Azərbaycan həm mədəniyyəti, həm də təbiət nemətləri ilə Avropanı fəth edir

Avstriya Respublikasının paytaxtı Vyana şəhərinin mərkəzində yerləşən Mixaelerplatz meydanında “Azərbaycan: Nar məkanı” adlı bayram tədbiri keçirilib. Nazirliyin mətbuat xidmətindən Zöhrə Əliyevanın verdiyi məlumata görə, Azərbaycan Respublikasının Mədəniyyət və Turizm Nazirliyinin, Azərbaycanın Avstriyadakı səfirliyi və Vyana şəhər meriyasının birgə təşkil etdiyi “Nar bayramı” Azərbaycanın dövlət müstəqilliyinin bərpa olunmasının 20 illiyi münasibəti və 2011-ci ilin ölkəmizdə “Turizm ili” elan edilməsi ilə əlaqədar təşkil olunub.

Tədbirin açılışında mədəniyyət nazirinin müavini Sevda Məmmədəliyeva çıxış edib. O, qonaqları Vyananın rəsmi dairələrinin nümayəndələrini, çoxsaylı Vyana sakinlərini və turistləri salamlayıb, narı gənclik, gözəllik, sağlamlıq və müdriklik rəmzi kimi təqdim edərək, bu bitkinin Azərbaycanın simvollarından biri olduğunu bildirib. O, qeyd edib ki, dünyada mövcud olan 60-dan artıq nar sortunun hamısı bərəkətli Azərbaycan torpağında bitir. Nar mövzusu, eyni zamanda, qədim zamanlardan Azərbaycan xalqının bədii təfəkkürünə hoparaq, onun mədəniyyətində - folklor-söz sənətində, tətbiqi sənətdə, rəssamlıqda, poeziyada öz əksini tapıb. Azərbaycan xalçalarında, orta əsrlərə aid miniatürlərdə, metal və ağac məmulatlarında nar motivlərinə tez-tez rast gəlmək mümkündür. Şəninə mahnılar və şeirlər qoşulan, əfsanələr söylənən, adına “cənnət meyvəsi” deyilən nar ta qədim zamanlardan Azərbaycana xas olan ən dadlı nemətlərindən biri olaraq həm də bədii obraza çevrilmişdir.

Azərbaycan 1991-ci ildə dövlət müstəqilliyini bərpa etdikdən sonra hər il ölkənin müxtəlif regionlarında məhsul yığımı ilə əlaqədar nar bayramı keçirilir. Adətən, Azərbaycanın regionlarında keçirilən bu bayram artıq ölkə hüdudlarını aşaraq ilk dəfə dünyanın ən böyük mədəniyyət mərkəzlərindən biri olan Vyana şəhərində qeyd olunur. Vyananın həm rəsmi dairələrinin nümayəndələrinin, həm sakinlərin dediyinə görə, Mixaelerplatz meydanında yüz ildə bir dəfə belə kütləvi mərasim keçirilə bilər. Çünki bu meydan həm tarixi, həm də siyasi baxımdan şəhərin mühüm strateji nöqtəsində yerləşir. Azərbaycanı yaxından tanımağa dərin maraq göstərən avstriyalı dostlarımızla nar bayramının xoş ovqatını bölüşmək dost ölkədə Azərbaycan mədəniyyətini daha da yaxından tanıtmaq üçün çox gözəl fürsətdir.

Azərbaycan və Avstriya arasında mədəni əlaqələrin yüksək səviyyədə inkişaf etdiyini diqqətə çatdıran Sevda Məmmədəliyeva bildirdi ki, 2006-ci ildə Vyanada dahi Azərbaycan bəstəkarı Üzeyir Hacıbəylinin abidəsi ucaldılıb, bir neçə həftə öncə isə Bakıda Azərbaycanın Prezidenti İlham Əliyev və Avstriyanın Federal Prezidenti Haynts Fişerin iştirakı ilə Avstriyanın məşhur bəstəkarı Volfqanq Amadey Motsartın abidəsinin açılışı olub. Belə tədbirlər xalqlarımız və ölkələrimizin daha da yaxınlaşmasına xidmət edən mədəni hadisələrdir ki, “Nar bayramı” da buna mükəmməl bir nümunə oldu.

Sevda Məmmədəliyeva “əlahəzrət nar”ın pişvazına çıxanlara təşəkkürünü bildirdi və hamını “narın möcüzəli vətəni” Azərbaycandan gətirilmiş təamlarından dadmağa dəvət edib.

