“Eurovision-2011" müsabiqəsindəki uğur türk dünyasının qələbəsidir

Bu qələbə sevinci Qarabağda yaşanılacaq

Neçə aydır ki, Azərbaycanda yaşanılan "Eurovision-2011" müsabiqəsinin həyəcanlarının yeri sevinc, qürur hissi ilə əvəzləndi. Almaniyanın Düsseldorf şəhərinin "Esprit Arena"sında 56-cı "Eurovision" Mahnı Müsabiqəsində Azərbaycan bayrağının dalğalanması xalqın tarixi qələbəsidir.

Azərbaycanı yarışmada təmsil edən Eldar Qasımov və Nigar Camal dueti 25 ölkənin iştirakı ilə keçən müsabiqənin final mərhələsində Avstriya, Bosniya və Hersoqovina, Danimarka, Estoniya, Finlandiya, Fransa, Gürcüstan, Almaniya, Yunanıstan, Macarıstan, İslandiya, İtaliya, Litva, Moldova, Rumıniya, Rusiya, Serbiya, Sloveniya, İspaniya, İsveç, İsveçrə, Ukrayna və Böyük Britaniya kimi dövlətlərə xalqın musiqi mədəniyyətini göstərə bildilər. Müsabiqədə birinci yeri Azərbaycan, ikinci yeri İtaliya, üçüncü yeri isə İsveç tutdu. Təmsilçilərimiz "Eurovision-2012" yarışmasını Azərbaycanın paytaxtı Bakı şəhərində keçirilməsinə nail oldular.

Dünya xalqları arasında milli-mənəvi dəyərləri ilə yer tutan və yüksək səviyyədə təbliğ olunan Azərbaycan bu müsabiqədə nəyə qadir olduğunu sübuta yetirdi. Azərbaycan xalqının qələbə anlayışının daxilində duyub və yaşatmağa ehtiyacı olduğu zamanda bu böyük hadisə xalqın tələbatına böyük cavab oldu. Bu müsabiqədə qalibiyyət bütöv bir xalqın qələbəsinə çevrildi. Qələbəni yüksək səviyyədə qeyd edən xalqımızın müsabiqə ilə bağlı təəssüratları maraqlı və orijinaldır.

Respublikanın xalq artisti, Prezident təqaüdçüsü, professor Ramiz Quliyev:

- "Eurovision-2011" müsabiqəsinin Azərbaycan təmsilçiləri Eldar və Nigar ifa etdiyi "Runnung scared" mahnısı ilə qalibiyyətimizə imza atdılar. Səsvermə nəticəsində ən maksimum bal - 221 xal toplayan duet ifaçılarımız bütün dünya xalqlarına gözəl ifa, səhnə mədəniyyətini göstərə bildilər. Müsabiqənin ilk günlərindən artıq qələbə əzmi hiss olunmaqda idi. Artıq bu yarışmada Azərbaycanın səsi, izi var idi. "Eurovision" Mahnı Müsabiqəsində 2008-ci ildən iştirak edən Azərbaycan Belqradda keçirilən "Eurovision" yarışmasında ilk dəfədən qalib 10-luqda təmsil olundu. Daha sonra Aysel və Araşın duetinin 3-cü, Safuranın 5-ci yeri tutmaları qələbənin yaxında olduğuna əsas verirdi. Gənclərimizin Avropanın 43 ölkəsinin təmsilçiləri arasında birinci yer tutması və qaliblərin əllərində Azərbaycan və Türkiyənin dövlət bayraqlarını dalğalandırmaları damarından türk qanı axan hər kəsi sevindirdi. Bu tarixi qələbəmiz türk xalqının zəfəridir. Azərbaycanın müstəqilliyinin 20-ci ildönümündə qələbənin qazanılması bir töhfədir.

