Azərbaycan Dövlət Müstəqilliyinin 20 illiyi dünya ölkələrində qeyd olunur

Azərbaycan Respublikasının Dövlət Müstəqilliyinin 20-ci ildönümü münasibətilə respublikamızın bütün bölgələrində silsilə tədbirlər davam etməkdədir. Bu tədbirlər vətənimizin hüdudlarını aşaraq ayrı-ayrı diaspora təşkilatları tərəfindən geniş şəkildə qeyd olunmaqdadır.

KANADA

Kanadanın Ontario vilayətinin London şəhərində Azərbaycan Respublikasının Dövlət Müstəqilliyinin bərpasının 20-ci ildönümünə həsr olunmuş tədbir keçirilib. Azərbaycan Kanada Türk Assosiasiyasının təşkilatçılığı ilə Platts Lane Community Centre -də keçirilən tədbirdə Azərbaycan və türk diasporlarının nümayəndələri ilə yanaşı, yerli ictimaiyyətin nümayəndələri də iştirak ediblər. Azərbaycan Kanada Türk Assosiasiyasının sədri Kəmalə Şiriyeva tədbir iştirakçılarına ölkəmizin müstəqillik tarixi, respublikanın keşməkeşli günləri, eləcə də, Azərbaycanın son illər əldə etdiyi nailiyyətlər barədə məlumat vermişdir. Tədbir çərçivəsində təşkil olunmuş Azərbaycanın mədəniyyət və incəsənət nümunələrindən ibarət sərgi qonaqların böyük marağına səbəb olub.

İSVEÇ KRALLIĞI

İsveç Krallığının paytaxtı Stokholmda Azərbaycan Respublikası Diasporla İş üzrə Dövlət Komitəsinin dəstəyi ilə Azərbaycan Federasiyası - İsveç təşkilatı tərəfindən Azərbaycan Respublikasının Dövlət Müstəqilliyinin bərpasının 20-ci ildönümünə həsr olunmuş bayram tədbiri keçirilib. Azərbaycanın İsveç Krallığındakı fövqəladə və səlahiyyətli səfiri Rafael İbrahimovun, Azərbaycan Respublikası Diasporla İş üzrə Dövlət Komitəsinin əməkdaşı Elnur Əliyevin, Türkiyə Cümhuriyyətinin bu ölkədəki səfirliyinin əməkdaşlarının, Azərbaycan və Türk diasporunun nümayəndələrinin iştirak etdiyi tədbirə, ümumilikdə, 500-dək insan qatılıb.

Tədbirdə Azərbaycan Respublikasının İsveç Krallığındakı səfiri Rafael İbrahimov, Azərbaycan Federasiyası - İsveç təşkilatının sədri Səttar Sevgin və digərləri çıxış edərək Azərbaycan müstəqillik əldə etdiyi 20 il ərzində keçdiyi inkişaf yolundan, əldə etdiyi nailiyyətlərdən danışmışlar. Rəsmi hissədən sonra tədbirin bədii hissəsi olmuş, qonaqlar Azərbaycandan gəlmiş mahir ifaçı Nəzakət Teymurovanın oxuduğu mahnıları heyranlıqla dinləyiblər.

DANİMARKA

Danimarka Krallığının paytaxtı Kopenhagen şəhərində Azərbaycan Respublikası Diasporla İş üzrə Dövlət Komitəsinin dəstəyi ilə həmin ölkədə fəaliyyət göstərən “Vətən” Cəmiyyəti tərəfindən Azərbaycan Respublikasının Dövlət Müstəqilliyinin bərpasının 20-ci ildönümü münasibətilə təbir keçirilib.

“Vətən” Cəmiyyətinin sədri Səfər Sadiqi tədbir iştirakçılarını salamladıqdan sonra Azərbaycanın müstəqilliyi uğrunda şəhid olmuş insanların ruhu 1 dəqiqəlik sükutla yad edilib. Azərbaycan Respublikasının Dövlət Himni səsləndikdən sonra ölkəmizin Böyük Britaniya və Danimarka Krallıqlarındakı fövqəladə və səlahiyyətli səfiri Fəxrəddin Qurbanov Azərbaycanın apardığı sülhməramlı siyasət, 20 il ərzində respublikanın qazandığı nailiyyətlər barədə məlumat verib.

Tədbirdə Danimarka parlamentinin deputatı Hüseyn Arac, iqtidarda olan Sosial-Demokrat Partiyasının liderlərindən biri olan Yıldız Adogan, Türkiyə və Ukraynanın Danimarkadakı səfirliklərinin nümayəndələri, Diasporla İş üzrə Dövlət Komitəsinin nümayəndəsi Elnur Əliyev, Böyük Britaniyadakı Azərbaycan səfirliyinin ikinci katibi Fərhad İsayev, Türk Cəmiyyətinin sədri Bahadır Gülər, Türkmən Cəmiyyətini sədri Yurtan bəy, Uyğur Cəmiyyətinin sədri Abdul Setdar, Çeçen Cəmiyyətinin sədri İlyas Musayev, Danimarka ictimaiyyətinin nümayəndələri, televiziya kanallarının və mətbuat orqanlarının nümayəndələri iştirak ediblər.

Tədbir iştirakçılarına Azərbaycanın tarixi, mədəniyyəti və incəsənətini əks etdirən kitablar, broşurlar və Azərbaycana haqqında film nümayiş etdirilib. Daha sonra Azərbaycan musiqi nömrələri səslənib.

