“MÜSTƏQİL AZƏRBAYCAN -20”

Oktyabrın 12-də “Səs” qəzeti redaksiyasında Azərbaycan Dövlət Müstəqilliyinin bərpa olunmasının 20 illiyinə həsr olunmuş növbəti dəyirmi masa keçirilib. Dəyirmi masada millət vəkilləri Jalə Əliyeva və Sevinc Hüseynova, YAP Qadınlar Şurasının sədr müavini, YAP Nərimanov rayon təşkilatının qadınlar şurasının sədri Məhəbbət İbrahimova, YAP Xətai rayon təşkilatının qadınlar şurasının sədri Aidə Hüseynzadə, Nəsimi rayon icra hakimiyyətinin “Qaçqınlar və məcburi köçkünlərlə iş” şöbəsinin müdiri Şəfəq Cəfərova, YAP Suraxanı rayon təşkilatının qadınlar şurasının sədri Tünzalə Süleymanova, YAP Nizami rayon təşkilatının aparat rəhbəri Selcan Novruzova, Azərbaycan Pedaqoji Universitetinin baş müəllimi - “Zəngin Azərbaycan Uğrunda Maarifləndirmə” İctimai Birliyinin sədri İradə Əliyeva, YAP Sabunçu rayon təşkilatının gənclər birliyinin sədr müavini Lamiyə Cəlilova iştirak edirdilər. Tədbirdə iştirak edənlər Azərbaycanın dövlət müstəqilliyinin 20 illiyi münasibəti ilə öz fikirlərini bildirmiş və bu istiqamətdə maraqlı polemikalar aparmışlar.

(Əvvəli ötən sayımızda)

İradə Əliyeva: “Ulu Öndər Heydər Əliyev Azərbaycan qadınına güvəndiyi kimi, Azərbaycan qadını da Ulu Öndər Heydər Əliyevə güvənirdi”

