“MÜSTƏQİL AZƏRBAYCAN -20”

“Səs” qəzeti redaksiyasında Azərbaycan dövlət müstəqilliyinin 20 illiyinə həsr olunmuş dəyirmi masa keçirildi. Dəyirmi masada Səbail rayon gənclər və idman idarəsinin rəis müavini Faiq Qurbanov, Nəsimi rayon icra hakimiyyətinin ərazi-idarəetmə orqanları ilə iş şöbəsinin müdiri Anar Tağıyev, YAP Sumqayıt şəhər təşkilatının gənclər birliyinin sədri Ülvü Məmmədov, YAP Sabunçu rayon təşkilatının gənclər birliyinin sədr müavini Lamiyə Cəlilova, “Ordunun dostaları klubunun” üzvü, “Hərbi and” qəzetinin müxbiri Rüstəm Quliyev, YAP Binəqədi rayon təşkilatı gənclər birliyininin sədr müavini Rahil Şükürov, Azərbaycan Jurnalistlər Birliyinin üzvü Yeqzar Cəfərli, YAP Nizami rayon təşkilatının üzvü İlqar Həmziyev, Xətai rayon gənclər birliyinin sədr müavini Həmidağa Əliyev, YAP Qaradağ rayon təşkilatının gənclər birliyinin üzvü Tünzalə Muradova, YAP Sabunçu rayon təşkilatının gənclər birliyinin sədr müavini Məhəmməd Əsədov, YAP Sabunçu rayon təşkilatının gənclər birliyinin idarə heyətinin üzvü Namiq Muradov iştirak edirdilər.

ULU ÖNDƏR HEYDƏR ƏLİYEV: “MÜSTƏQİLLİYİ QORUYUB SAXLAMAQ ONU ƏLDƏ ETMƏKDƏN DAHA ÇƏTİNDİR”

(Əvvəli ötən sayımızda)

Qeyd edək ki, “Səs” qəzeti hər zaman cəmiyyət həyatında baş verən ən aktual məsələlərə, cərəyan edən proseslərə həsr olunmuş, eləcə də, ictimaiyyətin marağına səbəb olacaq dəyirmi masalar təşkil edir. Bu amil artıq ənənə halını almışdır. Hazırda ölkəmizdə ən aktual mövzulardan biri xalqımızın dövlət müstəqilliyinin 20 illik ərəfəsində olmasıdır. Prezidenti İlham Əliyevin müstəqilliyimizin 20 illiyi ilə bağlı imzaladığı mühüm Sərəncam ölkənin hər bir yerində müxtəlif qurumlar, ictimai-siyasi təşkilatlar tərəfindən əlamətdar hadisə kimi dəyərləndirilir. Fəal gənclərin iştirakı ilə “Səs” qəzetində mövzu ilə bağlı növbəti dəyirmi masanı təşkil etməkdə əsas məqsəd məhz 20 illik bir dövr ərzində Azərbaycan tarixinə qısa bir şəkildə də olsa nəzər salmaqdır.

Lamiyə Cəlilova: “Səs” qəzeti vasitəsi ilə olunan müraciət Azərbaycan xalqının Ümummilli Liderinə olan tarixi çağırış idi”

- Mən daha bir xüsusi əhəmiyyət daşıyan tarixi hadisəni ictimaiyyətə xatırlatmaq istərdim. Bu tarixi əhəmiyyət 1991-ci ildə tanınmış ziyalılarımızın, siyasi xadimlərimizin, nüfuzlu şəxslərin “Səs” qəzeti vasitəsilə Ulu Öndər Heydər Əliyevə etdikləri müraciətdir. Bu müraciət yalnız onların deyil, eləcə də, Azərbaycan xalqının Ümummilli Liderinə olan çağırış idi. Həmin dövrlərin tarixini vərəqləyərkən, bir daha şahid oluruq ki, həm xarici qüvvələr tərəfindən, həm də daxildə aparılan naşı siyasət səbəbindən ölkəmiz daha yenicə əldə etdiyi müstəqilliyini itirmək təhlükəsi ilə qarşı-qarşıya qalmışdı. Belə bir çətin məqamda Azərbaycan xalqının LİDERƏ ehtiyacı var idi və tarixi zərurət bunu tələb edirdi. Nəticədə xalqımızın Dahi Şəxsiyyəti, Ümummilli Lideri xalqın tələbini, səsini eşidərək, dönməz qətiyyət, sarsılmaz iradə nümayiş etdirib Bakıya döndü. Onun bu dönüşü itirilməkdə olan dövlət müstəqilliyimizin xilası oldu.

