Qısa zamanda Dağlıq Qarabağ işğaldan azad edilə bilər

Elşad Mirbəşiroğlu: "Çünki Azərbaycanın hərbi, siyasi və iqtisadi potensialı Ermənistandan qat-qat üstündür"

- Müharibə başlayarsa, sizcə, Azərbaycan işğal altında olan ərazilərini hansı zaman kəsiyində azad edə bilər?

- Əminliklə deyə bilərəm ki, əgər müharibə başlayarsa, qısa bir zaman ərzində Azərbaycan işğal altında olan ərazilərini, azad edəcək. Çünki Azərbaycanın hərbi, siyasi və iqtisadi potensialı Ermənistandan qat-qat üstündür. Bu günlər, işğalçı ölkə olan Ermənistan hərbi heyət saxlamaq gücündə deyil. Hətta işğalçı dövlət hərbdə şəxsi heyəti xaricdən alınan qrantlar və ianələrin köməyi ilə saxlayır. Eyni zamanda, Ermənistan işğal etdiyi torpaqları da öz gücünə saxlaya bilmir. Azərbaycanın hərbi büdcəsi, Ermənistanın dövlət büdcəsini üstələyir. Bu da Azərbaycanın kifayət qədər böyük hərbi potensialı olduğunu sübut edir. Bir sözlə, ölkəmizdə artıq peşəkar ordu formalaşmışdır. Bildiyiniz kimi, Prezident İlham Əliyev də dəfələrlə öz çıxışlarında qeyd edib ki, biz sadəcə olaraq, beynəlxalq hüququn prinsiplərini üstün tutaraq, dünya ictimaiyyətinin sülh çağırışlarına cavab verərək, bu danışıqları davam etdiririk. Təbii ki, Dağlıq Qarabağ münaqişəsi ətrafında aparılan bu danışıqlar bir nəticə vermədiyi halda, tez bir zaman ərzində hərbi yola ət ataraq, öz torpaqlarımızı işğaldan azad edəcəyik.

- Rusiyanın Ermənistanla hərbi əməkdaşlığı mövcuddur. Müharibənin gedişində Rusiyanın Ermənistana hərbi yardımı baş tuta bilərmi?

- Hər zaman Rusiya Ermənistana hərtərəfli hərbi yardım göstərib. Bu gün Ermənistanın ordusunda silah və əsgəri heyət mövcuddursa, bu, Rusiyanın hesabınadır. Ümumiyyətlə, Ermənistan təkbaşına Azərbaycanla heç bir halda hərbi sahədə rəqabət aparmaq gücünə malik deyil. Rusiya Azərbaycan-Ermənistan arasında hərbi potensialdakı uçurumu görərək, burada vəziyyəti nisbətən balanslaşdırmağa çalışır və işğalçı ölkəyə öz köməkliyini edir. Bir məsələni də qeyd etmək istərdim ki, Rusiya ilə Azərbaycan arasında da kifayət qədər isti münasibətlər mövcuddur. Hesab edirəm ki, Rusiyanın rəsmi dairələri də görür ki, Azərbaycan Dağlıq Qarabağ məsələsini sülh yolu ilə həll etməyə çalışır. Burada sülh danışıqları nəticə verməyəcəyi təqdirdə, Azərbaycan öz ərazilərində hərbi əməliyyatlar aparmaq gücündən istifadə edəcəkdir. Bəli, Ermənistanla Rusiya arasında hərbi müqavilə mövcuddur və əgər Ermənistanın ərazilərinə hər hansı xarici müdaxilə olarsa, Rusiya bu istiqamətdə köməyini əsirgəməyəcəkdir. Amma Rusiya çox gözəl bilir ki, işğal altında olan ərazilər Ermənistana məxsus deyil. Əgər Azərbaycan öz ərazilərini işğaldan azad edərsə, bu, Rusiya Ermənistan ərazisi kimi qəbul olunmamalıdır. Bu halda Rusiya ilə Ermənistan arasındakı həmin saziş qəbul olmayacaqdır.

GÜLYANƏ

Səs.- 2011.- 12 mart.- S. 10.