Polşada Avropa Tərəfdaşlığının Mədəniyyət Konqresi

Polşa Respublikasının Lüblin şəhərində təşkil olunmuş Avropa Birliyinin Şərq Tərəfdaşlığı ölkələri ilə mədəniyyət sahəsində siyasətinin əsas istiqamətlərinin müəyyənləşdirilməsinə, bu sahədə proqram imkanlarından daha səmərəli istifadə edilməsinə, eləcə də, iştirak edən ölkələr arasında əlaqələrin möhkəmləndirilməsinə yönəldilmiş Avropa Tərəfdaşlığının Mədəniyyət Konqresində Azərbaycan Respublikası Mədəniyyət və Turizm Nazirliyinin Mədəniyyət siyasəti şöbəsinin Qeyri-maddi mədəni irs sektorunun müdiri Yaşar Hüseynli iştirak edib.

Mədəniyyət və Turizm Nazirliyindən verilən məlumata görə, Avropa Tərəfdaşlığının Mədəniyyət Konqresinə Azərbaycandan, həmçinin, Azərbaycan Rəssamlar İttifaqının üzvü, rəssam Səbinə Şıxlinskaya, Bakı Marionet Teatrının direktoru, dizayner Tərlan Qorçu, Milli və Beynəlxalq Tədqiqatlar Müstəqil Mərkəzinin prezidenti, politoloq Leyla Əliyeva dəvət olunublar.

Məlum olduğu kimi, Avropa Birliyinin Şərq Tərəfdaşlığı proqramı Azərbaycan, Belarus, Ermənistan, Gürcüstan, Moldova və Ukrayna üçün Avropa Birliyi ilə daha sıx siyasi, iqtisadi inteqrasiyanı və bu məqsədlə sadalanan ölkələrdə aparılan islahatlara Avropa Birliyi tərəfindən geniş dəstək imkanlarını nəzərdə tutub. Avropa Birliyinin rəsmiləri, Şərq Tərəfdaşlığı ölkələrinin dövlət qurumları və qeyri-hökumət təşkilatlarının nümayəndələri, maraq göstərən digər beynəlxalq birliklərin nümayəndələrinin qatıldığı Avropa Tərəfdaşlığının Mədəniyyət Konqresinin əsas məramlarından biri də Avropa Birliyinin Şərq Tərəfdaşlığı Proqramı çərçivəsində mədəniyyətlərin inteqrasiyasına daha böyük diqqətin ayrılmasından ibarət olub.

Polşa Respublikasının Xarici İşlər Nazirliyi ilə Lüblin Şəhər Meriyası tərəfindən birgə təşkil edilən Avropa Tərəfdaşlığının Mədəniyyət Konqresi “Avropa Tərəfdaşlığı mədəni layihə kimi” adlı açılış sessiyası ilə başlanaraq, “Mədəniyyətin həmmövcudluqla üzləşməsi”, “Mədəniyyətin təşkilatçılıqla və müstəqilliklə üzləşməsi”, “Mədəniyyətin təhsillə üzləşməsi”, “Mədəniyyətin inkişafla üzləşməsi” kimi panel sessiyalarla davam etdirilib. “Aqora” (Qədim Yunanıstan şəhərlərində ümumvətəndaş toplantılarının baş verdiyi mərkəzi meydan) təşkilati formatında keçirilən Avropa Tərəfdaşlığının Mədəniyyət Konqresi zamanı mədəniyyətin inkişafına dair müxtəlif ideyalar sərbəst formada irəli sürülür, əsaslandırılır, müzakirə edilib.

Avropa Tərəfdaşlığının Mədəniyyət Konqresi zamanı səslənən təkliflərin əksəriyyətinin mədəniyyət fəaliyyətinə (maddi və qeyri-maddi mədəni irs, incəsənət, mədəni sənayelər) deyil, daha çox mədəniyyət siyasətinə aid olduğunu qeyd edərək, məsələ ilə əlaqədar Yaşar Hüseynli tərəfindən Şərq Tərəfdaşlığının Mədəniyyət Siyasəti Konsepsiyasının hazırlanması təklifi irəli sürülüb. Sözügedən konseptual sənəddə Avropa Birliyinin müvafiq qurumları və ayrı-ayrı ölkələri tərəfindən Şərq Tərəfdaşlığı Proqramının iştirakçı dövlətləri üçün mədəniyyət siyasətinin qanunvericilik, idarəetmə, maliyyələşdirilmə, informasiya təşviqat, insan resursları, infrastruktur və beynəlxalq təminatlarının təkmilləşdirilməsi istiqamətində dəstək formaları öz əksini tapmalıdır.

Bu təklif tədbir iştirakçıları və təşkilatçılar tərəfindən “meqa-təklif” kimi yüksək dəyərləndirilərək qeyd olunub ki, Şərq Tərəfdaşlığının Mədəniyyət Siyasəti Konsepsiyasının hazırlanacağı təqdirdə, adıçəkilən strateji sənəd Avropa Birliyiilə Şərq Tərəfdaşlığı Proqramının iştirakçı ölkələri arasında əməkdaşlığın mədəniyyət siyasəti sahəsində “Yol xəritəsi” rolunu oynaya bilər. Təkliflə əlaqədar dəlilləri nəzərə alaraq, Konqres iştirakçılarıŞərq Tərəfdaşlığının Mədəniyyət Siyasəti Konsepsiyası layihəsinin mümkün qədər qısa müddətdə hazırlanması məqsədilə müvafiq İşçi Qrupunun yaradılmasının zəruriliyini vurğulayıblar.

Zümrüd

Səs.- 2011.- 27 oktyabr.- S. 12.