Faiq Qurbanov: “Bir həqiqət də mövcuddur ki, səhv düşüncəli gənclərə də daha doğru istiqamət verən yeganə partiya Yeni Azərbaycan Partiyasıdır”

- Əhəmiyyətli bir məsələyə toxunmaq istərdim. Yəni 1993-1995-ci illərdə Yeni Azərbaycan Partiyasına ilk gəldiyim tarixi hadisələrə bir daha qayıdaraq, nəzər salmaq istərdim. Məndən öncə çıxış edən həmkarımın söylədiyi bir çox maraqlı fikirlər diqqətimi cəlb etdi. Daha dəqiq desək, həqiqətən də, o dövrdəki gənclərin bəziləri səhv yola yönəldilirdi. Belə ki, bu amil ondan irəli gəlirdi ki, həmin gənclərin düşdüyü həm siyasi, həm də mənəvi mühit onları bu yola məcbur etmişdi. Təbii ki, anarxiya anlamını, bu anlamın fəsadlarını başa düşməyən gənclik bu istiqamətə yönəlir. Məsələ ondadır ki, bir çox gənclər öz seçimlərini edərkən, düşünmədən hərəkət edirdilər. Sonradan isə bunun mənfi xüsusiyyətləri çox pis, mən deyərdim acınacaqlı nəticə verirdi. Doğrudur, baş verən hadisələrin üzərindən müəyyən bir müddət keçdikcə həmin gənclər gec də olsa anlayırlar ki, müstəqilliyimizin möhkəmlənməsi yolunda küçələrə çıxıb kimlərinsə göstərişinə əməl etməklə nəyəsə nail olmaq mümkün deyil və onlar düzgün yolda deyillər.

“Səs” qəzetinin əməkdaşı:

- Əgər Ulu Öndər Heydər Əliyev hakimiyyətə gəlməsəydi, bugünkü qüdrətli Azərbaycan ola bilərdimi?

Namiq Muradov: “ Müstəqil Azərbaycanımızın bundan sonra da əbədi və daimi olması üçün hamımız bir qüvvə kimi ölkə Prezidenti İlham Əliyev ətrafında sıx birləşməliyik”

- Müstəqilliyimizin keçdiyi müxtəlif dövrlərə və bu dövrlərdə ölkəmizin bütün sahələrində həyata keçirilən uğurlu nailiyyətlərlə bağlı fikirlər səsləndi. Lakin mən 1992-1993-cü illər arasında olan dövrlərə toxunmaq istərdim. Çünki bu illər ərzində Azərbaycanın həm daxili, həm də xarici siyasət sahəsində böyük çətinlikləri yaranmışdı. Belə ki, Azərbaycanı ayrı-ayrı bölgələrə bölməkdə maraqlı olan müxtəlif iddialı, separatçı qüvvələr ortaya çıxmışdı. Nəticədə işğalçı Ermənistan Azərbaycanda yaranmış bu vəziyyətdən istifadə edərək, daha dəqiq desək, Azərbaycana rəhbərlik edən siyasi səviyyəsiz rəhbərliklərin məsuliyyətsizliyi və satqınlığı üzündən torpaqlarımızın 20 faizi düşmən tapdağı altında qaldı. 1993-cü il 15 iyuna qədər Azərbaycan, həm də qardaş qırğını mühitini yaşayırdı. Belə bir ağır vəziyyətdən çıxmaq üçün Azərbaycan xalqı çıxış yolunu Ulu Öndər Heydər Əliyevin yenidən hakimiyyətə qayıdışında gördü. Bu 1993-cü il 15 iyun müstəqilliyimizin möhkəmlənməsi və bünövrəsinin qoyulmasının tarixi idi. Bu, həm də Azərbaycanın yeni inkişaf mərhələsinə qədəm qoyduğu bir tarix idi. Çünki Azərbaycan bütün sahələrə sıfırdan başlayaraq fəaliyyətə keçdi. Daha dəqiq desək, Azərbaycan 1993-cü il 15 iyundan ayağa duraraq ilk uğurlu addımını atdı. Müstəqilliyimizin 20 illik tarixinə diqqət yetirsək, görərik ki, Azərbaycan inkişaf etmiş ölkələrin on illərlə həyata keçirdiyi uğurlu işlərə məhz bu 20 il ərzində nail olmuşdur. Bu baxımdan da fəxr etməyə dəyər ki, biz gənclər Ümummilli Liderimiz Heydər Əliyevin bizə miras qoyduğu şah əsəri olan müstəqil Azərbaycan dövlətində yaşayırıq.

