İsmayıllı - Azərbaycanın Sənətkarlıq Paytaxtı - 2011

Azərbaycanın qeyri-maddi mədəni irsinin qorunması, o cümlədən, milli sənətkarlığın (dekorativ, tətbiqi və təsviri sənət) dəstəklənməsinə istiqamətləndirilmiş “2010-2014-cü illər üçün Xalq Yaradıcılığı Paytaxtları” Proqrammı çərçivəsində sənətkarlar məskəni olan İsmayıllı şəhəri 2011-ci il üçün “Azərbaycanın Sənətkarlıq Paytaxtı” elan olunmuşdur. Təsdiq edilmiş illik tədbirlər planında təntənəli mərasimlərin, respublika və beynəlxalq səviyyəli elmi-praktiki konfransların, dəyirmi masaların, konsertlərin, müsabiqələrin, festivalların, sərgilərin, yarmarkaların, info-turların və sair tədbirlərin təşkili nəzərdə tutulmuşdur ki, bunlar da yüksək səviyyədə həyata keçirilir.

Mədəniyyət və Turizm Nazirliyindən verilən məlumata görə, 3 mart - Bakı şəhəri Muzey Mərkəzində mədəniyyət və turizm naziri Əbülfəs Qarayev tərəfindən 2011-ci il üçün İsmayıllının “Azərbaycanın Sənətkarlıq Paytaxtı” seçilməsi ilə əlaqədar hazırlanmış xatirə kuboku və diplom İsmayıllı rayon rəhbərliyinə təqdim olunmuşdur.

16 - 19 mart - Bakı və İsmayıllıda keçirilən Novruz bayramında folklor kollektivləri çıxış etmiş və sənətkarların əl işlərindən ibarət sərgi təşkil olunmuşdur.

7 aprel - İsmayıllıda Uşaq Yaradıcılıq Mərkəzində geniş ictimaiyyətin iştirakı ilə kubok və diplomun təqdimetmə mərasimi keçirilmişdir.

1-30 aprel - “İsmayıllı - Azərbaycanın Sənətkarlıq Paytaxtı - 2011” və “Turizm ili” çərçivəsində məktəblilər arasında inşa yazı müsabiqəsi keçirilmiş, 10 nəfər diplom və mükafata layiq görülmüşdür. 2 iyun - rayon Mədəniyyət Evində “İsmayıllı sənətkarlıq paytaxtıdır” mövzusunda mədəni-maarif müəssisələri ilə birgə seminar keçirilmişdir.14-18 iyun - Bakı şəhərində “Azərbaycan - doğma diyar” devizi altında keçirilmiş Azərbaycanda yaşayan milli azlıqların incəsənəti festivalında Lahıc və İvanovka folklor kollektivləri iştirak etmiş, İvanovka folklor kollektivinə “Xalq kollektivi” adı verilmişdir. 21 iyun - Azərbaycan Respublikasının Mədəniyyət və Turizm Nazirliyinin Mədəniyyətşünaslıq üzrə Elmi-Metodiki Mərkəzinin dəstəyi ilə rayonun Heydər Əliyev adına Mərkəzi Meydanında xalq sənətkarlarının əl işlərindən ibarət zona sərgisi keçirilmişdir. Sərgidə İsmayıllı, Qəbələ, Oğuz, Şəki və Şamaxı şəhərlərinin sənətkarlarının əl işləri nümayiş etdirilmişdir. Sərginin davamı olaraq Heydər Əliyev Mərkəzində dəyirmi masa təşkil olunmuşdur. Sərgidə nümayiş olunan müxtəlif sənətkarlıq növlərinə baxış keçirilmiş, 23 nəfər sənətkara Fəxri Fərman, 8 nəfər sənətkara isə pul mükafatı təqdim olunmuşdur. Tədbir İsmayıllı rayonunun Qalacıq kəndində “Ləzgi” folklor qrupunun çıxışı ilə davam etmiş, daha sonra həmin kənddə yaşayan sənətkarların da əl işləri nümayiş olunmuş, diplom və müvafiq pul mükafatları təqdim edilmişdir.

Avqust - sentyabr aylarında - Aşıq Yanvar Bədəlov, Aşıq Elman Mehdiyev və rayonun digər aşıqlarının iştirakı ilə rayon Mədəniyyət Evində, Lahıc və Basqal qəsəbələrində, İsmayıllı, Diyallı, Qalagah kənd mədəniyyət evlərində və Qalacıq kənd klubunda mütəmadi olaraq görüşlər keçirilmiş və konsert proqramı təşkil olunmuşdur.

