Ümummilli Lider Heydər Əliyev Azərbaycanın bu gününün və gələcəyinin qarantıdır

"Səs" qəzeti Ulu Öndər Heydər Əliyevin anadan olmasının 88-ci ildönümü münasibəti ilə dəyirmi masa keçirdi

(Əvvəli ötən sayımızda)

Ölkəmizdə və ölkəmizin ictimai-siyasi həyatında baş verən mühüm hadisələrlə, əlamətdar tarixi günlərlə bağlı "Səs" qəzeti tərəfindən ənənəvi olaraq dəyirmi masalar təşkil edilir. Budəfəki dəyirmi masanın da mövzusu Azərbaycan xalqının Ümummilli Lideri Heydər Əliyevin anadan olmasının 88-ci ildönümünə həsr olunmuşdur. Dəyirmi masada Prezident Administrasiyasının Beynəlxalq Əlaqələr şöbəsinin müdiri Novruz Məmmədov, Yeni Azərbaycan Partiyası İdarə Heyətinin üzvü, Bakı Dövlət Universitetinin professoru Şahlar Əsgərov, "Səs" qəzetinin baş redaktoru Bəhruz Quliyev, "Yeni Azərbaycan" qəzetinin baş redaktoru Hikmət Babaoğlu, Milli Məclisin üzvü, Şərqşünaslıq İnstitutunun direktoru Gövhər Baxşəliyeva, millət vəkili, "İrəli" İctimai Birliyinin sədri Ceyhun Osmanlı iştirak edirdi.

Dəyirmi masanı giriş sözü ilə açan "Səs" qəzetinin baş redaktoru Bəhruz Quliyev, ilk növbədə, qonaqlara bu dəyirmi masada iştiraklarına görə, kollektiv adından təşəkkürünü bildirdi. Dedi ki, "Səs" qəzeti ənənəvi olaraq, ən aktual məsələlərlə bağlı daim dəyirmi masalar keçirir. B.Quliyev bugünkü dəyirmi masanın Ulu Öndərimiz Heydər Əliyevin anadan olmasının 88-ci ildönümünə həsr olunduğunu qonaqların diqqətinə çatdırdı. Vurğuladı ki, bu dəyirmi masada iştirak etmək üçün dəvət olunanlar vaxtilə Ulu Öndərimiz Heydər Əliyevin dövlət quruculuğu missiyasını yerinə yetirərkən Onun yanında olan və böyük, əzəmətli işlərdə yaxından iştirak edən şəxslərdir. Baş redaktor Ulu Öndər Heydər Əliyevin müasir Azərbaycan dövlətinin banisi olmaqla yanaşı, Onun minilliklərlə zəngin olan Azərbaycan xalqının milli dəyərlərini özünə qaytardığını da diqqətə çatdırdı. "Azərbaycan xalqı Ümummilli Lider Heydər Əliyevə həmişə böyük sevgi və məhəbbətlə yanaşıb. Çünki Ulu Öndərimiz Heydər Əliyev xalqının, dövlətinin ən çətin anlarında Özünün zəngin siyasi təcrübəsini və möhkəm iradəsini nümayiş etdirərək, onu bütün bəlalardan xilas edib. Təsadüfi deyil ki, xalqımız Ulu Öndər Heydər Əliyevə böyük xilaskar kimi, dahi şəxsiyyət kimi ölməz məhəbbətlə yanaşır. Bu isə millətin öz Liderinə olan sonsuz sevgisindən və sədaqətindən irəli gəlir. Eyni zamanda, bu gün xalqımızın Ümummilli Lideri Heydər Əliyev siyasətinin ən layiqli davamçısı olan Prezident İlham Əliyev həyata keçirdiyi əzəmətli işlər, atmış olduğu uğurlu addımlar da xalqın Liderinə olan münasibətində bir daha özünü təzahür etdirir. Çünki Azərbaycan xalqı Ulu Öndər Heydər Əliyevə, bu gün isə Prezident İlham Əliyevə böyük sevgi ilə yanaşaraq, daim Yeni Azərbaycan Partiyasının həyata keçirdiyi siyasəti dəstəkləməklə öz gələcəyini sağlam və sarsılmaz prinsiplər üzərində görmək niyyətini ortaya qoymuş olur" deyən B.Quliyev dəyirmi masa iştirakçılarına Ulu Öndərimiz Heydər Əliyevin Azərbaycanın ictimai-siyasi və mədəni həyatında zəngin irsindən söhbət açmaqla oxuculara bir daha bu Dahi Şəxsiyyətin əzəmətinin çatdırılmasının vacibliyini vurğuladı.