Tünzalə Muradova: “Biz gənclər ölkə Prezidenti İlham Əliyevin əmrini hər an gözləyir və əməl etməyə hazırıq”

- Sözümü Ümummilli Liderimizin ibrətamiz bir kəlamı ilə başlamaq istərdim: “Müstəqillik yolu qədər çətin bir yol yoxdur”. Doğrudan da, Azərbaycan 1991-ci ildə öz müstəqilliyini əldə etsə də, bu müstəqilliyin reallıqları hiss olunmurdu. Çünki ölkədə xaos, özbaşınalıq, dərəbəylik, respublikaya rəhbərlik edənlərin səriştəsizliyi bu müstəqilliyin əldən getməsi üçün şərait yaradırdı. Bu isə Ermənistanın Azərbaycana qarşı Dağlıq Qarabağ problemini ortaya atmaqla torpaq iddiasına düşməsinə və 20 faiz torpaqlarımızın düşmənin tapdağı altında qalmasına qədər gətirib çıxardı. Yaranmış bu cür xaotik vəziyyətdən təngə gələn, bezən xalq kütləsi ayağa qalxaraq, çıxış yolunu “Heydər Əliyev - Xalq” birliyində gördü. Beləliklə də, xalq Ulu Öndər Heydər Əliyevə müraciət edərək, Azərbaycanı bu bəladan xilas etmək üçün yenidən siyasi hakimiyyətə qayıdışını tələb və təkidlə xahiş etdi. Ümummilli Liderimiz xalqının bu müraciətini ümidsiz qoymayaraq 1993-cü il 15 iyunda Azərbaycana ikinci dəfə siyasi hakimiyyətə qayıtdı. Bu qayıdışla Azərbaycanda böyük dirçəliş baş verdi. Ümummilli Liderimiz Heydər Əliyev, ilk öncə, ölkədə siyasi sabitliyin bərqərar olunmasına, 1994-cü ildə isə atəşkəsin əldə olunmasına nail oldu.

Anar Tağıyev: “Xaos və anarxiya içərisində boğulan, vətəndaş müharibəsinin bir addımlığında olan ölkənin qanunverici orqanına Sədr seçilən liderin fəaliyyətinin ilk günlərində gənclər təşkilatlarının rəhbərlərini qəbul etməsi, onlarla əhatəli müzakirələr aparması gənclərimizə göstərilən etimaddan xəbər verirdi”

- Azərbaycanda gənc nəslə göstərilən qayğı və etimadın ilk təzahürü Ulu Öndər Heydər Əliyevin 1993-cü il iyun ayının 15-də - Azərbaycan parlamentinin Sədri seçildiyi gündən dərhal sonra gənclərin bir qrupunu qəbul etməsi idi. Xaos və anarxiya içərisində boğulan, vətəndaş müharibəsinin bir addımlığında olan ölkənin qanunverici orqanına Sədr seçilən liderin fəaliyyətinin ilk günlərində gənclər təşkilatlarının rəhbərlərini qəbul etməsi, onlarla əhatəli müzakirələr aparması gənclərimizə göstərilən etimaddan xəbər verirdi. Fevral ayının 2-nin hər il Gənclər Günü kimi qeyd edilməsi də Ümummilli Liderimizin bu zümrəyə ayırdığı diqqətin təzahürlərindən idi. 2003-cü ilin oktyabrından sonra da bu siyasət davam etdirildi və üstəlik, yeni istiqamətlərlə, variantlarla daha da genişləndirildi.

Bu zaman bir məqamı, xüsusilə, qeyd etmək zərurəti var. Belə ki, dünyanın müxtəlif ölkələrində dövlət xətti ilə təhsil alan tələbələrin 41 faizi Azərbaycanın regionlarını təmsil edən gənclərdir. Xarici ölkələrdə təhsil almaq üçün göndərilən gənclərin sayı 2003-cü ildə 885 nəfər idisə, 2008-ci ildə bu göstərici 1256 nəfərə çatdırılıbdır. Dövlət başçısının imzaladığı xüsusi proqramın icrası nəticəsində 2013-cü ildə bu rəqəm hər il üçün 1500 nəfərə çatdırılacaqdır.

İlqar Həmzəyev: “ Təməli Ulu Öndər Heydər Əliyev tərəfindən qoyulan gənc nəslə dövlət qayğısının göstərilməsi sahəsində həyata keçirilən siyasət 2003-cü ildən sonra daha uğurlu şəkildə davam etdirilmişdir”

