Zaman və
məkana sığışmayan Azərbaycan-Türkiyə dostluğu
Beynəlxalq münasibətlərdə hər
hansı bir faktı və ya həqiqəti başa
düşmək üçün onun tarixini doğru mənbələrə
əsaslanaraq, araşdırmaq lazımdır. Yalnız bu yolla
müzakirə edilən məsələ barədə əsl
həqiqəti və onun mahiyyətini anlamaq mümkün ola
bilər. Bu fakt və ya reallığın mahiyyəti
başa düşüldükdən sonra onunla bağlı
obyektiv analizlər edilə, rasional düşüncələr
ortaya qoyula və düşünülmüş addımlar
atıla bilər. Zənnimcə, Türkiyə-Azərbaycan əlaqələrini
də bu müstəvidə dəyərləndirmək daha
düzgün olar. Müzakirə obyekti olan əlaqələrin
tarixinin, əhatə dairəsinin, mahiyyətinin
araşdırılması və ya başa düşülməsinin
həyatımızın bütün sahələrində iki
ölkə arasındakı münasibətlər
üçün bir mayak olacağını
düşünürəm.
İlk öncə bir məsələyə daha
çox diqqəti cəlb etmək istəyirəm. Belə ki,
Türkiyə-Azərbaycan əlaqələri hər hansı
iki dövlət münasibətlərindən daha fərqlidir.
Xüsusilə,
milli özünəməxsusluqlar
baxımından məsələyə yanaşdıqda,
görərik ki, iki
ölkə oxşar deyil,
eyni milli xüsusiyyətlərə
sahibdir, bu əlaqələr
beynəlxalq platformada özünəməxsus
xüsusiyyətlərə malikdir və o, klassik realizmdə olduğu kimi, mənfəət
məqsədi
daşımır. Ona görə də iki ölkə arasındakı münasibətlərin
mövsümi konyukturaların təsirinə
məruz qalması düşünülməməlidir.
Azərbaycan 1991-ci ildə müstəqilliyini əldə
etdikdən sonra onu ilk tanıyan dövlətin Türkiyə
olması, iki ölkə arasında imzalanan önəmli anlaşmalar,
Azərbaycanın Türkiyəyə, Türkiyənin də
Azərbaycana qoyduğu önəmli sərmayələr
də iki ölkə arasındakı
yaxınlığın nümunəsi kimi
dəyərləndirilməlidir.
Müasir beynəlxalq
sistemin təməllərinin
atıldığı XX əsrin əvvəllərinə ekskursiya etsək, yenə bölgədə Azərbaycan
və Türkiyə arasındakı təbii
yaxınlığın şahidi
olacağıq. Hətta bu əməkdaşlığa
Gürcüstanın da daxil
olduğunu görürük.
Yəni bölgədə həyata keçirilən bütün böyük
layihələr Azərbaycan, Türkiyə və Gürcüstan arasında olan
əməkdaşlığın nəticəsi olaraq meydana
çıxıb. Bu üçtərəfli
əməkdaşlığın kökü,
əslində, XX əsrin əvvəllərinə gedib çıxır. Ermənistan o vaxt qonşulara
qarşı əsassız iddiaları səbəbindən özünü təcrid etmişdi.
Ermənistan o vaxt da indiki
kimi “böyük Ermənistan”
iddiaları ilə yaşayırdı, indi
də, o vaxt da bölgədə təhlükə
qaynağı idi, indi
də. Yəni üstündən illər ötməsindən
sonra belə Ermənistanda dəyişiklik
yoxdur və vəziyyət belə davam edəcəyi halda,
ondan bunu gözləmək
da mənasızdır. Ermənistan siyasi səhnəyə çıxan gündən
uydurmalarla yaşayır. Ermənistan bir dövlət kimi öz siyasətini gözdən keçirərək,
əsil həqiqəti qəbul etmək səviyyəsinə
çatmayıb. Beynəlxalq əlaqələrdə də heç bir dövlətin
“ərköyün uşaq
toxunulmazlığı” yoxdur və
olmamalıdır. Bunun belə başa düşülməsi beynəlxalq hüququn möhkəmlənməsinə xidmət
edər.
Azərbaycanla Türkiyə
arasındakı münasibətlər keyfiyyətcə yeni mərhələyə qədəm qoyur. Bəli, “Azərbaycan
Respublikası və Türkiyə Cümhuriyyəti
arasında yüksək səviyyəli Strateji
Əməkdaşlıq Şurasının qurulması
haqqında Birgə Bəyannamə”nin imzalanması ilə
ölkələr arasındakı münasibətlər keyfiyyətcə
yeni mərhələyə qədəm qoyub.