Sonra Vyana şəhər meriyasının xarici əlaqələr şöbəsinin rəhbəri Andreas Launer və Azərbaycanın Avstriyadakı səfiri Qalib İsrafilov çıxış ediblər. Natiqlər bir daha bu kimi tədbirlərin hər iki ölkə arasında əlaqələrin daha da genişlənməsinə, mədəniyyətlərarası dialoqun inkişafına böyük töhfə verəcəyini vurğulayıblar.

Bayramın bədii hissəsində Azərbaycan Dövlət Pantomima Teatrının baş rejissoru, əməkdar incəsənət xadimi Bəxtiyar Xanızadənin hazırladığı “Məlikəhmədin nağılı” nümayiş etdirilib. “Məlikməmmədin nağılı”nın motivləri əsasında hazırlanmış tamaşada padşah (Elman Rəfiyev) müdriklik rəmzi olan narı qorumağı övladlarına həvalə edir, onun kiçik oğlu Məlikəhməd (Elnur İsmayılov) isə divlə (Bəhruz Vaqifoğlu) gərgin mübarizədən sonra qələbə qazanaraq, nar ağacını, bununla da atasının səltənətində hökm sürən müdrikliyi xilas edir.

“Emil Əfrasiyab və dostları” qrupu (əməkdar artistlər Teyyub Aslanov, Ruslan Hüseynov, Tofiq Cabbarov, artistlər Samir Şirinov, İskəndər Ələskərov) bayram tədbirində canlı musiqi ilə çıxış edərək Vyananın soyuq qışına isti bir Azərbaycan rayihəsi gətirib, Azərbaycan ritmlərinin sədaları bütün şəhəri sardı və hamıya gözəl əhval-ruhiyyə bəxş edib. Əməkdar artist Ənvər Sadıqovun qarmonda, Hüseyn Hüseynovun zurna və klarnetdə misilsiz ifası tamaşaçılar tərəfindən sürəkli alqışlarla qarşılandı. Bakı Xoreoqrafiya Məktəbinin şagirdləri “Sarı gəlin”, “Naz eləmə”, “Qaytağı”, “Yallı”, “Uzundərə” rəqslərini məharətlə ifa edib. Lökbatan 9 saylı musiqi məktəbinin şagirdlərinin nağara və zərb alətlərində ifa etdiyi Azərbaycan ritmləri də tədbir iştirakçılarını valeh etdi. Azərbaycan milli musiqisindən təsirlənən şəhər sakinləri və bu meydana toplaşan həmvətənlərimiz, hətta şəhərin rəsmi təmsilçiləri belə musiqi sədaları altında Azərbaycan rəqqasları ilə birlikdə qol götürüb meydan boyu yallı gedib.

Tədbirdə nar mövzusuna həsr olunmuş Azərbaycanın xalq və dekorativ tətbiqi sənət nümunələrindən ibarət sərgi nümayiş olunub. Bu məqsədlə quraşdırılmış çadırlarda “Azərxalça” Elmi-Yaradıcılıq İstehsalat Birliyinin məhsulu olan xalçalar sərgilənib, misgərlik və dulusçuluq məmulatları, şəbəkə sənəti nümunələri nümayiş etdirilib. Misgər Nəzər Əliyev, dulusçu Xalid Şabanov, şəbəkə ustası Hüseyn Hacımustafazadə kimi sənətkarlarımız elə sərgidəcə öz məharətlərini tamaşaçılara nümayiş etdiriblər.

Qeyd edək ki, Vyanada keçirilmiş nar bayramı Azərbaycan Respublikasının Mədəniyyət və Turizm Nazirliyi ilə Avstriyanın Təhsil, İncəsənət və Mədəniyyət üzrə Federal Nazirliyi arasında mədəniyyət və incəsənət üzrə 2009-2012-ci illərdə əməkdaşlıq haqqında Anlaşma Memorandumuna müvafiq olaraq mədəniyyət mübadiləsinin genişləndirilməsinə xidmət edir. Eyni zamanda, bu tədbirin keçirilməsi nar bayramının Azərbaycan xalqının qeyri-maddi mədəni irsi kimi YUNESKO-nun Qeyri-maddi mədəni irsinin Reprezentativ siyahısına daxil edilməsi istiqamətində aparılan işin tərkib hissəsi hesab oluna bilər.

Bayram tədbirində Avstriya hökumətinin, Vyanada akkreditə olunmuş diplomatik korpusun nümayəndələri, ATƏT-in təmsilçiləri, Qazaxıstan Respublikasının turizm nazirinin müavini, Avstriya-Azərbaycan Ticarət Palatasının əməkdaşları, Vyana ictimaiyyətinin nümayəndələri, ziyalılar, həmvətənlərimiz, Vyanaya gələn turistlər də heyranlıqla seyr etdilər.

Zümrüd

Səs.- 2011.- 18 noyabr.- S. 12.