Ümummilli Liderimiz Heydər Əliyevin qoyduğu təməl möhkəm, inamlı əllərdədir

"Səs" qəzetinin əməkdaşı:

- Novruz müəllim, Ulu Öndər Heydər Əliyev hər bir sahənin inkişafını elmi əsaslarla həyata keçirirdi. Bilmək istərdik ki, Ümummilli Liderimizin dövlət idarəçilik sistemi hansı prinsiplərə söykənirdi?

Novruz Məmmədov:

- Ümummilli Lider Heydər Əliyevin 1993-cü ildə hakimiyyətə gəlməsi Azərbaycan dövləti üçün əsl uğur oldu. Ulu Öndər Heydər Əliyev qurduğu Azərbaycan dövlətinin yaşaması, uğurla inkişaf etməsi üçün lazım olan bütün addımları atdı və bu yolda müvəffəqiyyət qazandı. Ulu Öndər Heydər Əliyev Azərbaycan xalqına bu dövləti qorumağı, yaşatmağı tapşırıb getdi. 1994-cü ildə sülh müqaviləsi çox ciddi məsələ idi. Bununla bağlı müxtəlif fikirlər söylənildi. 1994-cü ildən başlayaraq bizə qarşı olan dəstəyi də, hücumları da görürdük. O zaman çətin anlarda məhz Ulu Öndər Heydər Əliyev dühası lazım idi. Ümummilli Liderimiz Heydər Əliyev müdrikliklə, cəsarətlə bütün iradəsini ortaya qoyaraq, sentyabr ayında "Əsrin Müqaviləsi"nin imzalanmasını təsdiq etdi və bununla da hər şey həll olundu. Doğrudur, hər birimiz bilirdik ki, bundan sonra müxtəlif çətinliklər ortaya çıxacaq. Amma Ulu Öndər bu müqaviləni imzalayarkən dedi ki, nə olur-olsun, bu addımı atmalıyıq ki, ondan sonra ikinci addımı atmaq mümkün olsun. Başqa bir maraqlı məqam isə ondan ibarətdir ki, 1997-ci ilin yanvar ayının 13-də Ulu Öndər Heydər Əliyevin Fransaya səfəri oldu. O vaxtlar Ulu Öndərimiz Heydər Əliyevin iş proqramı hər zamankı kimi çox sıx olurdu. Hətta gecə saat 12-də belə iş rejimi bitməzdi. Ulu Öndər Heydər Əliyev Fransada səfərdə olan zaman ATƏT-in Minsk Qrupuna həmsədrlik məsələsi gündəmdə idi. Əgər həqiqətən də, Ulu Öndər Heydər Əliyev olmasaydı, ATƏT-in Minsk Qrupunun həmsədrləri də olmazdı və ümumiyyətlə, bu prosesi təşkil etməyə təşkilatçı da olmazdı. Ümummilli Lider Heydər Əliyev çox balanslaşdırılmış bir siyasət yürüdürdü və bütün addımlarını da cəsarətlə, mərdliklə atırdı. Əslində, ölkə başçısı üçün həyati problemlər çox mürəkkəb və böyük bir yük idi. Ulu Öndərimiz bütün işlərin öhdəsindən asanlıqla gəlirdi. Ölkəmizin, xalqımızın maraqlarını düşünür, onu təmin etməyi, qorumağı bacaran bir siyasətçi, əsl dahi, təkrarolunmaz bir şəxsiyyət idi. Onun dövründə paytaxtımızda, eləcə də, rayonlarımızda nə qədər quruculuq-abadlıq işləri aparılırdı. Ulu Öndərimiz Heydər Əliyevdən sonra baş verən ən mühüm, önəmli hadisələrdən biri də Prezident İlham Əliyevin hakimiyyətə gəlməsi oldu. Ümummilli Lider Heydər Əliyevin ideya və ideologiyasını Prezidentimiz İlham Əliyev bu gün çox məharətlə davam etdirir. Azərbaycana gələnlər burada baş verən hər şeyi bir möcüzə adlandırırlar. Bütöv, müstəqil, suveren məmləkətimiz olan Azərbaycanda nə qədər yeniliklər, proseslər gedir. Fəxrlə deyə bilərik ki, Ümummilli Liderimiz Heydər Əliyevin qoyduğu təməl möhkəm və inamlı əllərdədir. Bu isə çox vacib məsələdir. Doğrudur, müəyyən bir müddətə qədər Azərbaycana müəyyən dəstək olundu, amma artıq bu gün Azərbaycanın o dəstəyə ehtiyacı yoxdur. Xalqımız müdrik xalqdır və öz dövlətini qorumağı da yaxşı bacarır. Onu da qeyd edim ki, bu gün bir çoxları tərəfindən səsləndirilən ərəb dünyasında baş verən iğtişaşları biz 1990-cı illərdə yaşamışıq. Artıq belə bir hadisəni Azərbaycan dövləti heç vaxt yaşamayacaq, heç bunu təkrarlamağa da cəhd göstərməsinlər. Ulu Öndər Azərbaycanı əsl fəlakətdən xilas etdi. Prezident İlham Əliyev də bütün iradəsini ortaya qoyaraq, Azərbaycanı inamla sabaha aparır, bu yolda hər birimiz Ona dəstək olmalıyıq.