- Bu gün dövlət müstəqilliyimizin 20 illiyi ilə bağlı fikir söyləmək hər birimiz üçün fəxarətdir. Çünki 20 il az zaman olsa da, bu zaman kəsimində neçə-neçə on illərdə əldə olunan uğurlara, nailiyyətlərə nail olmuşuq. Eyni zamanda, bu 20 ildə nələr gördük, nələrin sahibi olduq, nələri ötürə bildik və nələri unuda bildik... Bu illəri hər birimiz yaşamışıq və təbii ki, bütün bu çətinliklərdən bizi böyük Şəxsiyyət Ulu Öndərimiz Heydər Əliyev çıxardı. 1991-ci ildə ikinci dəfə müstəqilliyimizi əldə etsək də, 1993-cü ilin iyunun 15-nə kimi xalqımız çox çətin və ağır günlərini yaşayıb. Biz Ümummilli Liderimiz Heydər Əliyevin SSRİ dövründə, yəni 1969-cu ildə Azərbaycan KP MK-nın birinci katibi işlədiyi müddətdə ölkəmizdə çox böyük nailiyyətlərə imza atdığının şahidi olmuşuq. Lakin Sovet İttifaqı dağıldıqdan sonra, respublikaya səriştəsiz rəhbərlərin gəlməsi Azərbaycanı ağır və çətin duruma gətirib çıxardı. Yenə də belə bir ağır gündə xalqımız ümidgahı olduğu böyük Liderə - Heydər Əliyevə müraciət etdi. 1993-cü ildə xalqın təkidli tələbi və xahişi ilə Ümummilli Liderimiz Heydər Əliyevin iyunun 15-də Azərbaycana ikinci dəfə siyasi hakimiyyətə qayıdışı ölkəmizi düşdüyü çətin durumdan çıxardı. Ulu Öndərimiz Heydər Əliyev ilk öncə ölkədə siyasi sabitliyin bərqərar olunmasına nail oldu. Çünki siyasi sabitlik olmadıqda hansısa inkişafdan, nailiyyətdən danışmaq mümkün deyil. Bu, həm də, Ulu Öndərin ən əsas xarici siyasətinin məğzini təşkil edirdi. Çünki hər bir ölkənin xarici siyasəti bu ölkənin dünya miqyasında tanınması, xarici investorların həmin ölkəyə gəlməsi demək idi. Bu baxımdan Ulu Önər Heydər Əliyev çoxlarının inanmadığı böyük bir layihənin - “Əsrin Müqaviləsi” olan neft kontraktının həyata keçirilməsinə nail oldu. Beləliklə də, ardıcıl olaraq bir-birindən uğurlu olan nailiyyətlər əldə edilməyə başladı. Bu nailiyyətlərdə Azərbaycan qadınları da kənarda qalmırdı. Çünki Ümummilli Liderimiz Heydər Əliyev qadınları çox sevirdi. Heydər Əliyev Azərbaycan qadınına güvəndiyi kimi, Azərbaycan qadını da Ulu Öndərə güvənirdi. Məhz buna görə də Azərbaycan qadını ölkənin həm xarici siyasətində, həm də daxili işlərində yaxından iştirak edirdi. Ulu Öndərin Azərbaycan qadınına diqqət və qayğısının bariz nümunəsi olaraq, Respublikada Qadın Problemləri üzrə Dövlət Komitəsinin yaranması və sonradan bu siyasətin layiqli davamçısı olan ölkə Prezidenti İlham Əliyevin Ailə, Qadın və Uşaq Problemləri üzrə Dövlət Komitəsinin yaradılması ilə bağlı verdiyi Sərəncamı qadınlara dövlət qayğısının məntiqi nəticəsi hesab olunur. Eyni zamanda, bu gün respublikamızda qadınlarımızın fəaliyyət göstərdiyi qeyri hökumət təşkilatlarına dövlətin qayğısı biz qadınları ölkəmizin və müstəqilliyimizin daha da inkişafı yolunda birlik nümayiş etdirməyə sövq edir. Sevindirici haldır ki, bu gün QHT-lərin dövlət tərəfindən maliyyələşməsi və onlara diqqət bizlərdə gələcəkdəki inkişafa daha böyük inam yaradır. Bütün bu deyilənlər məhz müstəqilliyimizin yenidən bərpasının 20 illiyi dövründə Ulu Öndərimiz Heydər Əliyevin uğurlu siyasətinin ölkə Prezidenti İlham Əliyev tərəfindən layiqincə davam etdirilməsinin nəticəsidir.

Şübhəsiz ki, burada Mehriban xanım Əliyevanın da Azərbaycanın ictimai-siyasi həyatında oynadığı mütərəqqi rol barədə fikir söyləməmək olmur. Belə ki, Mehriban xanım Əliyevanın icimai-siyasi fəaliyyətinin ən ümdə qayəsi xalqının, millətinin rifahı üçün çalışmaq, bu işdə Azərbaycan Prezidenti İlham Əliyevin siyasi kursuna dəstək verməkdir. İşgüzarlığı, insanlara doğma, səmimi və mehriban münasibəti göstərir ki, Mehriban xanım Əliyeva Heydər Əliyev Fondunun prezidenti, YUNESKO və İSESKO-nun xoşməramlı səfiri və millət vəkili kimi üzərinə düşən bütün vəzifələri layiqincə yerinə yetirir. Bunu Mehriban xanım Əliyevanın Ümummilli Liderimiz Heydər Əliyevin ölkəmizin sosial-iqtisadi, mədəni tərəqqisi, sivil dünya birliyinə inteqrasiyası, xalqımızın maddi rifahının yaxşılaşması naminə müəyyən etdiyi siyasətin öyrənilməsinə, təbliğinə və bu ideyaların həyata keçirilməsinə verdiyi dəstək, Ulu Öndərin zəngin irsindən bəhrələnərək bu işə xidmət edən genişmiqyaslı layihələrin reallaşmasına etdiyi kömək təsdiq edir.

“Səs” qəzetinin əməkdaşı:

- Heydər Əliyev Fondunun Prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın xalqa, dövlətə xeyirli, gərəkli fəaliyyəti qadınlar üçün nümunə sayıla bilərmi?