Qeyd edək ki, tarixin müxtəlif
dönəmlərində olduğu kimi, son zamanlar
da bəzi güclər Azərbaycan ilə
Türkiyə arasında nifaq toxumu salmağa
hesablanmış addımlar atmağa
çalışıblar. Daha doğrusu, dünyanı idarə
edən bəzi qlobal güclər və
onların əlaltıları özlərinin milli
və transmilli maraqlarını
reallaşdırmaq naminə dağıdıcı siyasi aktlar gerçəkləşdirməklə
iki qardaş ölkənin
münasibətlərinə sarsıdıcı zərbə
endirmək cəhdində olublar. Məsələn, Türkiyə ilə Ermənistan
arasında “Sürix protokolları”nın
imzalanmasına cəhd etməklə nəhəng güclər
Cənubi Qafqazda yeni geosiyasi xəritə yaratmağa
meyil ediblər.
İşğalçı Ermənistanın blokadadan
çıxması məqsədini də ehtiva
edən bu protokol Azərbaycan-Türkiyə
münasibətlərinin ruhuna zidd prinsipləri daşımaqla bərabər,
iki ölkə arasındakı tarixi təməllərin sarsılması mənasına
gəlirdi.
Amma
Azərbaycanın praqmatik siyasi-strateji
kursuna paralel olaraq, Türkiyə özünün
və ən yaxın tərəfdaşının milli maraqlarını zərbə altına qoymayaraq protokolların imzalanmasından imtina etməklə növbəti dəfə dünyaya sarsılmaz qardaşlıq əlaqələrinin
əbədiliyini sübut etdi. Ankara birmənalı şəkildə bəyan
etdi ki, qardaş ölkə Azərbaycanın ərazi
bütövlüyü bərpa
olunmadan-Ermənistanın işğalına son
qoyulmadan sərhədlərin
açılması baş tuta bilməz. Bundan başqa, Qərbin və onun
tərəfdaş aktorlarının təxribat xarakterli addımları da
Bakı ilə Ankara arasında əlaqələrin
əsaslarını sarsıda bilmədi. Bu
da növbəti dəfə o təsdiq etdi ki, ən güclü tendensiyalar belə Azərbaycan-Türkiyə
münasibətləri kimi ali
dəyərlərə söykənən möhkəm birliyi sıradan çıxara bilməz...
Ümumiyyətlə, proseslər
göstərir ki, Azərbaycan və
Türkiyə strateji mənada bir-birini tamamlayan vahidin ayrılmaz hissələri kimidirlər. Təsadüfi deyil ki, dünyanın aparıcı strateji araşdırma mərkəzləri və
nüfuzlu analitikləri də o qənaətdədirlər ki,
Azərbaycan və Türkiyə dünyada
keyfiyyətcə ən sıx və möhkəm münasibətlərə
malik olan iki ölkədir. Dil,
din, mədəniyyət faktorunu
kənara qoysaq belə, siyasi-strateji
mənada hər iki ölkə bir-biri üçün zəruri
tərəfdaş önəmi kəsb edir.
Türkiyə üçün Azərbaycanın
önəmi bir neçə mənada xüsusi mahiyyət daşıyır.
Əvvəla, Cənubi
Qafqazın ağır çəkili gücü
olan Azərbaycan Türkiyə üçün bölgəyə giriş və orada
möhkəmlənməyin başlıca təminatçısıdır.
Yəni, Cənubi Qafqazda geniş,
əhatəli əməkdaşlıqlar mühiti
formalaşdırmaq və uzunmüddətli perspektivdə
sürdürmək üçün Azərbaycan-Türkiyə
işbirliyi xüsusi
önəm kəsb edir.
Müxtəlif xarakterli
layihələrin reallaşdırılması və bu layihələr çərçivəsində
strateji üstünlüklərin əldə
edilməsi rəsmi Ankara üçün
xüsusi avantaj deməkdir.
Bakı-Tbilisi-Ceyhan, Bakı-Tbilisi-Ərzurum və
Bakı-Tbilisi-Qars kimi layihələr ərsəyə
gələn zaman sərgilənən strateji tərəfdaşlıq-işbirliyi
nümunələri deyilənləri əsaslandıran bariz arqumentdir;
İkincisi, Şərqlə
Qərbin qovşağında yerləşən Azərbaycan
önəmli tranzit məntəqə-məkan
kimi strateji
açılımlar baxımından əvəzedilməz
mövqeyə malikdir. Çünki
Asiyadan-Avropaya uzanmaq üçün Azərbaycan amili
birmənalı zəruridir. Bu, istər
müxtəlif enerji layihələrinin
reallaşdırılması zamanı, istərsə də regional əməkdaşlıqlar zamanı özünü daha
qabarıq şəkildə büruzə verir;
Üçüncüsü,
Azərbaycan və Türkiyə daim beynəlxalq
arenada bir-birilərinə qarşı “dual dövlət” mövqeyində
çıxış edirlər. İstər BMT çərçivəsində,
istər çoxtərəfli münasibətlər
formatında, istərsə də qlobal
miqyaslı digər münasibətlər fonunda
Bakı və Ankara mütəmadi qaydada bir-birilərini dəstəkləməkdədirlər.
