Tarixi faciələrimiz hər zaman mətbuatın diqqət mərkəzindədir

Zaman-zaman ermənilər azərbaycanlılara qarşı soyqırımı siyasəti həyata keçirib. Bu siyasətin həyata keçirilməsi ilə on minlərlə azərbaycanlı qətlə yetirilmiş, yüzlərlə yaşayış məskəni yer üzündən silinmişdir. Ermənilərin 1992-ci il fevralın 25-dən 26-na keçən gecə Xocalı şəhərində həyata keçirdikləri soyqırımı siyasəti, onların tarixən azərbaycanlılara qarşı həyata keçirdikləri məkrli siyasətin davamı olmuşdur. Söhbət etdiyimiz Azərbaycanın mətbu orqanlarının bəzi baş redaktorları ermənilərin Xocalıda törətdikləri soyqırımı bəşəriyyətə və insanlığa qarşı həyata keçirilən cinayət olduğunu bildilər.

Elçin Mirzəbəyli,

“Xalq Cəbhəsi" qəzetinin baş redaktoru:

- Azərbaycan mətbuatı hər zaman Xocalı soyqırımı ilə bağlı məsələlərə yetərincə yer ayırır. Bu, ilk növbədə, hər bir mətbuat orqanının vətəndaşlıq borcudur ki, bu hadisəni geniş şəkildə mətbuatda işıqlandırsın. O cümlədən də, "Xalq Cəbhəsi" qəzeti də Xocalı hadisəsilə bağlı faktları və məlumatları mütəmadi olaraq işıqlandırır.

Azərbaycan mətbuatının beynəlxalq arenada əlaqələrinin gücləndirilməsinə ehtiyac var. Xarici mətbuat orqanlarında Xocalı həqiqətləri ilə bağlı yazıların dərc olunması, missiyasını təkcə mətbuatı üzərinə qoymaq olmaz. İlk növbədə, həmin ölkələrdə fəaliyyət göstərən diaspora qurumları, Xocalı hadisəsilə bağlı geniş şəkildə fəaliyyət göstərməlidilər. Diaspora quruculuğu prosesindən müəyyən qədər fərqli bir istiqamətə getməlidilər. Məsələn, hər hansı bir xarici ölkədə fəaliyyət göstərən diaspora təşkilatları xarici dili təmiz bilən peşəkar jurnalistlərin hazırlanmasına çalışmalıdılar. Bir sözlə, diaspora təşkilatları dünyanın nüfuzlu mətbuat orqanlarında çalışmaq üçün, xarici dili bilən mütəxəssis jurnalistlər yetişdirməlidilər ki, Xocalı ilə bağlı həqiqətləri dünya KİV-lərinə geniş şəkildə çatdırsın.

Yunus Oğuz,

"Olaylar" qəzetinin baş redaktoru:

- Təbii ki, ölkə mətbuatı Xocalı soyqırımı ilə bağlı məsələlərə kifayət qədər yer ayırır. Bildiyiniz kimi, 1992-ci ildə, fevralın 25-dən 26-na keçən gecə ermənilər tərəfindən Xocalıya divan tutulub. Əlbəttə ki, heç vaxt Azərbaycan mətbuatı və xalqı ermənilər tərəfindən törədən bu hadisəyə biganə qala bilməz.

Xocalı hadisəsilə bağlı faktları və həqiqətləri həm QHT-lər, həm də ölkədə fəaliyyət göstərən rus və ingilis dilindəki saytlar kifayət qədər işıqlandırır. Təbii ki, həmin saytlar vasitəsilə bütün dünya bu hadisədən xəbərdar olur. Bu da təsadüfi deyil ki, keçən ildən fərqli olaraq, daha çox ölkələrdə Xocalı soyqırımı ilə bağlı tədbirlər keçirilir. Xocalı ilə əlaqədar olaraq, yeni tədbirlərin aparılması əsas ondan başlamalıdır ki, burada, ilk növbədə, diaspora təşkilatları həmin yaşadığı xarici ölkələrdə Azərbaycanpərəst lobbilərilə iş aparmalıdır. Həmin diaspora təşkilatlarının lobbiləri vasitəsilə bu məsələ dünya parlamentinə çıxarılmalıdır.

Natiq Məmmədli,

"Kaspi" qəzetinin baş redaktoru:

- Azərbaycan KİV-ləri, mütəmadi olaraq, Xocalı soyqırımı ilə bağlı materialları ətraflı şəkildə işıqlandırır. KİV-lər tərəfindən Xocalı soyqırımı ilə bağlı müxtəlif tədbirlər keçirilir.

Xocalı soyqırımının xarici ölkələrdə daha geniş şəkildə işıqlandırılması üçün, ölkədə fəaliyyət göstərən KİV-lərin internet resurs və yaxşı xarici dil də fəaliyyət göstərən saytlar olmalıdır. Bununla Xocalı soyqırımı ilə bağlı bütün həqiqətlər və gerçəklər dünya KİV-lərində yayımlansın. Təəssüf ki, bizim qəzetlərimizin heç birinin xarici dildə internet saytları yoxdur.

Tapdıq Abbas,

"Paralel" qəzetinin baş redaktoru:

- Əvvəlki illərdən fərqli olaraq, son illər Azərbaycan mətbuatı Xocalı soyqırımı ilə bağlı yazılara daha geniş şəkildə yer ayırır. Yəni, ilboyu Xocalı faciəsinin işıqlandırılması prosesi gedir. Buna misal olaraq, demək olar ki, həm ölkəmizdə, həm də xaricdə bu faciə ilə bağlı keçirilən tədbirlərin işıqlandırılmasına geniş yer verilir.

Ümumiyyətlə, son illər istər ölkəmizdə, istərsə də xaricdə, həm Dağlıq Qarabağ münaqişəsi, həm də Xocalı soyqırımı geniş şəkildə işıqlandırılır.

Xoşqədəm Bəxşəliyeva,

"Üç nöqtə" qəzetinin baş redaktoru:

- Azərbaycanda fəaliyyət göstərən mətbu orqanlar və elektron KİV-lər Xocalı faciəsinə yetərli qədər yer ayırır. Hesab edirəm ki, ölkə mətbuatı Xocalı soyqırımı ilə bağlı həqiqətləri və faktları kifayət qədər işıqlandırır.

Bildiyiniz kimi, fəaliyyət göstərən mətbu orqanlarmızın həm ingilis dilində, həm də rus dilində internet saytları var. Həmin internet saytlarında da bu məsələlərlə bağlı bir çox yazılar üstünlük təşkil edir. Yəni, Azərbaycan mətbuatı bu kimi məsələləri dünya KİV-lərinə çatdırmaq üçün əlindən gələni edir. Son vaxtlarda dövlətimizin bu sahədə apardığı işlər kifayət qədər ürəkaçandır. Xüsusilə də, Heydər Əliyev Fondunun Xocalı soyqırımı ilə bağlı hazırladığı materialların və keçirdiyi tədbirlərin dünya ölkələrində yayılması çox təqdirəlayiq bir haldır. Bir sözlə, Xocalı soyqırımı həqiqətləri xarici ölkələrdə kifayət qədər yayımlanır və yayımlanmaqda davam edir.

GÜLYANƏ

Səs.- 2011.- 3 mart.- S. 5.