Sevinc Hüseynova: “Müstəqil Azərbaycan Ulu Öndər Heydər Əliyevin şah əsəri olmaqla bu gün çiçəklənən ölkəyə çevrilərək dünya miqyaslı uğurlara nail olmuşdur”

- Burada çox dəyərli fikirlər səsləndi və bu fikirlərlə mən də razıyam. Ancaq bugünkü müstəqilliyimizin bərpasının 20 illiyi ilə bağlı nə qədər sözlər deyilsə də, əldə etdiyimiz uğurları ümumiləşdirib yekunlaşdıra bilmərik. Çünki müstəqil Azərbaycan Ulu Öndər Heydər Əliyevin şah əsəri olmaqla, bu gün çiçəklənən ölkəyə çevrilərək, dünya miqyaslı uğurlara nail olmuşdur. Məhz Ulu Öndər Heydər Əliyevin layiqli davamçısı, ölkə Prezidenti İlham Əliyevin və Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın həyata keçirdiyi uğurlu layihələr hər birimizin sevinci və fərəhidir. Mehriban xanım Əliyevanı digərlərindən fərqləndirən ən mühüm cəhət odur ki, onun seçicilərlə görüşü yalnız seçkiöncəsi deyil, bütün 5 il ərzində davam edir. O, deputat seçilmək üçün yox, məhz insanlara xidmət etmək naminə öz vəzifələrini vicdanla, şərəflə yerinə yetirir. Mehriban xanım Əliyeva çoxşaxəli ictimai fəaliyyəti ilə xalqımızın ehtiramını və məhəbbətini qazanıb. O, Heydər Əliyev Fondunun prezidenti, Milli Məclisin deputatı, YUNESKO-nun və İSESKO-nun xoşməramlı səfiri, Azərbaycan Mədəniyyət Fondunun sədri, Azərbaycan Gimnastika Federasiyasının prezidenti, “Azərbaycan-İrs” jurnalının baş redaktorudur. Mehriban xanım müasir Azərbaycan qadınının canlı simvoludur.

Bu gün bütün bu nailiyyətlərə kimliyindən asılı olmayaraq, hər kəs sevinir. Hətta deyərdim ki, həyatda ən küskün insan Mehriban xanım Əliyevaya müraciət edərək, Ondan ümid gözləyir. Bu, Mehriban xanımın insanların qəlbində yaratdığı məhəbbətdən irəli gəlir. Çünki əsası Ulu Öndər Heydər Əliyev tərəfindən qoyulmuş siyasət, ölkə Prezidenti İlham Əliyev və Mehriban xanım Əliyeva tərəfindən uğurla həyata keçirilən böyük işlər xalqın sevgisinə, inamına səbəb olmuşdur. Məhz Mehriban xanım Əliyevanın həyata keçirdiyi layihələrin müsbət nəticəsidir ki, ardıcıl olaraq dünya ölkələri tərəfindən yüksək mükafatlara layiq görülmüşdür. Ən yüksək mükafatlar Mehriban xanım Əliyevaya təqdim olunmuşdur. Ancaq bu mükafatların hamısının başında Azərbaycan vətəndaşının məhəbbəti dayanır. Bu gün Azərbaycan vətəndaşı Mehriban xanım Əliyevanı ümid yeri bilir. Hər bir qadın Mehriban xanım Əliyevanın Azərbaycan xanımı olması ilə fəxr edir. Mən dağ rayonunda yaşayıb fəaliyyət göstərmişəm. Bu gün bu rayonun ən ucqar kəndinə getsən, orada Mehriban xanım Əliyevanın adını çəkməklə öz problemlərinin həllinə nail olacaqları ümidi ilə yaşayırlar. Bütün bunlar onu göstərir ki, Azərbaycan qadınları Mehriban xanım Əliyevanı özlərinə layiq olan nümunə kimi qiymətləndirirlər.