Mən deyərdim ki, bu müsabiqədə Azərbaycanın birinci yerdə adının hallanması bütövlükdə xalqımızın uğuru və qələbəsidir. Bu qələbənin kökündə Azərbaycan sənətkarlarının istedadı, duyumu dayanır. Bu, Tanrı tərəfindən xalqımıza verilən istedad, vergidir. Azərbaycan musiqi mədəniyyəti özünün uğurları ilə dünya səviyyəsində imzalarını atmış və bu günlərdə yaşadığımız sevinc həyəcanları da həmin uğurların davamı kimi qiymətləndirilir. "Eurovision" müsbiqəsində birincilik pilə-pillə, zaman-zaman əldə olunan uğurdur.Biz, dünya xalqlarına, Avropaya bir daha sübut etdik ki, Azərbaycan təkcə neft-qaz ölkəsi deyil, həm də zəngin mədəniyyətə malik dövlətdir. Azərbaycanın tarixi, coğrafi mövqeyi, iqtisadiyyatı onun, həqiqətən də, dünya xalqları içərisində seçilən bir xalq olduğunu sübut edən bir həqiqətdir. Dünyaya göstərdik ki, biz müstəqil, islam mədəniyyətinə malik dövlət kimi hər sahədə böyük layihələrin iştirakçısı və qalibi kimi çıxış etmək qüdrətindəyik. Təbii ki, bütün bunların - idman, mədəniyyət, təhsil və digər sahələrdə dövlətimizə gətirilən birincilik və medallar Azərbaycan rəhbərinin bütün sahələrə göstərdiyi diqqətin nəticəsidir. Prezident İlham Əliyevin Azərbaycan mədəniyyət işçilərinə göstərdiyi diqqətin nəticəsi olaraq milli mədəniyyətimiz, musiqimiz dünya ölkələrinə yol açır və Avropa dinləyicisini riqqətə gətirir. Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın qayğı və məqsədyönlü fəaliyyəti nəticəsində Azərbaycan öz səsini dünyanın istənilən bir ölkəsinin böyük səhnələrindən eşidilir. Bu layihələr bir daha sübut edir ki, Azərbaycan musiqisinin tarixi ənənəsi və kökü vardır. Qonşu dövlətin mənfur niyyətləri puça çıxır, hər zaman özünün tarixi kökü, mədəniyyəti ilə dünyaya həyasızcasına məlumatlar verən ermənilər "Eurovision" müsabiqəsində Azərbaycan ifaçıları qarşısında məğlubiyyətlərini göstərdilər. Hər şeyin sahibi var. Oğurluq etməklə özünə tarix yarada bilməzsən. Avropa miqyasında bir daha təsdiqləndi ki, Azərbaycan xalqının tarixi, mədəniyyəti nəyə qadirdir. Bir arzum var ki, uğurlarımız bizi daim müşayiət etsin. Bu qələbənin davamı olaraq, növbəti bayramımızı Dağlıq Qarabağda qeyd edək. Şuşa musiqiçilər beşiyidir. Onun kökü nəticəsində Azərbaycanda saysız musiqiçilər yetişmişdir. Azərbaycan hər zaman olduğu kimi bu gün də düzgün yoldadır. Hər xalqın özünün torpağı, ənənəsi, musiqisi olmalıdır ki, dünyada öz sözünü deməyə qadir olsun. Azərbaycan belə bir xalqdır. Mən bir daha bu qələbə münasibəti ilə bütün Azərbaycan xalqını təbrik edirəm.

Respublikanın xalq artisti, Prezident təqaüdçüsü Habil Əliyev:

- Bütün Azərbaycan xalqı bayram əhval-ruhiyyəsindədir. Bu qələbə bizə böyük bir sevinc yaşatdı. Ermənilərin bu "Eurovision" Mahnı Müsabiqəsində təmsil olunması və özlərinəməxsus yer tutmaları onların Azərbaycanla müqayisədə Avropa dairəsində hansı səviyyədə olduqlarını göstərən əsas faktordur. Eldar və Nigarın Avropa səhnəsində yaşadıqları və bizə nəsib etdikləri sevincli anlar dünya xəritəsində bir nöqtə kimi görünən Azərbaycanın böyük arenada qələbəsidir. Bu qələbə bizim başqa uğurlarımıza bənzəmir. Etiraf edək ki, Azərbaycana son illərdə müxtəlif sahələrin mütəxəssisləri tərəfindən medallar, fəxri mükafatlar və s. gətirilir. Bu, Azərbaycan musiqisinin zirvəsi hesab olunur. Artıq növbəti müsabiqədə Azərbaycan "Eurovision"a ev sahibliyi edəcək. Bu, əlbəttə, bizim hər birimizə böyük bir fəxrdir ki, iki gənc bu müsabiqəni Azərbaycana gətirməyə nail oldular. Azərbaycan musiqisinin nə qədər böyük dəyərə malik olduğu sübuta yetirildi. Təbii ki, Eldarın belə bir səviyyədə musiqi təqdim etməsi heç də təsadüfi deyil. Azərbaycan teatr sənətinin böyük dahisi, əvəzedilməz ustad Abbas Mirzə Şərifzadənin nəticəsi, təbii ki, milli köklər üzərində böyüdüyündən xalqın belə səviyyəli təmsilçisinə çevrildi. Abbas Mirzə Şərifzadənin, Mərziyə Davudovanın nəyə qadir olması bu gün gənc nəslə onun simasında təqdim olundu. Onların bir damla qanı Eldarın Avropanı fəth etməsi ilə nəticələndi.