Ümummilli Liderimiz Heydər Əliyevin şah əsəri Yeni Azərbaycan Partiyası və qurduğu müstəqil Azərbaycan dövlətidir

Şahlar Əsgərov:

- Ulu Öndər Heydər Əliyev fəaliyyəti dövründə bir çox çətinliklərdən, sınaqlardan keçib. Ümummilli Liderimiz Heydər Əliyevin şah əsəri Yeni Azərbaycan Partiyası və qurduğu müstəqil Azərbaycan dövlətidir. Yeni Azərbaycan Partiyasının ilk təsis konfransı Naxçıvan MR-də keçirildi. Konfransa Bakıdan və bölgələrimizdən də xeyli insan getmişdi. Ulu Öndər konfransda Azərbaycan xalqına Yeni Azərbaycan Partiyasının yaranmasını bəyan etdi. Burada bir maraqlı məqamı da diqqətinizə çatdırım ki, həmin bəyanatda Ulu Öndər Heydər Əliyev mentalitet sözünü də işlətmişdi. Sonralar parlamentdə də bildirdim ki, bu sözü leksikonumuza Ümummilli Liderimiz Heydər Əliyev gətirib. Çünki 1992-ci ilin 20 noyabrından əvvəl heç kəs mentalitet sözünü işlətməmişdi. Heç dövrü mətbuatda da, bu sözə müraciət olunmurdu. Onu da vurğulayım ki, Ulu Öndərimiz Heydər Əliyevin YAP-a diqqət və qayğısı çox böyük idi. Ümummilli Lider Heydər Əliyevin partiyaya diqqət və qayğısı çox böyük idi. Hər ay idarə heyətini qəbul edərdi. Bu gün fəxr edirik ki, elə bir Liderimiz olub. Bir faktı da vurğulayım ki, o vaxt YAP yarananda, çox adamlar heç partiyanın adını da bilmirdilər. İnsanlar daha çox Ulu Öndər Heydər Əliyev partiyasına üzv olmaq istəyi ilə addım atırdılar.

