Heydər Əliyev təhsil sahəsindəki islahatların banisidir

1993-cü ildə Ulu Öndərin yeni siyasi arenaya qayıdışı, əslində, milli təhsilimizi dağılmaq təhlükəsindən xilas etdi. Ümummilli Liderimiz Heydər Əliyevin hakimiyyətə gəlişi bu mühüm sahəni yenidən özünün inkişaf yoluna qoydu. Müəllimlərimizdə gələcəyə, sabaha inam hissi yarandı, öz iş yerlərini tərk edib başqa sahələrə üz tutan pedaqoqlarımız yenidən məktəbə qayıtdılar.

Dövlət başçısının Sərəncamı ilə təhsil sahəsində islahatlar üzrə dövlət komissiyası yaradıldı. Bu komissiya “Azərbaycan Respublikasının təhsil sahəsində islahat proqramı”nı hazırladı və həmin proqram ölkə başçısının 15 iyun 1999-cu il tarixli Fərmanı ilə təsdiq edildi. Proqramda demokratikləşmə, humanistləşdirmə, inteqrasiya, diferensiallaşdırma fərdiləşmə kimi mühüm vəzifələr qoyulmuşdur. Əsas məqsəd milli zəminə və ümumbəşəri dəyərlərə əsaslanan, beynəlxalq standartlara, xüsusilə də, Qərb standartlarına uyğun milli təhsil sisteminin yaradılması idi. Ulu Öndər Heydər Əliyev cəmiyyətin inkişafında təhsilin rolundan bəhs edərkən deyirdi: “Bu təhsil sisteminin nə qədər dəyərli olduğunu onda görmək olur ki, Azərbaycanda yüksək savada, biliyə, ixtisasa, yüksək elmə malik insanlar var və onlar cəmiyyətin çox hissəsini təşkil edir. Əgər bunlar olmasaydı, Azərbaycanın iqtisadiyyatı belə güclü inkişaf edə bilməzdi. Bunlar olmasaydı, biz indi Azərbaycanı müstəqil dövlət kimi idarə edə bilməzdik. Onları qiymətləndirmək lazımdır və on illərdə əldə etdiyimiz nailiyyəti heç vaxt unutmamalıyıq”.

Heydər Əliyev müstəqil Azərbaycanda milli təhsilin quruculuğu sahəsindəki islahatların həqiqi memarıdır. Bu böyük şəxsiyyətin yenidən hakimiyyətə xilaskar missiyalı qayıdışı, Azərbaycanın sosial-iqtisadi, siyasi və mədəni həyatının bütün sahələrində olduğu kimi, təhsil sahəsində də tənəzzülün qarşısını almağa imkan verdi.

Müasir zamanda xalqımızın təhsilə marağı durmadan artmaqdadır. Bu isə, hər şeydən əvvəl, ötən yüzillikdə Azərbaycan xalqının intellektual potensialının, maariflənməsinin əsas istiqamət və göstəricilərindən biri sayılmalıdır. Respublikamızda təhsilin, elmin, mədəniyyətin və ölkənin intellektual potensialının keyfiyyətcə beynəlxalq standartlara uyğunlaşdırılması XXI əsr milli təhsil quruculuğunun strateji xəttidir. Tarixi bir məqamı da xatırlatmaq yerinə düşər ki, XXI əsr YUNESKO tərəfindən “Təhsil əsri” elan olunmuşdur. Yeni əsrdə bəşər sivilizasiyasını ən çox düşündürən narahat edən və maraqlandıran qlobal məsələ təhsilin inkişafına və keyfiyyətcə yüksəlişinə nail olmaqdan, cəmiyyətin tərəqqisində təhsilin müstəsna rolunu daha da yüksəltməkdən ibarətdir.

Heydər Əliyev tərəfindən milli təhsilimizə olan qayğı və diqqət bu gün Prezident İlham Əliyev tərəfindən davam etdirilir. Bu məsələdə Heydər Əliyev Fondunun prezidenti, millət vəkili, İSESKO və YUNESKO-nun xoşməramlı səfiri Mehriban xanım Əliyevanın da xidmətləri danılmazdır.

