Azərbaycan Respublikası Konstitusiyası - 16 il...

Dünən Yeni Azərbaycan Partiyası Nizami rayon təşkilatı, YAP Nizami rayon təşkilatının Keşlə ərazi ilk partiya təşkilatı və Azərbaycan Standartlar İnstitutunun birgə təşkilatçılığı ilə Azərbaycan Respublikası Konstitusiyasının qəbul edilməsinin 16-cı ildönümünə həsr olunmuş bayram tədbiri keçirilib. Tədbirdə ilk olaraq vurğulanıb ki, Azərbaycan Respublikasının Konstitusiyası öz demokratikliyi və insan hüquqlarına sadiqliyi baxımından yüksək qiymətləndirilir.

Şübhəsiz ki, bütün bunlar Azərbaycan dövlətinin humanizminin, insan hüquq və azadlıqlarına olan hörmətinin, demokratik cəmiyyət quruculuğu prosesinə sədaqətinin göstəricisidir. Eyni zamanda, cəmiyyətdə ədalət prinsiplərinin sütunlarının möhkəmləndirilməsinə xidmət edir. Nəzərə almaq lazımdır ki, yalnız o cəmiyyətlərdə inkişaf baş verir ki, orada hüququn aliliyi təmin olunsun. Azərbaycan da, konstitusiyada təsbit olunduğu kimi, məhz bu yolla uğurla addımlamaqdadır.

Tədbirdə çıxış edən Azərbaycan Standartlar İnstitutunun direktoru Rauf İsmayılov vurğuladı ki, müstəqil Azərbaycan Respublikasının ilk Konstitusiyasının qəbul olunması ölkəmizin tarixində çox mühüm yer tutur. Konstitusiyanın yaradılmasında xalqımızın Ümummilli Lideri Heydər Əliyevin əvəzsiz xidmətləri olmuşdur. Məhz Ulu Öndərin təşəbbüsü ilə xalqımız hər il bu günü bayram - Konstitusiya Günü kimi qeyd edir: “1918-1920-ci illərdə Azərbaycan Xalq Cümhuriyyəti ölkədə hakimiyyət bölgüsünün təmin edilməsi istiqamətində bir sıra qanunlar qəbul etmişdir. Sovet İttifaqı dövründə respublikamızda qəbul olunmuş dörd konstitusiya formal xarakter daşımış, orada əksini tapmış insan hüquqlarının mühafizəsi ilə bağlı konkret mexanizmlər fəaliyyət göstərməmişdir”.

Natiq onu da xatırlatdı ki, konstitusiyanın ildönümü ilə əlaqədar olaraq institutun foyesində Azərbaycan dövlətçiliyinə və Ulu Öndər Heydər Əliyevə, eləcə də, ölkə Prezidenti İlham Əliyevə həsr olunmuş stend qurulmuşdur. Stenddə Ulu Öndərimizin keşməkeşli siyasi yolu, uğurlu fəaliyyəti ilə bağlı şəkillər yer almışdır. Həmçinin, bu stenddə Azərbaycan Respublikasının Prezidenti İlham Əliyevin mütərəqqi siyasətinə həsr olunmuş fotolar da tamaşaçıların geniş marağına səbəb olur.

Tədbirdə YAP Nizami rayon təşkilatının sədri, millət vəkili Sədaqət Vəliyeva iştirakçıların diqqətinə çatdırdı ki, 1993-cü ildə ikinci dəfə hakimiyyətə qayıdan Ulu Öndər Heydər Əliyevin ilk təşəbbüslərindən biri konstitusiyanın yaradılması olmuşdur. Nəticədə 1995-ci ildə müstəqil Azərbaycanın ilk Konstitusiyası referendum yolu ilə qəbul edilmişdir: “İlk konstitusiyada insan hüquq və azadlıqlarının təminatı əsas vəzifə kimi müəyyənləşdirilmişdir. Konstitusiyanın qəbulundan sonra ölkəmizin hüquq sistemində ciddi islahatlar aparılmışdır. 2009-cu ildə keçirilmiş referendumdan sonra insanların sosial rifahının yaxşılaşdırılmasına xidmət etmək məqsədi ilə sosial hüquqların təminatı məsələləri də Konstitusiya Məhkəməsinin fəaliyyətinə daxil olunmuşdur. Eyni zamanda, xüsusilə, vurğulamaq istərdim ki, gənclərimiz də konstitusiyamızın demokratik dəyərlərindən bəhrələnir, inkişaf edirlər. Məhz ölkədə aparılan gənclər siyasəti bu məfhumu təsdiq edir. Prezident İlham Əliyevin gənclərlə bağlı gördüyü böyük işlər bir daha sübut edir ki, Azərbaycan gənci bütün məqamlarda hüquqi dəyərlərə istinad edərək, gələcəkdə daha böyük uğurlara imza atacaq”.