Jalə Əliyeva: “Cəmiyyətdə insanpərvərlik və humanizm ideyalarının möhkəmlənməsinə çalışan Mehriban xanımın Ulu Öndər Heydər Əliyevin anadan olmasının 84-cü ildönümü münasibətilə hələ 2007-ci ilin may ayında parlamentə təqdim etdiyi amnistiya aktı layihəsi də Ümummilli Liderin humanist siyasətinə sədaqətin əyani nümayişi oldu”

- Həqiqətən də, bu deyilənlər reallıqlardır. Hər hansı bir yerə ayaq basırsansa, orada Mehriban xanım Əliyevanın xeyirxahlığından, humanistliyindən, insani keyfiyyətlərindən və səmimiliyindən danışılır. Çünki onun gördüyü işlər artıq göz qabağındadır və bu işlərin müsbət nəticəsidir ki, Mehriban xanım Əliyevanın Azərbaycan xalqının nümayəndəsi olması ilə fəxarət hissi duyurlar. Azərbaycanın birinci xanımı üzərinə götürdüyü xoşməramlı missiya ilə həm də insan hüquqlarının qorunmasına, vətəndaş cəmiyyəti ideyalarının cəmiyyətdə daha da möhkəmlənməsinə, habelə, cəza siyasətinin humanistləşdirilməsi prosesinə öz töhfələrini verir. Cəmiyyətdə insanpərvərlik və humanizm ideyalarının möhkəmlənməsinə çalışan Mehriban xanımın Ulu Öndər Heydər Əliyevin anadan olmasının 84-cü ildönümü münasibətilə hələ 2007-ci ilin may ayında parlamentə təqdim etdiyi amnistiya aktı layihəsi də Ümummilli Liderin humanist siyasətinə sədaqətin əyani nümayişi oldu.

Amnistiya aktı nəticəsində azadlıqdan məhrum etmə qismində cəza çəkən məhkumlardan təqribən 1500 nəfəri cəzaçəkmə müəssisələrindən azad edildi, habelə, azadlıqdan məhrumetmə cəzası ilə bağlı olmayan cəzalara məhkum olunmuş təqribən 7500 nəfər şəxs cəzasından azad edildi. Onu da deyim ki, amnistiya qərarlarının qəbulu ilə bağlı ölkədə formalaşmış müsbət ənənənin Mehriban Əliyeva tərəfindən geniş miqyasda davam etdirilməsi Azərbaycanda humanist dəyərlərin ictimai şüurda möhkəmlənməsinə xidmət edir. Mehriban xanım humanizm və sevgi hisslərini oyadan milli bayramımız olan Novruz bayramı münasibətilə 2008-ci ildə il növbəti amnistiya təşəbbüsü irəli sürərək, bununla bağlı qərar layihəsini Milli Məclisə təqdim etdi. Mehriban Əliyevanın son 5 ildə 2 dəfə amnistiya təşəbbüsü ilə çıxış etməsi yüksək insani dəyərlərin, mərhəmət hissinin cəmiyyətə aşılanmasına, ictimai şüura hakim kəsilməsinə yönəlib.

Məhəbbət İbrahimova: “Biz qadınlar yaxşı bilirik ki, Ümummilli Liderimiz Heydər Əliyev 1993-cü ildə ikinci dəfə hakimiyyətə qayıtmasaydı, bu gün nə bu nailiyyətlərdən danışa bilərdik, nə də ölkəmiz inkişaf etmiş dünya dövlətləri sırasında ola bilərdi”

- Burada Mehriban xanım Əliyeva haqqında fikirlər səsləndi. Mən bir səhiyyə işçisi kimi Mehriban xanım Əliyevanın bu sahəyə göstərdiyi qayğıdan danışmaq istərdim. Hər kəsin gözü önündə neçə-neçə kimsəsizlərə, ata-ana qayğısından məhrum olmuş körpələrə, xəstə uşaqlara göstərdiyi ana nəvazişi Mehriban xanım Əliyevanın qayğıkeşliyindən irəli gəlir. Humanizm, mərhəmət, vətənpərvərlik, xeyirxahlıq hisslərinə söykənən fəaliyyətilə cəmiyyətdə böyük nüfuz qazanmış Mehriban xanım Əliyeva “Uşaq evləri və internat məktəblərinin inkişafı proqramı”nın hazırlanıb həyata keçirilməsini məqsədəuyğun hesab edib.