Bu da, heç
şübhəsiz, qarşılıqlı, səmimi,
faydalı və uzlaşdırılmış münasibətləri
daha da möhkəmləndirən
amildir.
Əlbəttə, Türkiyənin
Azərbaycana qarşı daha həssaslıqla
yanaşmasını şərtləndirən fundamental
faktorların sayını istənilən qədər
artırmaq olar. Amma hər
halda, bunlar ona dəlalət edir ki, Azərbaycan Türkiyənin xarici siyasət strategiyasının
başlıca nəzərə alınan tərəfdaşlarındandır.
Eləcə də, Türkiyə Azərbaycan üçün
zəruri strateji önəmə malik tərəfdaşdır. Regionda sülh
və sabitliyin təmin olunması, imperialist güclərin dağıdıcı
fəaliyyətinin neytrallaşdırılması, bölgədə
yeni əməkdaşlıq
platformalarının yaradılması, yeni
enerji coğrafiyası və xəritəsinin
formalaşdırılması, qlobal miqyasda milli və transmilli maraqların müdafiəsi mənasında
Ankara Bakı üçün
xüsusi önəmə malikdir.
Beləliklə də, ölkələr
arasında yüksək səviyyəli Strateji
Əməkdaşlıq Şurasının qurulması
haqqında bəyannamənin imzalanması ona
dəlalət edir ki,
Bakı-Ankara münasibətlərində yeni
keyfiyyət dəyişiklikləri baş
tutacaq. Belə ki, siyasi, iqtisadi, hərbi, mədəni-ideoloji
və digər sahələrdə daha geniş, əhatəli birgə
addımların atılması üçün
yeni imkanlar yaranacaq.
Prezident İlham Əliyev bununla
bağlı bildirib ki,
iki ölkə arasında imzalanmış
bu sənəd strateji
əhəmiyyət daşıyır və tərəflərin
tam şəkildə müttəfiqliyini nümayiş etdirir: “Bu gün həqiqətən
tarixi bir gündür və belə bir
gündə bərabər olmağımızdan çox məmnunam. Əminəm ki, bu gün
Türkiyə və Azərbaycan arasında imzalanmış tarixi sənəd hər iki
ölkənin münasibətlərinin gələcək
inkişafını təmin edəcək. Qeyd etdiyiniz kimi, bizim xalqlar
arasında əsrlər boyu dostluq, qardaşlıq münasibətləri mövcuddur. Bu əlaqələr
bu gün zənginləşir
və yeni səviyyəyə qalxır. Bu münasibətlər, əslində, iki ölkə arasında olan
əlaqələrin təməlidir. Möhkəm təməl
üzərində biz bu
əlaqələri qururuq. Azərbaycan
dövlət müstəqilliyini bərpa etdikdən sonra Türkiyə ilə münasibətləri
daim inkişaf edir və bu gün bu əlaqələr
müttəfiqlik səviyyəsinə qalxır”.
Türkiyənin
baş naziri Rəcəb
Tayyib Ərdoğan isə, öz növbəsində, onu
vurğulayıb ki, imzalanmış sənəd
Azərbaycan xalqının Ümummilli Lideri Heydər Əliyevin dövründən
başlanmış bir işdir
və bu gün həmin
təşəbbüsün yekunu əldə
edilib: “Yaradılacaq alt komissiyalar münasibətlərimizin
istənilən sahədə nəzərdən keçirilməsinə
xidmət edəcək. İki ölkə
arasında strateji əməkdaşlığın
Ali Şurası “Azərbaycanın sevinci bizim sevincimizdir,
kədəri bizim kədərimizdir” deyən
Atatürk ilə, “Bir
millət, İki dövlət” deyən
Ümummilli Lider Heydər
Əliyevdən aldığımız bayrağı daha irəli zirvələrə ucaltmaq amalının bir təzahürüdür”.
Rəsmilərin
də qeyd etdiyi kimi, yüksək səviyyəli Strateji Əməkdaşlıq Şurası
istər ikitərəfli, istərsə də regional
əməkdaşlığın genişləndirilməsinə
mühüm töhfələr verəcək.
Şuranın yaranması Bakı-Ankara tandeminin
əsaslarını daha da
möhkəmləndirəcək. Zaman-zaman
səsləndirilən fikir və tezislərin
reallığını və doğruluğunu
əsaslandıracaq. Bütün bunlara əsaslanaraq, onu deyə bilərəm ki,
Azərbaycan-Türkiyə münasibətləri zaman və məkan amilindən yüksəkdə
duran dəyərlər üzərində
qurulub və bu dəyərlərə
xələl gətirə biləcək hər hansı bir gücü mən
tanımıram.
Məhəmməd
Qaliboğlu
Səs.- 2011.- 5 noyabr.- S. 4.