Tədbirdə YAP Nizami rayon təşkilatının Keşlə ərazi ilk partiya təşkilatının sədri Hacı Əkbər Miskinov Azərbaycan Respublikası Konstitusiyasının qəbul olunmasından 16 il ötdüyünü xatırladaraq, bildiridi ki, 1995-ci il noyabr ayının 12-də keçirilən ümumxalq səsverməsi - referendumda xalqımızın böyük əksəriyyətinin dəstəyi ilə qəbul olunmuş ölkənin Əsas Qanunu mükəmməlliyi ilə seçilir, dövrün çağırışlarına tam cavab verir və bu da təsadüfi deyil: “Çünki Azərbaycan Respublikası Konstitusiyasının hazırlanmasına birbaşa xalqımızın Ümummilli Lideri, böyük dövlət xadimi, dahi şəxsiyyət Heydər Əliyev rəhbərlik edib. Konstitusiyanın bir dövlətin gələcək taleyində rolunu, ümumiyyətlə, dövlətçiliyin inkişafındakı əhəmiyyətini dəqiq qiymətləndirən Ümummilli Lider Heydər Əliyev bu prosesə həddindən artıq məsuliyyətlə yanaşır, çıxışlarında “bu mühüm sənədin qəbul olunması üçün gələcək nəsillərin qarşısında cavabdehlik” məsələsinin məhz Onun üzərinə çox böyük məsuliyyət qoyduğunu vurğulayırdı. Məhz bu diqqətin nəticəsi olaraq, Azərbaycanda Avropa və beynəlxalq aləmdə qəbul olunmuş əsas hüquqi aktların tələblərinə, milli maraqlarımıza tam cavab verən konstitusiyamız qəbul olundu. Müstəqil Azərbaycan dövlətinin tarixində ilk olan bu sənəd qəbul edilərkən məhz bu niyyətlər ifadə edilib”. Görüşdə institun əməkdaşları Habil Hümbətov, Vüsal Cəfərov və başqaları bildirdilər ki, gənc olmalarına rəğmən daim ölkə quruculuğunda iştirak etməkdən qürur duyur və fərəh hissi keçirilər. Azərbaycan Respublikası Konstitusiyasında sadalanan bir çox müddəalar bugünkü gəncin həyat fəaliyyətinin daha geniş çərçivədə inkişaf etməsinə stimul verir. Məhz bu baxımdan da, xüsusilə, vurğulandı ki, institutda çalışan əməkdaşların 70 faizini gənc nəsilin nümayəndələri təşkil edir. Bu da ki, təbii olaraq, Prezidenti İlham Əliyev tərəfindən istiqamətləndirilmiş uğurlu gənclər siyasətinin bariz göstəricisidir. Bayram tədbirində “Veysəloğlu” MMC-nin əməkdaşları Həşim Rəhimov və Şahin Quliyev, “Güzgü furnitor” ASC-nin İdarə Heyətini sədri İsa Musayev, “Bakı mexaniki təmir” ASC-nin İdarə Heyətinin sədri Kəmaləddin Nəsibov və başqaları çıxış edərək, bildirdilər ki, Azərbaycan Konstitusiyası hazırda bir çox demokratik dövlətlərin konstitusiyalarından da mükəmməl və mütərəqqi dəyərlərə söykənir. Tədbir iştirakçıları sonda onu da vurğuladılar ki, Azərbaycan xalqı, öncələr olduğu kimi, bu gün və sabah da ölkə Prezidenti İlham Əliyevin ətrafında sıx birləşib, respublikanın tərəqqisində yorulmaz fəaliyyət göstərəcəklər.

RƏFİQƏ KAMALQIZI

Səs.- 2011.- 12 noyabr.- S. 6-7.