Azərbaycanda "Turizm ili" elan edilməsi ölkəni perspektivli məkana çevirir

Son illər respublikamızda turizm sahəsində dövlət siyasəti uğurla həyata keçir. Ölkəmizin mövcud turizm potensialının beynəlxalq aləmdə tanınması, turistlərin Azərbaycana çoxsaylı səfərlərinin təşkili, turizmin müxtəlif növlərinin inkişaf etdirilməsi istiqamətində işlər görülməkdədir. Azərbaycanda turizmin inkişafı ölkə Prezidentinin daim diqqət mərkəzindədir.

Prezident İlham Əliyevin Sərəncamına əsasən, "Azərbaycan Respublikasında 2010-2014-cü illərdə turizmin inkişafına dair Dövlət Proqramı" turizmin inkişafına geniş meydanlar açır. Proqramda turizmin qeyri-neft sektorunun inkişaf etmiş aparıcı sahələrindən birinə çevirmək əsas vəzifələrdən biri olaraq qarşıya qoyulur. Son illərdə Azərbaycanda turizmin ölkə iqtisadiyyatının mühüm hissəsinə çevrilməsi, bu sahədə kiçik və orta sahibkarlıq üçün möhkəm bazanın yaradılması regionların infrastruktur cəhətdən də inkişafını təmin edir. Digər tərəfdən, ölkəmizin malik olduğu təbii sərvətlər, tarixi abidələr Azərbaycana turist axınını şərtləndirən mühüm amillərdir. Ölkəmizdə turizmin inkişaf etdirilməsində bu sahədə dünyanın qabaqcıl ölkələrinin təcrübəsindən istifadə edilir. Azərbaycan turizmin təşkili ilə bağlı müxtəlif layihələrin icrasına əlverişli məkandır. Belə ki, təbii zənginliklərlə əhatə olunan ölkəmizdə yeni, müasir mehmanxanalar şəbəkəsinin yaradılması da Azərbaycana turist axınını sürətləndirir.

Qeyd edək ki, turizmin inkişafına müstəqillik qazanıldıqdan sonra imkanlar açıldı. Hələ 2001-ci ildə Ümummilli Lider Heydər Əliyev ölkəmizin turizm potensialının iqtisadi-sosial həyatımızdakı rolunu dəyərləndirərək, bu sahədə əhəmiyyətli qərarlar qəbul etmişdir.Hüquqi-normativ aktların qəbul edilməsi çərçivəsində "Azərbaycan Respublikasında turizmin inkişafına dair 2002-2005-ci illər üçün" Dövlət Proqramı bu istiqamətdə görülən işlər sırasındadır. Qeyd olunan Proqramın tələblərinə uyğun olaraq, turizm sahəsində beynəlxalq standartlara cavab verən mehmanxanalar tikilmiş, ölkəyə bir sıra aparıcı beynəlxalq investisiya şirkətləri cəlb olunmuş, respublikamıza gələn turistlərin sayı ildən-ilə artmışdır.

2002-ci ilin aprel ayından başlayaraq hər il ölkəmizdə "AİTF" Beynəlxalq Turizm Sərgisi keçirilir. Bu sərgidə iştirak edən xarici ölkələrin turizm şirkətlərinin sayı ildən-ilə artır. Prezident İlham Əliyevin Sərəncamı ilə 2011-ci ilin Azərbaycanda "Turizm ili" elan edilməsi bu sahənin daha da inkişaf etdirilməsi istiqamətində mühüm addım oldu. Kifayət qədər turizm potensialı olan Azərbaycan bu sahədə dünyanın aparıcı ölkələri ilə rəqabətə girməyə və öz imkanlarını nümayiş etdirməyə qadirdir. Artıq beynəlxalq tədbirlərin keçirildiyi məkana çevrilən Azərbaycanda turizm sərgilərinin təşkili bu sahəyə olan marağın göstəricisidir. Belə sərgilər, həm də ölkəmizin turizm imkanlarının nümayiş etdirilməsi üçün əlverişli imkanlar yaradır. Bu ilin "Turizm ili" elan edilməsi Azərbaycanı perspektivli turizm ölkəsinə çevirir, bu sahəyə maraq və diqqət ilbəil artır. Azərbaycanda növbəti dəfə keçirilən 10-cu Azərbaycan Beynəlxalq Turizm və Səyahətlər, 2-ci Ümumrespublika Daxili Turizm Sərgiləri buna əyani subut oldu. Belə ki, dünyanın 24 ölkəsindən 230 şirkətin təmsil olunduğu sərgi Azərbaycanın turizm sektoruna öz töhfələrini verəcək. Bu günə qədər keçirilən sərgilərlə müqayisədə biz bunun şahidinə çevrilirik. Azərbaycanın uğurlu iqtisadi inkişafı, dayanıqlı sabitlik respublikamıza turist axınını şərtləndirən əsas amillərdəndir. Azərbaycanın coğrafi baxımdan əlverişli məkanda yerləşməsi, flora və fauna növlərinin müxtəlifliyi ölkəmizin turizm imkanlarını daha da artırır. İlbəil sərgidə iştirakçıların say çoxluğunun mövcudluğu bu tədbirə beynəlxalq səviyyədə yaranan marağın təzahürüdür. İlk dəfə keçirilən Azərbaycan Beynəlxalq Turizm və Səyahətlər Sərgisində 5 ölkədən 26 şirkət iştirak edirdisə, indi onların sayı xeyli artmışdır. Ötən illər ərzində sərgiyə təxminən 900-ə yaxın şirkət qatılmışdır. 2007-ci ildə ölkələrin sayı 18-ə şirkətlərin sayı isə 60-a çatmışdır. Bu statistika ilbəil ölkə turizminə beynəlxalq məkanda diqqətin artdığını göstərir.

Qeyd edək ki, beynəlxalq sərgi ilə yanaşı 2-ci Ümumrespublika Daxili Turizm Sərgisi də öz zənginliyi ilə diqqəti cəlb etdi. Azərbaycanın 15 rayonundan 83 turizm subyekti iştirak edirdi. 10-cu Azərbaycan Beynəlxalq Turizm və Səyahətlər, 2-ci Ümumrespublika Daxili Turizm Sərgiləri sübut etdi ki, Azərbaycanda turizm sahəsi inkişafdadır. Bu sərginin "Turizm ili" ndə keçiriləməsi əlamətdar hadisəyə çevrildi.

Ölkədə mövcud olan dinamik inkişafın nəticəsidir ki, Azərbaycan bölgələrinin turizm imkanları genişlənir. Statistikaya nəzər salsaq, deyə bilərik ki, ötən il Azərbaycana 1 milyon 962 min 906 nəfər gəlmişdir ki, onlardan da 1 milyon 494 min 725 nəfəri turistlərdir. Bu göstərici artıq inkişafın və Azərbaycan olan diqqətin əsas və danılmaz nümunəsidir.

NƏZAKƏT

Səs.- 2011.- 12 may.- S. 11.