Danimarka Universitetinin professoru Karl Erik Fredeskov və politoloq Vetslav Kicilenko qonaqlar adından azərbaycanlıları Azərbaycan Respublikasının Dövlət Müstəqilliyinin bərpasının 20-ci ildönümü münasibətilə təbrik etmiş, ölkəmizin tanıdılması və təbliği üçün bu cür tədbirlərin keçirilməsinin zəruri olduğunu vurğulayıblar.

ALMANİYA

Almaniyadakı Azərbaycan və Türk Diasporları Azərbaycanın müstəqilliyinin ildönümünü birgə qeyd ediblər. Tədbirdə Azərbaycan Respublikasının Almaniyadakı səfiri Pərviz Şahbazov və Türk Cümhuriyyətinin Berlindəki Baş Konsulu Mustafa Polat iştirak ediblər. Türk-Azərbaycan Birliyinin sədri, alman Bundestaqının keçmiş üzvü professor Hakki Keskin qonaqları salamlayaraq, bildirmişdir ki, Azərbaycanın Ulu Öndəri Heydər Əliyevin “Bir millət, iki dövlət” idealından çıxış edərək iki qardaş ölkənin bu ulusal bayramlarını Berlində cəmiyyət tərəfindən qeyd edilməsi qərara alınıb. Hakki Kəskin daha sonra Türk-Azərbaycan Birliyininin yaradılmasının tarixi, zərurəti və məqsədləri haqqında qonaqlara məlumat verərək, bildirib ki, cəmiyyətin məqsədi “Bir milət, iki dövlət” ifadəsinin təsadüfi olmadığını işgüzar əməldə göstərməkdir. “Almaniyada çoxlu sayda dərnək, təşkilat və cəmiyyətlərin fəaliyyət göstərdiyi halda yeni bir birliyin yaradılmasına ehtiyac varmı?” ritorik sualına Hakki Keskin cavab verərək demişdir ki, onun fikrincə, Türkiyə türklərinin Azərbaycana sevgisi platonik bir xarakter daşıyır. Türklərin Azərbaycan musiqisinə, mədəniyyətinə maraqlarının böyük olmasına baxmayaraq, həmin ölkəni demək olar ki, az tanıyırlar. Cənab Haqqı Kəskin bildirmişdir ki, Azərbaycana ilk səfəri zamanı o, ölkəni özü üçün bir növ kəşf və özünü vətənindəki kimi hiss edib. Həmin səfərindən sonra onda Azərbaycanla daha yaxından tanış olmaq hissi yaranmışdır və bir siyasətçi kimi təbii olaraq, Azərbaycanın siyasi həyatı ilə maraqlanmağa başlayıb. 20 Yanvar və Dağlıq Qarabağ müharibəsi ilə bağlı araşdırmalar aparmış, bu hadisələrin səbəblərini öyrənmiş və onların həlli ilə maraqlanıb. Almaniyada yaşayan türklərin bütün baş verənlər haqda demək olar ki, məlumatsız olduğunu, eləcə də, Almaniya ictimaiyyətində bu haqda tamamilə məlumat olmadığını aşkara çıxarıb. Azərbaycan səfirliyi ilə görüşlərindən sonra alman parlamentində və bir sıra siyasi qurumlarda həmin problemlərin gündəliyə çıxarılmasına və Dağlıq Qarabağ və Xocalı faciəsi ilə bağlı bir sıra qərarların qəbul edilməsinə nail olduğunu bildirmişdir. O, qeyd edib ki, ermənilər Azərbaycana qarşı apardıqları irticaçı siyasəti ört-basdır etmək üçün hər zaman yalançı soyqırımı iddiaları ilə çıxış edərək, 1915-ci ildəki hadisələri ön plana çəkirlər. Məhz 96 il əvvəl baş verənlərin soyqırım olmadığını sübut etmək və erməni siyasətinə qarşı səviyyəli şəkildə mübarizə aparmaq üçün birlik Ermənistan-Azərbaycan problemini Almaniya ictimaiyyətində və dünyada tanıtmaq kimi mühüm bir vəzifəni qarşısına məqsəd qoyub. Birlik Atatürkün o vaxt dediyi “Azərbaycanın sevinci sevincimiz, kədəri kədərimizdir” sözlərinin ciddiliyinə fikir verməli və bu yolda lazımi işlər görməlidir. O bildirmişdir ki, Türk-Azərbaycan Birliyi Azərbaycan və türk xalqının yaxınlaşması, dostluğu yolunda yeni və mühüm addımlar atacaq. Çıxışının sonunda cənab Haqqı Kəskin AAKM-nin də bu sahədə işlər apardığını, türk icmasının və Azərbaycan diasporunun yaxınlaşmasında fəaliyyətini vurğulayıb.

AAKM-nin icraçı direktoru, xanım Samira Patzer-İsmailova Türk-Azərbaycan Birliyinin qurucu heyətini bir illik fəaliyyəti münasibətilə təbrik etdərək, Türkiyə ilə Azərbaycan arasındakı dostluq münasibətlərinin xüsusi bir məna daşıdığını deyib. Azərbaycanın müstəqilliyinin hər iki xalqa verdiyi töhfələrdən birinin də dostluq və qardaşlıq münasibətləri olduğunu qeyd edib. O bildirib ki, Türk-Azərbaycan Birliyi bu münasibətlərin inkişafına məhz diaspor içərisində olan gündəlik həyatda yeni bəhrələr verəcək.

ZÜMRÜD BAYRAMOVA

Səs.- 2011.- 19 oktyabr.- S. 11.