ŞƏRQİN İLK MÜSTƏQİL RESPUBLİKASI

Nurlanə Əliyeva: "28 may - millətimizin şərəf və ləyaqət tarixidir"

May ayı bayramlar, sevincli günlər ayıdır. Bu ayın ilk günlərindən başlayaraq xalqımız may ayının 10-da Ümummilli Liderimiz Heydər Əliyevin anadan olmasının ildönümünü təntənəli şəkildə qeyd etdi. Bakıda, Ulu Öndərin adını daşıyan sarayın qarşısındakı parkda isə möhtəşəm Gül bayramı təşkil edildi. Bu sevincli tarixi günün ardınca xalqımız növbəti "Eurovision-2011" Mahnı Müsabiqəsində qələbə sevinci yaşadı. Eyni zamanda, xalqımız müstəqil demokratik dövlətimizin yaranmasının 93-cü ildönümünü qeyd etməyə hazırlaşır.

YAP Qadınlar Şurasının sədri, professor Nurlanə Əliyeva bizimlə söhbətində bütün dünya azərbaycanlılarını "Eurovision-2011" Mahnı Müsabiqəsində qazandığı qələbə münasibətilə təbrik etdi və müsabiqədəki birinciliyin Azərbaycan xalqının qələbəsi olduğunu söylədi. 28 May Respublika Günü ilə bağlı ölkəmizdə keçirilən bayram tədbirlərini bayramların bayramlara qovuşması kimi dəyərləndirən N.Əliyeva qələbələrin işğal altında olan Dağlıq Qarabağda da davam etdiriləcəyinə əmin olduğunu bildirdi:

- May ayı xalqımız üçün, bütün türk dünyası üçün mübarək aydır. Bu baxımdan 28 may Azərbaycan tarixinin respublika quruculuğu baxımından açılmış yeni mərhələsidir. 93 il öncə qurulmuş Azərbaycan Demokratik Cümhuriyyətinin, şübhəsiz ki, hər birimizin qəlbində xüsusi yeri var. Elə bir azərbaycanlı tapmaq olmaz ki, 28 may tarixini qürur hissi ilə xatırlamasın. Cümhuriyyət qurucuları olan ziyalılarımız Demokratik Respublikanı min bir əziyyətlə qursalar da, təəssüf hissi ilə qeyd etməliyik ki, erməni daşnakları və rus işğalı nəticəsində onun ömrü uzun olmadı. Amma hər bir azərbaycanlı respublikanın varlığı ilə azadlığın nə olduğunu daddı və inandı ki, çox keçməyəcək müstəqilliyimiz bərpa olunacaq. Cümhuriyyət tarixini araşdıranlar yaxşı bilirlər ki, onun ömrünün qısa olmasına baxmayaraq, 23 ay ərzində çox böyük işlər görülmüş, parlamentdə dövlət quruculuğu ilə bağlı ciddi qanunlar qəbul olunmuş, paytaxt Gəncədən Bakıya köçürülmüş, ordu quruculuğuna başlamış və nəhayət, ölkənin ərazisi həmin illərdə azərbaycanlılara qan udduran erməni daşnaklarından təmizlənmişdi.

XX əsrin sonlarında yenidən müstəqilliyini bərpa edən Azərbaycan xalqı dünyaya əyilməz və mübariz xalq olduğunu nümayiş etdirdi. Düzdür, dövlətçiliyin bərpası çətin və ağır proseslər nəticəsində əldə olundu. Daxili çəkişmələr bizi dövlət müstəqilliyimizi itirmək təhlükəsi qarşısında qoymuşdur. Əgər Ulu Öndərimiz Heydər Əliyev olmasaydı, indi qurduğumuz respublikanın da ömrü uzun olmaya bilərdi. Lakin Heydər Əliyev Azərbaycan adlı bir gəminin bacarıqlı kapitanı kimi ölkəni bütün fırtınalardan məharətlə qoruyaraq, onu iqtisadi və siyasi inkişaf yoluna gətirib çıxartdı. Ümummilli Liderimizin fəaliyyəti nəticəsində qazanılan nailiyyətlər Azərbaycan dövlətçiliyinin bugünü və gələcəyi baxımından son dərəcə dəyərlidir. Bütün mənalı həyatını xalqına həsr etmiş Ulu Öndərimiz Heydər Əliyevin siyasi xadim və dövlət rəhbəri kimi zəngin fəaliyyəti Azərbaycan xalqının tarixində dərin iz buraxaraq, dövlət idarəçiliyi məktəbi yaratmışdır. Akademik Ramiz Mehdiyevə istinadla deyə bilərik ki, siyasi lider dahiliyi yaşadığı zamana və gələcəyə təsiri, idarəetmə qərar qəbul etmə tərzlərində novatorluq keyfiyyətləri ilə önəmli sayılır. Belə ki, Ulu Öndər bütün keyfiyyətlərinə yüksək mənəviyyatına, siyasi liderlik xüsusiyyətlərinə görə alternativsiz, fenomenal şəxsiyyət idi. Bütün həyatını doğma Azərbaycanın xoşbəxtliyinə həsr edərək, bu yolda ölçüyəgəlməz və misilsiz xidmətlər göstərən, bəşər tarixində təkrarı olmayan dahi Heydər Əliyev Azərbaycanı müstəqil bir dövlət kimi ən ağır təhlükələrdən xilas etmiş, qısa zaman ərzində ölkədə sabitlik və əmin-amanlığı bərqərar edərək, respublikamızı inkişaf yoluna səfərbər etmiş, xalqımızın iqtisadi, sosial-mədəni tərəqqisini stimullaşdıran, ümumən Azərbaycan cəmiyyətinin hərtərəfli inkişafını təmin etməyə qadir olan müdrik siyasi strategiyanın müəllifi olmuşdur. Ulu Öndərimiz Heydər Əliyevin böyük xidmətlərini Azərbaycan xalqı sonsuz minnətdarlıq hissi ilə qeyd edir. Fərəhlidir ki, Ümummilli Liderimizin müdrik siyasəti möhtərəm Prezidentimiz İlham Əliyev tərəfindən uğurla davam etdirilir. Bu isə müstəqil ölkəmizə yeni-yeni tarixi nailiyyətlər qazandırır, dövlət müstəqilliyimizi daim gücləndirir və Azərbaycan Cənubi Qafqazın lider ölkəsi olmaqla dünya birliyində fəal mövqe qazanır.

RƏFİQƏ KAMALQIZI

Səs.- 2011.- 19 may.- S. 6.