12 avqust - rayon mərkəzində sənətkarların əl işlərindən ibarət sərgi və satış yarmarkası keçirilmişdir. 17 avqust - Heydər Əliyev adına mədəniyyət və istirahət parkında İctimai Televiziyanın “Yeni gün” proqramı 3 saatlıq canlı yayımla nümayiş olunmuşdur. Verilişdə sənətkarların əl işləri nümayiş olunmuş, rayonumuzun bütün sahələri, o cümlədən, turizm imkanları barədə məlumat verilmişdir. Proqramda rayonun tanınmış müğənniləri, aşıqları ilə yanaşı Nadir Qafarzadə, Elnur Balabəyov, muğam müsabiqəsinin qalibi Babək Niftəliyev də çıxış etmişlər. Rayonumuzun tanınmış ziyalılarından Baba Vəziroğlu, Musa Yaqub, Pünhan İsmayıllı və digər tanınmış şəxslər rayon haqqında öz fikirlərini söyləmişlər. 2 sentyabr - Qala divarları qarşısında geniş ictimaiyyətin iştirakı ilə xalq yaradıcılığının, milli adət və ənənələrin, xalq tətbiqi sənətinin, eyni zamanda, regionların turizm potensialının beynəlxalq səviyyədə tanıdılması məqsədilə təşkil olunmuş “Sənətkarlar bayramı”nda İsmayıllı ilə yanaşı, Şamaxı, Ağsu, Göyçay, Qəbələ, Oğuz, Şəki və Mingəçevir rayonlarından da dəvət olunmuş sənətkarlar və qonaqlar iştirak etmişlər. “Sənətkarlar bayramı”nın keçirilməsi rayonumuzla yanaşı, qonşu rayonların da sənətkarlıq baxımından inkişaf etdirilməsi istiqamətində mühüm rol oynayır.

Tədbirdə, həmçinin, mədəniyyət və turizm nazirinin müavini Vaqif Əliyev, Milli Məclisin deputatı Novruzəli Aslanov və digər rəsmi şəxslər iştirak etmişlər.

Tədbirdən əvvəl mərasim iştirakçıları və dəvət olunmuş qonaqlar Ümummilli Lider Heydər Əliyevin abidəsi önünə gül qoyaraq Heydər Əliyev Mərkəzi ilə tanış olmuşlar. Mərkəzin qarşısında təşkil olunmuş kitab və turizm sərgisi, Heydər Əliyev Mərkəzinin dərnəkləri tərəfindən hazırlanmış rəsm və digər eksponatlar nümayiş etdirilmişdir.

Qala divarları qarşısında təşkil olunmuş tədbir İsmayıllı rayon Mədəniyyət və Turizm Şöbəsinin müdiri A.Abbasov tərəfindən açıq elan edildi. Sonra rayon icra hakimiyyətinin başçısı N.Ələkbərov, Mədəniyyət və Turizm Nazirinin I müavini V.Əliyev və digər rayonlardan dəvət olunmuş qonaqlar tədbir haqqında öz fikirlərini söylədilər. Tədbirdə sənətkarların əl işlərinin və milli mətbəx nümunələrinin nümayişi ilə yanaşı folklor qrupları, aşıqlar, rayon Mədəniyyət evinin “Niyal” instrumental ansamblının və digər rayonlardan dəvət olunmuş müğənnilərin çıxışları səsləndirilib.

İlboyu keçirilən tədbirlər nəinki İsmayıllı rayonunun, ümumilikdə Azərbaycanın qeyri-maddi mədəni irsinin dünyada tanıdılmasında mühüm rol oynayır. Bu layihə Azərbaycanın çoxəsrlik mədəniyyətinin, qeyri-maddi mədəni irs nümunələrinin, sənətkarlığının, tarixinin qorunmasına xidmət edir.

Dövlət Müstəqilliyinin bərpasının 20-ci ildönümü ilə əlaqədar keçirilmiş rayon tədbirlərində sənətkarların əl işlərindən ibarət geniş sərgi təşkil olunmuşdur.

Mütəmadi olaraq rayon mərkəzində və Lahıc qəsəbəsində sənətkarların əl işlərinin sərgisi təşkil olunaraq rayonumuza gələn yerli və xarici turistlərə nümayiş etdirilir.

Zümrüd

Səs.- 2011.- 3 noyabr.- S. 12.