1 Oktyabr Beynəlxalq Ahıllar Günüdür

Hər il oktyabrın 1-i ölkəmizdə Beynəlxalq Ahıllar Günü kimi qeyd edilir. Səbail rayonunda da Beynəlxalq Ahıllar Günü ənənəvi olaraq geniş şəkildə qeyd olundu. Dünən Səbail rayon icra hakimiyyətinin təşkilatçılığı ilə şəhərin mərkəzində Dənizkənarı Milli Bulvarda yerləşən möhtəşəm “Park Bulvar” Ticarət və İstirahət Mərkəzinin “Zeytun” restoranında ahıl, kimsəsiz, əlil və qayğıya ən çox ehtiyacı olan vətəndaşlar üçün bayram süfrəsi açılıbdır.

Rayon icra hakimiyyəti, veteran təşkilatları şurası, Qızıl Aypara Cəmiyyəti rayon şöbəsi, rayon Sosial Müdafiə Mərkəzinin və bir sıra ictimai təşkilatların rayon şöbələrinin nümayəndələrinin iştirakı ilə keçirilən tədbirdə Səbail rayon icra hakimiyyətinin başçısı Asif Əsgərov yaşlı nəslin nümayəndələrini salamladı, onlara uzun ömür və cansağlığı arzulayaraq, dövlət tərəfindən hər bir ahıl vətəndaşın diqqət və qayğı ilə əhatə olunduğunu bildirdi: “Bu gün adı-sanı, nəcib əməlləri ilə tanınan, bəlkə də heç tanınmayan, lakin ləyaqətlə yaşayan, həyat təcrübəsi ilə yeni nəsillərə nümunə olan ahıllar, həqiqətən, hörmətə layiqdirlər. İnsanın qocalıq dövründə heç nəyə qadir olmadığını söyləmək səhv olardı. Lap qədim zamanlardan ağsaqqal, ahıl insanlar ən hörmətli, müdrik adamlar hesab olunurlar. Onlara cavanlar da, böyüklər də hörmətlə yanaşır, fikirləri ilə hesablaşırlar. Qocaların sərvəti onların həyat təcrübəsidir. Onlara qulaq asıb, dediklərinə əməl etməklə bu sərvətə sahib olmaq mümkündür”.

A.Əsgərov onu da vurğuladı ki, ölkədə həyata keçirilən uğurlu iqtisadi inkişaf bütün sahələrdə müsbət nəticələrin həyata keçirilməsinə gətirib çıxarıb: “Son illər ərzində pensiya və minimum əmək haqlarının məbləği dəfələrlə qaldırılıbdır. Bu il isə təqaüdçülər üçün, xüsusilə, sevindirici hadisə baş vermiş, iyul ayının 1-dən 2006-cı ilə qədər ölkədə pensiyaya çıxan 900000 vətəndaşın pensiyası 40 faiz artmışdır. Rayonda qeydiyyatda olan 13438 nəfər təqaüdçünün 9880 nəfərinə bu artım şamil olunubdur. Bu gün Səbail rayonunda yaşı 70-i ötmüş 5000 nəfərə yaxın ahıl vətəndaş yaşayır, müxtəlif növ və kateqoriyalar üzrə 2509 nəfər sosial müavinət, 367 ailə (1496 ailə üzvü) ünvanlı sosial yardım alır. Səbail rayonu əhalinin sosial müdafiə mərkəzinin sosial xidmət şöbəsində 379 nəfər tənha, əlil qeydiyyatdadır ki, onlara 31 nəfər sosial işçi xidmət göstərir. Təqaüdçülərə təqaüd və müavinətlərin ödənilməsində gecikmələrə yol verilmir, onların müraciətləri nəzərə alınaraq rayonun bir neçə yaşayış sahəsində, o cümlədən, Bibiheybət qəsəbəsi, 20-ci yaşayış sahələrində yeni bankomatlar quraşdırılıbdır. 2011-ci ilin birinci yarısı ərzində rayonda imtiyazlı təbəqəyə aid 15 ailə, o cümlədən, 5 - Böyük Vətən müharibəsi veteranı olan ahıl sakinlərimiz yeni mənzillərlə təmin olunub, ilin sonuna kimi daha bir neçə ailənin mənzillə təminatı planlaşdırılıbdır”.

A.Əsgərov rayonda aparılan genişmiqyaslı abadlıq-quruculuq işləri barədə məlumat verərək, rayonun sosial-iqtisadi inkişafı üçün görülməsi nəzərdə tutulan işlərdən danışaraq, bildiribdir ki, bu işlərin həyata keçirilməsində veteran və yaşlı nəsil nümayəndələrinin hər zaman məsləhət və təkliflərinə böyük ehtiyac vardır.

Tədbirdə Səbail rayon veteran təşkilatları şurasının sədri, Sosialist Əməyi Qəhrəmanı Ömər Ağayev və başqaları rayonda ahıl və veteranlarla bağlı görülən işlərdən, onlara göstərilən diqqət və qayğıdan danışaraq, bu işlərə görə ölkə başçısına öz minnətdarlıqlarını bildirdilər.

Görüşdə iştirak edən 120 ahıla RİH tərəfindən ərzaq bağlamaları təqdim olundu. Tədbirin sonunda də respublikamızın tanınmış incəsənət xadimləri böyük konsert proqramı ilə çıxış etdilər.

RƏFİQƏ KAMALQIZI

Səs.- 2011.- 1 oktyabr.- S. 10.