Respublikamızdakı uşaq evləri və internat məktəblərindəki mövcud problemlərin həll olunmasına yönəldilən proqram fondun təhsil sahəsindəki fəaliyyətinin əsas istiqamətlərindən birinə çevrilib. 50-dək uşaq müəssisəsində aparılan yenidənqurma və tikinti-təmir işləri zamanı onların zəruri avadanlıqla təmin edilməsi, yeni ədəbiyyatla zəngin kitabxanaların yaradılması, informasiya texnologiyalarının tətbiqi, sinif otaqlarının interaktiv təhsil üçün uyğunlaşdırılması təmin edilib. Heydər Əliyev Fondunun səhiyyə sahəsində ən çox əks-səda doğuran layihələrindən biri məhz “Diabetli uşaqlara ən yüksək qayğı” layihəsi olub. Layihə fondun dəstəyi əsasında Azərbaycan Diabet Cəmiyyəti və Danimarkanın “Novo Nordisk” şirkəti ilə birgə əməkdaşlıq nəticəsində həyata keçirilib. Layihə çərçivəsində Azərbaycanda diabet xəstəliyinə düçar olmuş 14 yaşınadək uşaqlar müntəzəm olaraq lazımi miqdarda insulin preparatları və şpris-qələmlərlə təmin ediliblər.

Ümumiyyətlə, bütün bu uğurlar müstəqilliyimizin 20 ili ərzində əldə olunan nailiyyətlərdir. Biz qadınlar yaxşı bilirik ki, Ümummilli Liderimiz Heydər Əliyev 1993-cü ildə ikinci dəfə hakimiyyətə qayıtmasaydı, bu gün nə bu nailiyyətlərdən danışa bilərdik, nə də ölkəmiz inkişaf etmiş dünya dövlətləri sırasında ola bilərdi. Şükür Allaha ki, Ulu Tanrı bizi ümidsiz etmədi və xalqımız bütün türk dünyasının Lideri olan Heydər Əliyevi bizə bəxş etdi. Bizlər həm də ona görə xoşbəxtik ki, Ulu Öndər Heydər Əliyevin yaratdığı və bizə miras qoyduğu müstəqil Azərbaycana Onun layiqli davamçısı, ölkə Prezidenti İlham Əliyev rəhbərlik edir. Biz qadınlar bir də ona görə xoşbəxtik ki, bu uğurlu siyasəti layiqincə davam etdirən Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyeva Azərbaycan xanımlığının ən yüksək zirvəsində dayanır. Bizlər Mehriban xanım Əliyevadan nümunə götürməklə fəxr edirik.

Aidə Hüseynzadə: “Mehriban xanım Əliyeva öz müqəddəs əməlləri ilə özündə ən ali xüsusiyyətləri cəmləşdirib”

- Burada Mehriban xanım Əliyevanın səhiyyə sahəsinə göstərdiyi qayğıdan geniş danışıldı və qeyd etmək istərdim ki, çalışdığım poliklinikada da xəstə uşaqlar müalicə olunur. Qeyd edim ki, Mehriban xanım Əliyeva hər zaman belə uşaqlara xüsusi diqqət və qayğı göstərərək, onların müalicəsi üçün bütün imkanları yaradır. Keçən il bizim poliklinikada da qeydiyyatda olan xəstə uşaqlar Heydər Əliyev Fondu hesabına xaricə göndərilərək müalicə olundular. Bu gün həmin uşaqlar, həmçinin, valideynlər Mehriban xanım Əliyevanın bu fəaliyyətini görərək daha böyük ümidlə Ona üz tuturlar. Həmin valideynlərin tez-tez işlətdikləri bir fikri diqqətinizə çatdırmaq istərdim “Göydə Allah, yerdə Mehriban xanım Əliyeva bizi ümidsiz qoymaz”. Budur Azərbaycan qadınının mehribanlığı, humanistliyi, səmimiliyi və fədakarlığı. Mehriban xanım Əliyeva öz müqəddəs əməlləri ilə özündə ən ali xüsusiyyətləri cəmləşdirib.

