"Səs" qəzeti ulu öndər Heydər Əliyevin anadan olmasının 88-ci ildönümü münasibətilə xüsusi buraxılış çap edib

Xalqımız müstəqil Azərbaycanın qurucusu, xalqımızın ümummilli lideri Heydər Əliyevin anadan olmasının 88-ci ildönümünü böyük təntənələrlə qeyd edir. "Əlincə" Azərbaycan Xeyriyyə Cəmiyyətinin orqanı olan "Səs" qəzeti də ulu öndərin doğum gününə həsr olunmuş xüsusi buraxılış çap edib. Üz qabığında ulu öndərin "Biz Azərbaycanda demokratik, müstəqil respublika quraraq sivilizasiyalı cəmiyyət uğrunda mübarizə aparıb dünyəvi, bəşəri dəyərlərin hamısından istifadə etməliyik. Biz çalışamlıyıq ki, Azərbaycan uzun illərdən, əsrlərdən sonra ilk dəfə müstəqilliyini alaraq bütün dünyaya öz tarixi nailiyyətlərini, öz milli ənənələrini nümayiş etdirə bilsin. Azərbaycan xalqının bu barədə həm tarixi, həm də müasir potensialı olduqca böyükdür. Bunların hamısından səmərəli istifadə olunarsa, Azərbaycan həm tam müstəqil, demokratik dövlət olacaq, həm də bizim cəmiyyətimiz tam demokratik, hüquqi, ümumbəşər dəyərlər əsasında qurulan demokratik bir cəmiyyət olacaq" kəlmələri ilə başlayan xüsusi jurnalda Heydər Əliyevin həyat və fəaliyyətindən ətraflı şəkildə bəhs olunub.

Buraxılışın ilk səhifələrində Corc Buş, Vladimir Putin, Toni Bleyer, Jak Şirak, Nursultan Nazarbayev, Rəcəb Tayyib Ərdoğan, Kraliça II Elizabet, Seyid Məhəmməd Hatəmi, Georgi Pirvanov, İslam Kərimov, Gerhard Şröder, Xu Szinto, II İohan Pavel, Abdullah Gül, Çingiz Aytmatov, Butros-Butros Qali, Tim Eqqar, Nikolay Baybakov kimi dünyaca məşhur siyasi xadimlərin, dövlət rəhbərlərinin, ziyalıların Heydər Əliyev haqqında dedikləri fikriləri, təəssüratları dərc olunub. Jurnalda eyni zamanda ümummilli liderin həyatı, ailəsi, dövlətçilik, idarəçilik siyasəti ilə bağlı yazılar da yer alıb. Bundan başqa "Vətənindən-Azərbaycandan ayrı düşmüş Naxçıvanda" başlıqlı yazıda ulu öndərin Kremldən Bakıya gəlişindən 2 gün sonra 1990-cı ilin 22 iyul tarixində Naxçıvana pənah aparması, Azərbaycanın qurtuluş mübarizəsinə başlaması, sonra xalqın tələbi ilə Naxçıvan Muxtar Respublikasının Ali Məclisinin sədri seçilməsi qeyd olunub. Xüsusi buraxılışda həmçinin hakim Yeni Azərbaycan Partiyasının qurulması, onun həmin illərdə cəmiyyətdə yaratdığı böyük rezonans, onun bu günün və gələcəyin partiyasına çevilməsi geniş yer alıb. Qeyd edək ki, xüsusi nömrə ulu öndərlə bağlı çoxsaylı fotolarla zəngindir.

Səs.- 2011.- 11 may.- S. 10.