"Səs" qəzetinin əməkdaşı:

- Hikmət müəllim, burada vurğulandı ki, Ulu Öndərimiz Heydər Əliyev həm də böyük bir müəllim idi. Bu gün Onun varislik prinsipi necə həyata keçirilir?

Ulu Öndər Heydər Əliyevin sayəsində Azərbaycanda azərbaycançılıq, Yeni Azərbaycan Partiyasının ideologiyası da mənimsənildi

Hikmət Babaoğlu:

- Ulu Öndər Heydər Əliyev siyasi və ideoloji varisliyi təmin etdi. Bu siyasi-ideoloji varislik isə, Azərbaycan dövlətçiliyinin ayaq üstə durmasını təmin etdi. Dövlətçiliyin qurulması, həqiqətən də, çox mürəkkəb və vacib bir prosesdir. İdeoloji təminatı isə bir o qədər vacibdir. Ən başlıcası isə o idi ki, Ulu Öndər Heydər Əliyev böyük təbliğatçı, müəllim idi. Ulu Öndər mühazirəni elə şəkildə oxuyurdu ki, auditoriyada iştirak edən hər bir dinləyici onu dərindən dərk edir, anlayırdı. 1995-ci ildə Azərbaycan Respublikasının Konstitusiyası qəbul olunarkən, azərbaycançılıqla bağlı çox qızğın müzakirələr gedirdi. Bu məsələ ilə bağlı Ulu Öndər Heydər Əliyev sonda Azərbaycan ziyalılarını, şairlərini yığdı və orada azərbaycançılığın nə olduğunu elə bir formada izah etdi ki, bütün müzakirələrə son qoyuldu. Hər kəs bir daha Ulu Öndərin dahi şəxsiyyət kimi istedadına heyran oldu. Ulu Öndər Heydər Əliyev məqsədyönlü şəkildə bu çıxışları təşkil edirdi. O, bir təbliğatçı idi. Onun sayəsində Azərbaycanda azərbaycançılıq, YAP-ın ideologiyası da mənimsənildi. Eyni zamanda, Ümummilli Lider Heydər Əliyev nəticə etibarı ilə Azərbaycan xalqının birliyini yaratdı. Ulu Öndər Heydər Əliyevin müəllim, təbliğatçı, siyasətçi kimi böyüklüyü, Dahiliyi ondan ibarət idi ki, çox qısa bir müddətdə bu prosesi başa çatdırdı. Azərbaycanın etnik ərazi vahidlərinə bölüşdürülməsinin qarşısını aldı. Çevik, seçilmiş üsullarla Dahi Öndər Heydər Əliyev bütün çətinliklərin öhdəsindən mərdliklə gəldi. Əslində, Prezident kürsüsü Ulu Öndər Heydər Əliyev üçün vəzifə deyildi. Bunların hamısı Dahi Öndərimiz üçün Azərbaycan xalqının maraqlarını təmin etmək yönümündə bir vasitə idi. Bu vasitələrdən istifadə edərək xalqımızın, dövlətimizin müstəqil, demokratik gələcəyini qurdu. Çünki Ulu Öndər Heydər Əliyev böyük Azərbaycan dövlətçiliyinin, xalqımızın birləşməsinin mücahidi idi.

Ulu Öndərin - Heydər Əliyevin sayəsində bütün fəlakətlərdən qurtulduq, ölkəmiz müsbət istiqamətdə inkişaf etməyə başladı.

