Heydər Əliyev ölkəmizin inkişafı üçün mükəmməl irs, dövlətçilik məktəbi yaratmışdır

Yeni Azərbaycan Partiyası Yasamal rayon təşkilatının Yasamal rayon icra hakimiyyəti ilə birgə təşkil etdiyi təntənəli tədbir keçirildi

Dünən Yasamal rayon icra hakimiyyətinin akt zalında Yeni Azərbaycan Partiyası Yasamal rayon təşkilatının Yasamal rayon icra hakimiyyəti ilə birgə təşkil etdiyi geniş tərkibli, təntənəli tədbir keçirildi. Tədbirdə rayon fəalları və ictimaiyyət nümayəndələri iştirak edirdilər. Tədbiri giriş sözü ilə açan YAP Yasamal rayon təşkilatının sədri Fikrət İsmayılov iştirakçıları və qonaqları salamladıqdan sonra dedi ki, bu gün bütün dünya azərbaycanlıları Ulu Öndər Heydər Əliyevin 88-ci ildönümünü qeyd etməyə hazırlaşır: "Bu ad bizim üçün hər şeydən əzizdir. Respublikamızın hazırkı inkişafı, tərəqqisi, dünya dövlətləri arasında lider ölkələrdən biri kimi tanınması məhz Heydər Əliyevin bizlərə miras qoyduğu siyasi xətt nəticəsində gerçəkləşmişdir. Tarixi proseslərə bələd olan hər bir azərbaycanlı çox gözəl bilir ki, Heydər Əliyev olmasaydı, artıq bu gün dünya xəritəsində Azərbaycan adlanan respublika mövcud olmazdı. Onun Azərbaycan xalqının xilaskarı olması hər birimiz üçün fərəh və qürur mənbəyidir". Fikrət İsmayılovun çıxışından sonra YAP sıralarına yenicə daxil olmuş gənclərə partiya vəsiqələri təqdim olundu. Sonra söz filologiya elmləri doktoru Nizaməddin Şəmsizadəyə verildi. N.Şəmsizadə öz çıxışında qeyd etdi ki, bu gün Azərbaycan dövləti, Azərbaycan xalqı bütün sahələrdə qazandığı fərəhli günlərini yaşayır.

Daha sonra söz YAP Yasamal rayon təşkilatının sədr müavini, Bakı Metropoliteninin rəhbəri Tağı Əhmədova verildi. Tağı Əhmədov çıxış edərək, bildirdi ki, Ulu Öndərin dahiliklərindən biri də ondan ibarət idi ki, bu böyük şəxsiyyət bütün sahələrdə geniş bilgilərə sahib olmaqla insanları valeh edirdi: "Eyni zamanda, bir nəqliyyatçı kimi, deyə bilərəm ki, Ulu Öndər Heydər Əliyevin Azərbaycanda gördüyü nəhəng işlərdən biri də nəqliyyat sektoruna aid olub. Məhz 34 kilometrə malik olan Bakı Metropoliteninin 25 kilometrlik məsafəsi Heydər Əliyevin hakimiyyətdə olduğu illərdə çəkilərək istifadəyə verilib." Sonra çıxış etmək üçün söz alanlar- Yasamal rayon icra hakimiyyətinin başçısı İbrahim Mehdiyev, YAP Yasamal rayon idarə heyətinin üzvü Rasim Nəbiyev, millət vəkili Etibar Hüseynov müxtəlif mövzulardakı çıxışlarında vurğuladılar ki, ölkənin çətin anlarında Azərbaycanın inkişaf konsepsiyasını məhz Heydər Əliyev yaradıb. Eləcə də, bütün təzyiqlərə baxmayaraq, ölkəmizin neft strategiyasını qurub və buradan gələn gəlirləri qeyri-neft sektoruna yönəldərək, ölkə iqtisadiyyatının inkişaf etməsində nəhəng işlər görüb. Çıxış edənlər sonda bir daha vurğulayıblar ki, bu dahi şəxsiyyət ölkəmizin hərtərəfli inkişafı üçün mükəmməl irs, dövlətçilik məktəbi yaratmışdır. Bu gün böyük Öndərimizin siyasi xətti uğurla davam etdirilir. Ölkə Prezidenti Cənab İlham Əliyevin fəaliyyəti bütün bu gerçəkliklərə, həqiqətlərə bariz nümunədir.

RÖVŞƏN RƏSULOV

Səs.- 2011.- 6 may.- S. 7.