Sənədli
filmlərimizin növbəti uğuru
Mədəniyyət və Turizm Nazirliyinin mətbuat xidmətindən
aldığımız məlumata görə, İdman Kinosu
Beynəlxalq Federasiyası tərəfindən 29-cu Milan Beynəlxalq
Festivalı keçirilib. Festivalın final mərhələsində
idmanın 50 növü üzrə 54 ölkədən 150-yə
qədər film nümayiş etdirildi. “Salnamə”
studiyasında çəkilmiş “Yerə dəyən top
göylərə qalxar” və “Çovqan” sənədli filmləri
ölkəmizi təmsil edib.
Müsabiqə filmləri yeddi
nominasiya üzrə yarışdı: “Olimpiya oyunları”, “Sənədli
filmlər”, “Tele-şou və yeni texnologiyalar”, “İdman və
cəmiyyət”, “Kinofilmlər”, “İdman və reklam” və
“Kino və televiziya - Böyük çempionlar”. Sonuncu
bölmədə “Yerə dəyən top göylərə
qalxar” sənədli filmi “Ən yaxşı film”
mükafatına layiq görülmüşdür. Xatırladaq ki, ölkəmizdə
futbolun yaranmasının 100 illiyinə həsr olunmuş həmin
film 2011-ci ildə “Salnamə” studiyasında çəkilmişdir.
Filmin müəllifi Arzu Urşandır. Festivalın yekun tədbirində
“Böyük çempionlar” bölməsi üzrə altı
nominantın adı açıqlanmış, nəticədə
Azərbaycan filminin qalib çıxdığı elan
olunmuşdur. “Yerə dəyən top göylərə qalxar”
filmi sentyabrda Rusiyanın Lipetsk şəhərində
keçirilən 7-ci Beynəlxalq İdman Filmləri
Festivalında “Olimpiya ideallarına sədaqət”
nominasiyası üzrə I
yer qazanmışdır. Arzu Urşanın verdiyi məlumata
görə, Milan festivalı zamanı filmimiz Almaniya və
Braziliyada keçirilən idman filmləri festivallarına dəvət
almışdır. “Çovqan”
filmi festivalın fəxri diplomu və xüsusi medalına
layiq görülmüşdür. Filmin müəllifi Rafiq
Quliyevdir.
Zümrüd
Səs.- 2011.- 5 noyabr.- S. 14.