“Azərbaycanı inkişaf etmiş dövlətə çevirməliyik"

İlham Əliyev: "Ərzaq təhlükəsizliyinin təmin edilməsi üçün aqrar sahənin sürətli və hərtərəfli inkişafı vacibdir"

“Ölkəmizin bütün bölgələrində inkişaf var. Haradasa işlər daha sürətlə, haradasa bir az ləng gedir. Amma bu, artıq dönməz prosesə çevrilibdir. Biz elə etməliyik ki, 2013-cü ilə qədər, ikinci Dövlət Proqramı başa çatanda qarşıda duran bütün vəzifələr icra edilsin. Əslində, əgər ikinci Dövlət Proqramı tam şəkildə icra olunarsa, ölkənin qarşısında duran əsas iqtisadi, infrastruktur və sosial məsələlər öz həllini tapmış olar"- "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nın icrasının 2-ci ilinin yekunlarına həsr olunmuş konfransda Azərbaycan Prezidenti İlham Əliyev bildirib.

Dövlət başçısı onu da qeyd edib ki, 2011-ci ildə investisiya qoyuluşu davam etdiriləcək, sosial infrastrukturun yaradılması prosesi davam etdiriləcək, məktəblər, tibb müəssisələri, olimpiya idman kompleksləri tikiləcək, yol tikintisinə diqqət göstəriləcək.

Son illərdə ölkəmizdə 10 elektrik stansiyası tikilib. Bu gün ölkəmiz nəinki özünü elektrik enerjisi ilə təmin edir, böyük həcmdə ixrac da edir. Azərbaycanda bərpa olunan enerji mənbələrindən istifadə də xüsusi diqqət altındadır və artıq ilkin işlər başlanıb.

Bütün ölkədə qazlaşdırma prosesi gedir. Dövlət başçısı tərəfindən aidiyyatı qurumların qarşısında vəzifə qoyulubdur ki, bu il və gələn ilin sonuna qədər qazlaşdırma ilə bağlı bütün məsələlər öz həllini tapsın və ölkə əhalisinin 90-95 faizi təbii qazla təmin edilsin.

İçməli su və kanalizasiya problemlərinin həlli də hökumətin qarşısında duran məsələlərdən biridir. Hazırda beynəlxalq maliyyə qurumları ilə aparılmış danışıqlar öz nəticələrini verməkdədir. Bəzi bölgələrdə içməli su, kanalizasiya layihələrinin icrası başlanıb, bəzi bölgələrdə isə hazırlıq işləri gedir.

Meliorasiya ilə bağlı məsələlər öz həllini tapır. Son illər ərzində bu sahədə müəyyən işlər görülüb. Hazırda tikilməkdə olan Şəmkirçay su anbarı başa çatandan sonra on minlərlə hektar torpaq sahəsi suvarılacaq və beləliklə, kənd təsərrüfatının inkişafı üçün əlavə imkanlar yaradılacaq.

Dövlət başçısı aidiyyəti qurumlar qarşısında taxılçılıq üzrə böyük fermer təsərrüfatlarının yaradılmasına başlamaq vəzifəsini qoyub. Hazırda müvafiq dövlət qurumları yeni sahələri müəyyən edirlər.

Ərzaq təhlükəsizliyimizin əsas sahəsi olan taxılçılığın inkişafı üçün kompleks tədbirlər görülür. Texnikalar alınır, lizinqə verilir, aqroservislər yaradılır, subsidiyalar verilir, güzəştli şərtlərlə gübrələr, yanacaq verilir.

Azərbaycanda inkişaf etdirilməsi düşünülən sahələrdən biri də üzümçülükdür. Sirr deyil ki, vaxtilə Azərbaycanda Ulu Öndər Heydər Əliyevin səyləri və təşəbbüsü nəticəsində üzümçülük çox sürətlə inkişaf etmişdi. O, 1969-cu ildə Azərbaycana rəhbərliyə gələndə üzüm istehsalı 300 min ton idi. Amma onun dövründə görülmüş işlər nəticəsində bu rəqəm 2 milyon tona qalxmışdı.

Qeyd edək ki, bu il Sahibkarlığa Kömək Milli Fondunun xətti ilə sahibkarlara 125 milyon manat vəsait veriləcək. Əlbəttə ki, bu vəsait yeni iş yerlərinin yaradılmasına kömək göstərəcək.

Dövlət başçısı bildirir ki, kənd təsərrüfatına yararlı torpaqlardan təyinatı üzrə istifadə olunmalıdır: "Mərkəzi və yerli icra hakimiyyəti orqanları, bələdiyyələr bu torpaqlardan səmərəli istifadəni təmin etməlidir. Bu sahədə qanun pozuntularına yol verənlər ciddi şəkildə cəzalandırılacaqlar. Kənd təsərrüfatı istehsalını stimullaşdırmaq üçün subsidiyalar verilir və bu prosedur sadələşdirilməlidir. Buna böyük ehtiyac var. Ərzaq təhlükəsizliyini təmin etməliyik və inhisarçılığa qarşı daha da ciddi mübarizə aparılmalıdır. Hazırda bu mübarizə lazımi səviyyədə deyil. Ərzaq təhlükəsizliyi ilə bağlı biz elə etməliyik ki, hazırda ölkəmizdə lazımi səviyyədə istehsal olunmayan ərzaq məhsullarının inkişafı üçün və yeni müəssisələrin yaradılması üçün əlavə tədbirlər görülsün".

Ümumiyyətlə, Azərbaycanın qlobal böhran şəraitində sürətli inkişafı dünyada təəccüblə qarşılanır. Son 7 ildə iqtisadiyyat 2,8 dəfə artıb. Yoxsulluğun səviyyəsi 4,5 dəfə azalıb, 900 min iş yeri açılıb. Hər yerdə quruculuq, abadlıq, tikinti işləri gedir, Azərbaycan vətəndaşları sabitlik, təhlükəsizlik şəraitində yaşayırlar. Azərbaycanda müxtəlif kateqoriyadan olan 500 mindən artıq insana dövlət tərəfindən sosial yardım edilir. 100 mindən artıq aztəminatlı ailə hər ay dövlətdən 106 manat ünvanlı yardım olunur. Bütün bunlar onu göstərir ki, ölkəmizdə həyata keçirilən iqtisadi siyasət düzgündür və öz müsbət nəticələrini verir.

Elçin Bayramlı

Səs.- 2011.- 31 mart.- S. 3.