Milli adət-ənənələrimiz - Novruz Bayramı

YAP Gədəbəy rayon təşkilatı və Gədəbəy rayon icra hakimiyyətinin təşkilatçılığı ilə Novruz bayramı qeyd edildi

Dünən YAP Gədəbəy rayon təşkilatı və Gədəbəy rayon icra hakimiyyətinin birgə təşkilatçılığı ilə Novruz bayramı münasibəti ilə rayon ictimaiyyəti, partiya fəallarının iştirakı ilə tədbir keçirildi.

Tədbirdə çıxış edən Gədəbəy rayon icra hakimiyyətinin başçısı Kamran Rzazadə görüş iştirakçılarını milli bayramımız olan Novruz Bayramı münasibətilə təbrik etdi: "Ölkəmiz müstəqillik qazandıqdan sonra Ulu Öndər Heydər Əliyev bütün sahələrdə olduğu kimi, xalqımız üçün müqəddəs olan bu bayramın da dövlət səviyyəsində qeyd olunmasının təməlini qoydu. Xalq tərəfindən bu əziz bayramın yüksək səviyyədə qarşılanması üçün istirahət günlərinə düşən tarixlərin başqa günlərlə əvəz olunması barədə Nazirlər Kabinetinə tapşırıq verdi. Həmin vaxtdan Ulu Öndərin daxili və xarici siyasətini uğurla davam etdirən ölkə Prezidentimiz İlham Əliyev cənabları Novruz bayramının Respublikamızın bütün bölgələrində dövlət səviyyəsində, təntənəli şəkildə qeyd olunmasını davam etdirir".

Tədbirdə YAP Gədəbəy rayon təşkilatının sədri Ramazan Muradov çıxış edərək bildirdi ki, Azərbaycan xalqı tarixin ən çətin dövrlərində belə, öz zəngin milli-mənəvi irsini və adət-ənənəsini yad təzahürlərdən hifz edərək onu qoruyub saxlayıb və nəsildən-nəsilə ötürübdür: "Xalqımızın milli-mənəvi dəyərləri, adət-ənənəsi insanlarımızın dini etiqadına əsaslanaraq özündə çox böyük milli əxlaqi və bəşəri duyğuları təcəssüm etdirir. Müqəddəs daxili inama, mənəvi saflığa tapınan Azərbaycan xalqı tarixin ən keşməkəşli mərhələlərində belə, mənəviyyatın təntənəsinə xidmət edən islam dininin zəngin dəyərlərindən dönməyərək bu dəyərlərə həmişə sadiq qalıbdır. İslam dininin mahiyyətini dərk edən xalqımız onun insan ruhunu paklığa səsləyən müqəddəs çağırışlarına, mərasim və ayinlərinə tarixin bütün məqamlarında əməl etməyə çalışıbdır. Ulu Öndər bu haqda demişdir: "Bizim xalqımız yüz illərlə, min illərlə adət-ənənələrimizi, milli-mənəvi dəyərlərimizi yaradıbdır və bunlar indi bizim xalqımızın mənəviyyatını təşkil edən amillərdir".

R.Muradov onu da bildirdi ki, Ulu Öndər gənclərimizi xalqımızın milli-mənəvi dəyərləri, milli əxlaq prinsipləri əsasında tərbiyə etməyi tövsiyə edirdi. Bu baxımdan, Ulu Öndər gənclərimizin milli-mənəvi dəyərlər əsasında tərbiyələndirilməsindən bəhs edərək demişdir: "Biz öz milli-mənəvi dəyərlərimizi, adət-ənənələrimizi, əxlaqi dəyərlərimizi bütün istiqamətlərdə qorumalıyıq, saxlamalıyıq və gənc nəsli əsrlər boyu böyük sınaqlardan keçmiş bu mənəvi, əxlaqi dəyərlər ruhunda tərbiyələndirməliyik".

Sonra Novruz şənliyinə toplaşmış ictimaiyyət qarşısında rayon mədəniyyət şöbəsinin bədii kollektivi, uşaq yaradıcılıq birliyinin kollektivi, Gədəbəy aşıqları geniş konsert proqramı ilə çıxış etdilər. Həmçinin, rayonun idmançıları şənlik iştirakçıları qarşısında öz nümunəvi çıxışlarını nümayiş etdirdilər.

RƏFİQƏ HÜSEYNOVA

Səs.- 2011.- 19 mart.- S. 8.