Tünzalə Süleymanova: “İnsanlar daim Mehriban xanım Əliyevanın qayğıkeşliyinin şahidi olublar”

- Heydər Əliyev Fondu haqqında çox danışmaq olar. Çünki görülən işlər, reallaşdırılan nəhəng layihələr bunu deməyə əsas verir. Ancaq bir məsələyə toxunmaq istərdim. Bilirsiniz ki, dünyada fəaliyyət göstərən fondlar çoxdur, ancaq bu fondlar Heydər Əliyev Fondu kimi fəaliyyət göstərirmi? Bu gün hər birimiz yaxşı görürük ki, Azərbaycanın hər bir vətəndaşı, kimliyindən asılı olmayaraq, Heydər Əliyev Fonduna, Onun prezidenti Mehriban xanım Əliyevaya üz tutur. Çünki insanlar daim Mehriban xanım Əliyevanın qayğıkeşliyinin şahidi olublar.

Şəfəq Cəfərova: “Mehriban xanımın öz fəaliyyətini Ümummilli Lider Heydər Əliyevin nurlu ideyalarına və Prezident İlham Əliyevin siyasətinə uyğun qurması bu yolun gələcəyinin çox parlaq olacağını şərtləndirir “

- Bu gün hər birimiz Ulu Öndərimiz Heydər Əliyevin şah əsəri olan müstəqil Azərbaycanda yaşamağımızla və bu ölkəyə İlham Əliyevin rəhbərlik etməsi ilə fəxr edirik. Çünki dövlət başçısı İlham Əliyevin fəaliyyətinin başlıca qayəsi və amalı hər bir Azərbaycan vətəndaşının xoşbəxt yaşaması, torpaqlarımızın işğaldan azad edilməsi, ölkəmizin sosial-iqtisadi inkişafını, Azərbaycanın dünya dövlətləri arasında özünə layiqli yer tutmasını və qüdrətlənməsini təmin etməkdir. Son illər ölkəmizdə görülən genişmiqyaslı işlər, həyata keçirilən layihələr vətəndaşların sosial rifahının daha da yaxşılaşmasına, cəmiyyətimizin demokratikləşməsinə xidmət edən çoxşaxəli islahatlar məhz Prezident İlham Əliyevin xalqa verdiyi vədlərin əməli işə çevrildiyinin sübutudur.

Eyni zamanda, bu gün hər bir azərbaycanlının qarşısında duran mühüm vəzifələrdən birincisi vətəndaşlıq mövqeyindən, ümummilli mənafelərdən çıxış edərək, Azərbaycanın yüksəlişi üçün çalışan Prezident İlham Əliyevin siyasi kursuna dəstək vermək, bu işdə əlindən gələni əsirgəməməkdir. Mehriban xanım Əliyevanın əsil vətəndaş mövqeyindən çıxış edərək ölkəmizdə gedən inkişaf proseslərinə verdiyi töhfələr, milli mədəni irsimizin qorunması və təbliği, təhsilin səviyyəsinin yüksəlişi, Azərbaycan həqiqətlərinin dünyaya çatdırılması istiqamətində misilsiz fəaliyyəti hər bir vətəndaş üçün, o cümlədən, biz qadınlar üçün nümunə sayıla bilər. Birinci Ledi özünün həyat məramını, ömrünün mənasını insanlara, xüsusilə, yoxsulluq içində yaşayan, qayğı və diqqətə daha çox ehtiyacı olanlara yardım etməkdə, onları sevindirməkdə görür. Mehriban xanımının öz fəaliyyətini Ümummilli Lider Heydər Əliyevin nurlu ideyaları və Prezident İlham Əliyevin siyasətinə uyğun qurması bu yolun gələcəyinin çox parlaq olacağını şərtləndirir.

(Ardı var)

RƏFİQƏ KAMALQIZI,

RÖVŞƏN NURƏDDİNOĞLU

Səs.- 2011.- 14 oktyabr.- S.8-9.