Özəl sektor inkişaf edir

Dövlət Proqramının uğurlu icrası əhalinin rifah halının daha da yaxşılaşdırılmasına xidmət edir

Məlum olduğu kimi, “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın icrası istiqamətində ikinci mərhələyə start verilmişdir. Məhz bu proqramın bölgələrdə uğurlu icrası nəticəsində, ölkə iqtisadiyyatında inkişaf perspektivləri daha da artmış, müxtəlif sahələrdə yeni iş yerləri açılmış, infrastrukturlar yaradılmış, nəhəng quruculuq işləri həyata keçirilmişdir. Bu da, təbii ki, əhalinin rifah halının yaxşılaşdırılmasına xidmət edən növbəti uğur kimi səciyyələndirilmişdir. Əgər yaxın tarixə müraciət etsək görərik ki, bir neçə il öncə, regionlarda işsizlik və yoxsulluq səviyyəsi daha yüksək idi. Bu da əhalinin regionlardan paytaxta axınını sürətləndirirdi. 2004-cü ildə regionların inkişafı ilə bağlı qəbul edilən Dövlət Proqramı bu problemin qarşısının alınmasında mühüm rol oynadı. Bu proqram icra olunduqdan sonra, 2009-cu ildə ikinci Dövlət Proqramının qəbul edilməsi Azərbaycan regionlarının sosial-iqtisadi inkişafını daha da sürətləndirdi. Belə ki, regionlarda yeni sənaye müəssisələrinin tikilməsi, infrastrukturun yaxşılaşdırılması, məktəblərin, xəstəxana və diaqnostika mərkəzlərinin, idman olimpiya mərkəzlərinin tikintisi, yolların abadlaşdırılması, turizm üçün əlverişli mühitin yaradılması nəticəsində bölgələrimizdə 100 minlərlə yeni iş yeri yaradılıb ki, bu da işsizliyin və yoxsulluğun azaldılmasına əhəmiyyətli dərəcədə təsir göstərib. Burada statistik rəqəmlərə mürac

Sənayeləşmə prosesinin sürətlənməsi

Bu gün Azərbaycanda sənayeləşmə prosesinin sürətlənməsi istiqamətində də müəyyən işlər aparılmaqdadır. Bunun regionlarda həyata keçirilməsi həmin ərazilərdə kiçik və orta sahibkarlığın inkişafına təkan verə bilər. Hazırda bu istiqamətdə tədbirlər həyata keçirilir. Belə ki, sahibkarlığın inkişafı, iqtisadiyyatın bütün sahələrində, xüsusilə, prioritet inkişaf sahələrində işgüzar fəaliyyət üçün normativ-hüquqi, təşkilati və maliyyə təminatı səviyyəsinin yüksəldilməsi, kiçik və orta sahibkarlığın dünya iqtisadiyyatına inteqrasiyasının sürətləndirilməsi, ixrac potensialının artırılmasında və cəmiyyətin sosial problemlərinin həllində onların rolunun gücləndirilməsi nəzərdə tutulur. Təcrübə göstərir ki, bazar münasibətləri sisteminin formalaşmasında sahibkarlığın inkişafı nəinki əsas yerlərdən birini tutur, hətta deyərdim ki, sahibkarlıq bazar münasibətlərinin atributudur. Bu günə qədər sahibkarlığın hüquqi bazasının formalaşması istiqamətində mühüm normativ sənədlər qəbul edilib. Sahibkarlığın inkişafına əngəl törədən süni maneələrin qanunvericilik qaydasında aradan götürülməsi, sərbəst bazar subyektlərinə sağlam iqtisadi mühitin yaradılması, sahibkarlıq fəaliyyəti ilə məşğul olanlara yardımın göstərilməsi bu istiqamətdə inkişafı sürətləndirir. Son illərdə Sahibkarlığa Kömək Milli Fondunun xətti ilə kiçik və orta sahibkarlara təxminən 700 milyon manat həcmində güzəştli kredit verilib.

Özəl sektorun əhəmiyyəti

Bu gün ölkə iqtisadiyyatının böyük hissəsi - 80 faizindən çoxu özəl sektorun payına düşür. Lakin burada neft sektoru üstünlük təşkil edir. Eyni zamanda, bunun qeyri-neft sektorunun xeyirinə dəyişməsi tendensiyası müşahidə olunmaqdadır. Həyata keçirilən dövlət proqramları bu prosesin sürətlənməsinə də kömək edir. Ekspertlərin rəyinə görə, regionlara investisiya qoyuluşunu sürətləndirmək üçün stimullaşdırıcı tədbirlərin bir qədər də gücləndirilməsinə ehtiyac var. Regionların inkişafına 2004-cü ildən etibarən bütün maliyyə mənbələri hesabına 15,5 milyard dollar, o cümlədən, ötən il 3,4 milyard dollar məbləğində investisiya yönəldilib, bunun sayəsində yüzlərlə əhəmiyyətli layihələr icra olunub. 2011-ci ildə regionlarda 1430 investisiya layihəsinin maliyyələşdirilməsinə 115 milyon manat güzəştli kreditlər verilib. Bu kreditlərin artırılması, sahibkarlara dövlət büdcəsindən ayrılan vəsaitlərin həcminin ildən-ilə artırılması, iş adamlarının fəaliyyətinə süni müdaxilələrin aradan qaldırılması, antiinhisar və korrupsiyaya qarşı mübarizə tədbirlərinin gücləndirilməsi iş adamları tərəfindən də razılıqla qarşılanır.

R.RÖVŞƏN

Səs.- 2011.- 24 may.- S. 11.