- Müstəqilliyimizin 20 il ərzində keçdiyi tarixi yola nəzər salındı, müxtəlif və maraqlı, eyni zamanda, əhəmiyyətli fikirlər səsləndi. Ancaq biz gənclərin ən çox toxunduğu 1993-cü il 15 iyunda Ümummilli Liderimiz Heydər Əliyevin hakimiyyətə qayıdışı ilə bağlı tarixi hadisələrdir. Bu da, təbii ki, qəbulediləndir. Çünki mən belə deyərdim ki, müstəqilliyimiz əgər 1991-ci ildə əldə olunubsa, xalqımız bu müstəqilliyin şirinliyini, dadını 1993-cü ildə hiss edib. Məhz bu baxımdan da bu tarixi hadisə hər birimizin qəlbində, beynində həkk olunub. Azərbaycan Respublikası Dövlət Statistika Komitəsinin hazırladığı “Azərbaycan Respublikası hökumətinin fəaliyyətinin əsas nəticələri və prioritet istiqamətləri” adlı statistik icmalda 2003-cü ildən sonrakı nəticələr və 2013-cü ilə qədərki perspektivlər göstərilir. “Perspektivlər” bölməsində deyilir: Bakı şəhərində “Gənclər sarayı”nın inşa edilməsi, regionlarda “Gənclər evi” sosial xidmət müəssisələri şəbəkəsinin yaradılması, gənclər üçün Milli Tədris və Təlim Mərkəzinin yaradılması, Gənclər və İdman Nazirliyi nəzdində “Gənclər siyasətinin inkişafına dəstək Fondu”nun yaradılması, Dövlət “Gənclər Mükafatı”nın təsis edilməsi, gənclərin intellektual inkişafına yönəlmiş layihələrin həyata keçirilməsi və sairə.

“Səs” qəzetinin əməkdaşı:

- Azərbaycan gəncliyi üçün müstəqil Azərbaycan anlayışı nədir?

Əliyev Həmidağa: “Sevindirici haldır ki, gənclərimizin səsi nəinki Azərbaycandan, eyni zamanda, dünyanın hər yerindən gəlir”

- Ümummilli Liderimiz Heydər Əliyevin apardığı uğurlu siyasət nəticəsində bugünkü gəncliyin formalaşaraq, yüksək intellektual səviyyəyə çatması ölkədə gəncliyin böyük qüvvəyə çevrilməsinə gətirib çıxarıb. Xüsusilə də, gəncliyin bütün sahələrdə aparıcı bir qüvvə kimi öz fəaliyyətləri ilə Azərbaycanı dünyada tanıtdırması da bu siyasətin nəticəsində əldə olunmuşdur. Sevindirici haldır ki, gənclərimizin səsi nəinki Azərbaycandan, eyni zamanda, dünyanın hər yerindən gəlir. Belə ki, bu da gənclərimizə ölkə Prezidenti İlham Əliyevin diqqət və qayğısı nəticəsində əldə olunmuşdur. Xüsusilə, dövlət başçısının gənclərlə tez-tez görüşməsi, onların uğurlarının müstəqil dövlətimizə böyük nemət olması istiqamətində bizləri daha da fəal olmağa imkan verir.

Cəfərli Yeqzar: “Dövlət tərəfindən gənclərin təhsil sahəsinə daha çox diqqət və qayğı yetirməsi də göz önündədir”

- Dövlət müstəqilliyimizin 20 illiyi ərzində gənclərimizin də fəaliyyəti getdikcə püxtələşdi. Bunun da səbəbi Ulu Öndər Heydər Əliyevin ilk gündən gənclərə göstərdiyi diqqət və qayğıdır ki, bu gün ölkə Prezidenti İlham Əliyev bu siyasəti daha geniş şəkildə həyata keçirir. Ölkə əhalisinin 31 faizini təşkil edən gənclər Prezident İlham Əliyevin qayğısını hər gün, hər an hiss edirlər. “Gənclər siyasəti haqqında” Azərbaycan Respublikasının Qanununun qəbul edilməsi, 2005-ci ildə “Azərbaycan gəncliyi Dövlət Proqramı”nın təsdiq edilməsi, gənclərin ümumrespublika forumlarının keçirilməsi, 2007-ci ilin “Gənclər ili” elan edilməsi, gənclər siyasətinin həyata keçirilməsi üçün 2008-ci ilin dövlət büdcəsində 3 milyon manata yaxın vəsaitin nəzərdə tutulması son 5 ildə bu zümrəyə göstərilən qayğının bəzi məqamlarıdır.

Həmçinin, dövlət tərəfindən gənclərin təhsil sahəsinə daha çox diqqət və qayğı yetirməsi də göz önündədir. Məhz bu qayğının nəticəsidir ki, 2007-2008-ci tədris ilinin əvvəlində ölkənin 42 ali məktəbində 130 min gənc təhsil alıb. Bu rəqəm 2003-cü ilin göstəriciləri ilə müqayisədə 7,3 faiz çoxdur. Bütün bu deyilən faktlar bir daha biz gənclərin müstəqil dövlətimizin bizə göstərdiyi qayğının müsbət nəticəsidir. Bu qayğı və diqqətə görə, bütün gəncləri Ulu Öndər Heydər Əliyev siyasətini və bu siyasətin layiqli davamçısı, ölkə Prezidenti İlham Əliyev cənablarının apardığı uğurlu siyasəti dəstəkləməyə çağırıram.

(ardı var)

RƏFİQƏ KAMALQIZI

RÖVŞƏN RƏSULOV

Səs.- 2011.- 7 oktyabr.- S. 8-9.