcə bayram günləri deyil, eləcə də, adi günlərdə də Yeni Azərbaycan Partiyasının rəhbərliyi tərəfindən gündəlik qayğılarına qaldıqlarını, sosial-məişət məslələrini həllində köməklik göstərildiyinə görə minnətdar olduqların söylədilər. Milli adət-ənələrimizə uyğun olaraq, belə bir gündə kimsəsizlərin qonağına çevrilmək, bayram sovqatı ilə qapısını döymək insanlığın ən yüksək nöqtəsi olaraq qiymətləndirildi.

Murad İSMAYILZADƏ,

Nəzakət ƏLƏDDİNQIZI

Səs.- 2011.- 19 mart.- S. 3.