Gövhər Baxşəliyeva:

- Ulu Öndər Heydər Əliyev haqqında çox danışmaq olar. Çünki Onun Azərbaycan dövləti üçün xeyirli, gərəkli əməlləri həddindən artıq çox olub. Bir elmi işçi, alim kimi hesab edirəm ki, Ulu Öndərimiz Heydər Əliyevin çoxşaxəli fəaliyyətinin müxtəlif istiqamətləri bu gün artıq monoqrafik bir tədqiqat obyektinə çevrilməlidir. Ulu Öndər Heydər Əliyev elə bir dövrdə hakimiyyətə gəldi ki, xalqımız çox pis vəziyyətdə idi. Ölkəmizə yadelli düşmən hücumlar edirdi, yeni-yeni torpaqlarımız işğal olunurdu, insanların sabaha ümidi azalırdı, tam məyusluq hökm sürürdü. Ümummilli Liderimiz Heydər Əliyevin hakimiyyətə gəlişi ilə bütün bu xaosa, dərəbəyliyə, özbaşınalığa, məğlubiyyətə, acınacaqlı günlərə birdəfəlik son qoyuldu. Artıq insanlar sabaha inamla, ümidlə baxmağa başladılar. Bu gün hər kəs bilir ki, biz azərbaycanlılar məhz bu dahi şəxsiyyətin, Ulu Öndərin sayəsində bütün bu fəlakətlərdən qurtulduq, ölkəmiz müsbət istiqamətdə inkişaf etməyə başladı.

Yaxşı azərbaycanlı

olmaq istəyən şəxs "məhz Ulu Öndər Heydər Əliyev kimi olmalıyam" ifadəsini işlədir

Ceyhun Osmanlı:

- Tarixi şəxsiyyətlərin yetərincə təhlil oluna bilməsi üçün zaman da önəmli faktordur. Ümummilli Liderimiz Heydər Əliyevin fəaliyyəti, gördüyü işlər bu gün hər kəsə açıq-aşkar şəkildə bəllidir. Ona görə də, bu gün Ulu Öndər Heydər Əliyevin ən layiqli davamçısı olan Prezident İlham Əliyevi bütün gənclərimiz dəstəkləməlidir. Çünki anlamalıyıq ki, bu gün regionda, doğrudan da, müstəqil, demokratik bir dövlətik. Bu günün reallığına baxsaq, çox yaxşı görərik ki, Azərbaycanın bütün sərvətləri var və dövlətimiz onu düşündürən məsələlərlə qarşı-qarşıyadır. Bu gün dünya enerji təhlükəsizliyini müzakirə edir. Azərbaycan isə zəruri olan təbii sərvətlərlə zəngindir. Yəni bütün bu məqamları nəzərə alsaq, Azərbaycan dünyanın ən çətin regionunda yerləşir. Belə bir regionda müstəqil siyasət yürütmək, təbii ki, çox çətindir. Biz öz ölkəmizin Lideri olan Prezidentimiz İlham Əliyevi müdafiə etməli, dəstəkləməliyik. Çünki Prezident İlham Əliyevin Azərbaycanın bütün hədəflərini aydın şəkildə bilən bir siyasətə malik olduğunu bilirik. Böyük bir gənc nəsil yetişir və hər bir gənc ölkəsində baş verən proseslərin fərqində olmalıdır. Hər bir gəncimiz rasional düşüncəyə sahib olsa, hər bir addımını məntiqlə atsa, əlbəttə ki, bütövlükdə Azərbaycan cəmiyyəti elmə əsaslanan şüurlu bir cəmiyyət kimi daim inkişaf edəcəkdir. Bu baxımdan bu proseslərdə hər birimiz öz üzərimizə düşən əməlləri etməliyik. Yaxşı azərbaycanlı olmaq istəyən şəxs "məhz Ulu Öndər Heydər Əliyev kimi olmalıyam" ifadəsini işlədir.

Aylana Rzayeva,

Tapdıq Qurbanlı

Səs.- 2011.- 6 may.- S. 8-9.