Heydər Əliyev xalqımızın son minillik tarixi ərzində yetirdiyi ən böyük şəxsiyyətlərdən biridir. Heydər Əliyev gənc istedadlara xüsusi həssaslıqla yanaşırdı. Ümummilli Lider “Azərbaycanda gənc istedadlara dövlət qayğısı haqqında” ayrıca Fərman imzalamışdır. Fərmana uyğun olaraq istedadların “Qızıl kitab” və Prezidentin xüsusi təqaüdü təhsis edilmişdir. Böyük siyasi xadim Heydər Əliyevin qarşıya qoyduğu məqsəd önəmli idi. Azərbaycan ən müxtəlif sahələrdə işləməyi bacaran kadrlar yetişdirən mükəmməl təhsil sisteminə malik olmalıdır. Dövlət başçısı 2000-ci il 13 iyun tarixində “Azərbaycan Respublikasında təhlil sistemininin təkmiləşdirilməsi haqqında” Fərman imzalamışdır. Fərmana uyğun olaraq ölkənin dörd aparıcı ali təhsil müəlliminə - Bakı Dövlət Universitetinə, Azərbaycan Dövlət Neft Akademiyasına, Azərbaycan Tibb Universitetinə və Azərbaycan Kənd Təsərrüfatı Akademiyasına maliyyə müstəqilliyi, ayrı-ayrı ali məktəblərə isə universitet statusu verilmişdir.

Ümummilli Liderimiz Heydər Əliyev elmin, təhsilin xalqın, ölkənin həyatındakı misilsiz rolunu yüksək qiymətləndirərək, bu sahələri özünəməxsus müdrikliklə inkişaf yoluna yönəltmişdir. Heydər Əliyev siyasi kursunun layiqli davamçısı, dövlət başçısı cənab İlham Əliyev tərəfindən layiqincə davam etdirilməsi bir ziyalı kimi mənə ADPU-da tələbələrə tədris etdiyim fənni böyük ruh yüksəkliyi ilə deməyə imkan yaradır. Axı mən də Böyük Öndər Heydər Əliyev kursunun davamçılarından olmuşam.

1971-ci ildə ADU-nun tələbələri sırasından ilk tələbə deputat seçilmişəm. Həmin ərəfədə bütün dövlət tədbirlərində iştirak etmiş və MK-nın I katibi Heydər Əliyevlə dəfələrlə görüşmüşəm. İllər ötsə də, bunlara görə özümü xoşbəxt sayır, o anları xoş xatirələrlə yaşayıram. Xalqımızın yeni lideri İlham Əliyevin 2003-cü ildən bəri dövlət başçısı vəzifəsində uğurlu fəaliyyətinə nəzər saldıqda, burada təhsilə prioritet münasibət bəsləndiyi aydın görünür. Cənab İlham Əliyevin ardıcıl səyləri sayəsində ölkəmizdə təhsil Azərbaycanın davamlı inkişaf strategiyasının ən önəmli istiqamətlərindən birinə çevrilmişdir. Ölkə Prezidenti cənab İlham Əliyevin söylədiyi: “Uşaqlar çox yaxşı şəraitdə oxumalı, yaxşı bilik almalıdır”. Bu sözlər dövlətimizin təhsilə, gənc nəslin təhsili ilə bağlı siyasətinin perspektivlərini, ümummilli strateji məqsədi özündə inkişaf etdirir. Ölkə başçısının qəbul etdiyi proqrama əsasən, bütün məktəblərdə kompyuter sinfi yaradılmalı və internetə çıxış təmin olunmalıdır. Şagirdlərin elmi biliklərə yiyələnmələri, dünyada gedən proseslərə qoşulmalar, xarici dilləri öyrənmələri, yeni texnologiyaları mənimsəmələri üçün daha da mükəmməl inkişafdır.

Dövlət başçısı İlham Əliyevin son illərdə ölkəmizdə məktəb tikintisinin geniş vüsət almasına diqqət yetirməsi, təhsildə yeni keyfiyyət göstəricisinə gətirib çıxarmışdır. Dövlətimizin başçısı cənab İlham Əliyevin təhsil, elm, mədəniyyət və mənəvi sərvətlərin inkişafı ilə bağlı gördüyü işlər bundan sonra da davam etdiriləcəkdir.

Ofelya Mürsəlova,

ADPU-nun pedaqogika

kafedrasının baş müəllimi

Səs.- 2011.- 25 oktyabr.- S. 4.