Ümummilli Lider Heydər Əliyevin zəngin irsi gənclər üçün böyük örnəkdir

YAP Səbail rayon təşkilatında Heydər Əliyev Məktəbinin növbəti seminarı keçirilib

Dünən Yeni Azərbaycan Partiyası Səbail rayon təşkilatında Ulu Öndər Heydər Əliyevin zəngin irsinin gənc nəslə aşılanması məqsədilə açılmış Heydər Əliyev Məktəbinin növbəti seminarı keçirilib. Rayon gənclərinin nümayəndələrinin və bir sıra ali məktəb tələbələrinin iştirakı ilə keçirilən seminarda çıxış edən YAP Səbail rayon təşkilatının gənclər birliyinin sədri Rəşad Fərəcov bildirdi ki, bu məktəbin fəaliyyətə başlaması Ulu Öndər Heydər Əliyevin bioqrafiyasının, elmi irsinin öyrənilməsi ilə bağlıdır. "Heydər Əliyev Məktəbinin gənclərə aşılanması mühüm və vacib amillərdəndir. Burada tanınmış ictimai-siyasi xadimlər Yeni Azərbaycan Partiyasında uzun illərdir fəaliyyət göstərən tanınmış şəxslər öz mühazirələrini reallaşdırırlar" deyən R.Fərəcov Ümummilli Lider Heydər Əliyev zəkasının öyrənilməsində gənclərin aktiv olmasının da vacibliyini bildirdi. Eyni zamanda, R.Fərəcov bildirdi ki, mühazirələrdə iştirak edəcək gənclər və fəallar Səbail rayon partiya təşkilatı tərəfindən nəzarətə götürüləcək, onlara siyasi şurada, idarə heyətində və partiyanın digər sahələrində işləmələri, fəaliyyətləri təmin ediləcəkdir: "Mühazirələr hər ayın sonlarında keçiriləcək və bu kurslarda aşılanan fikirlər gənclərimizin həyatında böyük rol oynamaqla yanaşı, müvəffəqiyyət qazanmalarına da töhfə olacaq və fayda verəcəkdir".

Gənclər qarşısında mühazirə ilə çıxış edən tanınmış ictimai xadim - YAP üzvü, Aviasiya Akademiyasının dekanı Nazim Nağıyev Ulu Öndər Heydər Əliyevin zəngin irsinin gənclər tərəfindən öyrənilməsində bu önəmli addımın təqdirəlayiq olduğunu bildirdi. N.Nağıyevin sözlərinə görə, bu kursların YAP-ın Səbail rayon təşkilatının yeni inzibati binasında keçirilməsinin də əhəmiyyəti çox yüksəkdir: "Məhz bu mühazirələr nəticəsində Ulu Öndər Heydər Əliyevin sürdüyü şərəfli, ləyaqətli və iradəli həyatı, bu həyatın önəmli hadisələri barədə geniş məlumatlar çatdırılacaq. "Məhz bu seminar-mühazirələr zamanı gənclərə Ümummilli Lider Heydər Əliyevin bənzərsiz bioqrafiyası geniş auditoriyaya aşılanmış olacaq. N.Nağıyev Ümummilli Lider Heydər Əliyev haqqında nəşr olunan kitablar barədə söhbət açarkən, qeyd etdi ki, bu kitablarda Ulu Öndərin yalnız həyat bioqrafiyası deyil, eləcə də, Prezidentlik dövründə verdiyi əhəmiyyətli qərar və sərəncamları yer alıb. Seminar gənclərin qarşılıqlı müzakirələr aparması ilə yekunlaşdı.

Tapdıq QURBANLI

Səs.- 2011.- 31 mart.- S. 6.