Azərbaycan Bəstəkarlar İttifaqının üzvü Tahir Əkbər:

- Mən deyərdim ki, bu qələbə Azərbaycan tarixində, musiqi sənətində olan ilk tarixi böyük uğurdur. Düzdür, bizim musiqinin bütün janrları dünyaya əks-səda salmışdır. Əlbəttə ki, bu hadisənin mühiti vardır. Bu mühiti Azərbaycan vətəndaşının Azərbaycan milli-mənəvi dəyərlərinə, musiqimizə və incəsənətimizə olan diqqət formalaşdırmışdır. Mehriban xanım Əliyevanın YUNESKO səviyyəsində milli sərvətlərimizin dünyanın şah əsərləri sırasında layihələr əsasında daxil etməsi, sözsüz ki, dünya xalqları arasında Azərbaycanın imicinin daha da artmasına gətirib çıxarıb. Bu yarışmada Mədəniyyət və Turizm Nazirliyinin, Gənclər və İdman Nazirliyinin, İctimai Televiziya və Radiosu ilə yanaşı, Heydər Əliyev Fondunun da yeri və payı xüsusidir. İctimai Televiziyanın efirində 7 həftə davam edən seçim turunun sonunda 76 yarışmaçı arasında münsiflər heyətinin səsvermə nəticəsində Eldar və Nigar dueti daha çox səs toplayaraq, Azərbaycanın 2011-ci ildəki "Eurovision" Mahnı Müsabiqəsində təmsil etmək hüququ qazanmışdı. Bu etimad özünü təsdiqlədi. Duet ifaçılarının gənc olmasına baxmayaraq, uğur qazandılar. İl yarım bundan əvvəl, səsinin yoxlanılması ilə bağlı mənə müraciət edən Eldar bu gün "Evrovision" müsabiqəsində böyük sensasiya doğurdu. Onun qeyri-adi bariton yönlü səsi müsabiqənin bütün iştirakçılarından fərqliliyini göstərdi. Onu da qeyd edim ki, Eldar çox istedadlı gəncdir. O, ingilis, alman, rus, fransız dillərini gözəl bilir. Müxtəlif xalqların dillərinin bilicisi, gözəl ifası, səhnə mədəniyyəti, daxili mənəvi keyfiyyətləri hələ onu çox müşayiət edəcəkdir. Biz artıq onun və Nigarın simasında Avropa miqyasında sözümüzü deyə bildik.

Azərbaycan Bəstəkarlar İttifaqının katibi, respublikanın xalq artisti, professor Ramiz Zöhrabov:

- Yarım əsrdən artıq bir zaman məsafəsində keçirilən bu müsabiqədə Azərbaycanın son illər ərzində ardıcıl olaraq iştirakı onun musiqisinin hansı səviyyədə olduğunu bir daha dünya xalqlarına göstərdi. 4 il "Eurovision" müsabiqəsində iştirak edən Azərbaycan qısa bir zaman kəsiyində birinci yeri əldə edə bildi. Bu, həm seçilən ifaçıların gözəl səs imkanlarına malik olmasının, həm oranjimanın yüksək səviyyədə edilməsinin, həm də səhnədə bu cütlüyün yüksək mədəniyyət göstərməsinin nəticəsində əldə edildi. Onu da qeyd edək ki, rəssam işi yüksək keyfiyyəti ilə diqqəti cəlb edirdi. Nadir hallarda təsadüf olunur ki, bir xalqın təmsilçisi ardıcıl əsas yerləri götürmüş olsun. Bu da, Azərbaycan ifaçılarına nəsib oldu. Mən inanıram ki, növbəti müsabiqələrdə də Azərbaycan bu qalibiyyəti əldən verməyəcək. Azərbaycana müsabiqədə ən yüksək - 12 xalı Rusiya, Türkiyə və Malta, 10 xal isə Ukrayna, Yunanıstan, Xorvatiya, San-Marino, Rumıniya və Moldova verdilər. Bu göstəricilər Azərbaycan ifaçılarına olan diqqət idi. Bu nəticə, ilk növbədə, Azərbaycan dövlətinin mədəniyyətinə və incəsənətinə verilən yüksək önəmin təzahürüdür. Eyni zamanda, bu həm də xalqımızın nə qədər böyük potensiala malik olduğunu, ölkəmizdə istedadlı gənclərin yetişdiyini təsdiq edir. Bu qələbə həm də milli birliyimizin, həmrəyliyimizin nəticəsidir. Azərbaycan Respublikasının Prezidenti cənab İlham Əliyevin qeyd etdiyi kimi "Bizim gücümüz bizim birliyimizdədir".

Bu qələbə türk dünyasını qələbəsidir. Bildiyiniz kimi, Türkiyənin nüfuzlu qəzetləri bu tarixi qələbəmizi öz qələbələri kimi qeyd edib. "Hürriyyət", "Vətən" və digər nüfuzlu qəzetlər Azərbaycan gənclərinin qələbə anının sevincini əks etdiriblər. Düsseldorf şəhərində keçirilən 56-cı "Eurovision" müsabiqəsində Azərbaycanın təmsilçiləri Eldar Qasımov və Nigar Camalın duetinin qalibiyyəti bizim tarixi mədəniyyətimizin qələbəsidir.

NƏZAKƏT

Səs.- 2011.- 17 may.- S. 10.