Müstəqilliyin 20 yaşını qeyd edən Müasir Azərbaycan

Ana Vətənimiz Azərbaycan bu il dövlət müstəqilliyinin əldə olunmasının 20 - ci ildönümünü qeyd edir. Azərbaycan Prezidenti cənab İlham Əliyevin 21.01.2011-ci il tarixli Sərəncamı ilə müstəqilliyimizin bərpasının 20 illiyi dövlət səviyyəsində müxtəlif tədbirlərlə təntənəli şəkildə qeyd olunacaq. Azərbaycanın çətin sınaq dövrü yaşayaraq xalqımızın qanı və canı, minlərlə şəhidləri bahasına əldə etdiyi, özünə ən böyük sərvət və nemət saydığı müstəqilliyinin yaranma tarixinə və sonrakı qazandığı uğurlara qısaca nəzər yetirək:

1991-ci il avqustun 30-da Azərbaycan Ali sovetində İstiqlaliyyət haqda bəyannamə qəbul olundu. 1991-ci il oktyabrın 18-də isə qəbul olunmuş “Azərbaycan Respublikasının Müstəqilliyi haqqında Konstitusiya Aktı” ilə Azərbaycan Xalq Cümhuriyyətinin varisi olduğunu bəyan edən Azərbaycan, öz dövlət müstəqilliyini və suverenliyini beynəlxalq aləmə bildirib. Bu andan ölkəmiz istiqlal bir ölkədir. Həmin gün tariximizə dövlət müstəqilliyinin bərpası günü kimi daxil olub. Azərbaycan Xalq Cümhuriyyətinin bayrağı, himni və gerbi dövlət atributları kimi qəbul edildi. Azərbaycan Demokratik Respublikasının süqutundan 71 il sonra dövlətimiz Sovet hakimiyyətindən qurtularaq öz müstəqilliyinə qovuşdu. Azərbaycan Respublikasının Prezidentinin 15 Oktyabr 1994-cü il tarixili fərmanı ilə isə 18 Oktyabr hər il Müstəqillik günü kimi hər il qeyd edilir.

Həmin vaxtlarda Azərbaycanın müstəqilliyini qorumaq, əvvəlki 1991-1992 ci illərdəki iqtidarın yarıtmaz idarəçiliyi nəticəsində dağılmış infrastrukturumuzu və iqtisadiyyatımızı, eyni zamanda mənəvi və maddi cəhətdən sarsılmış insanlarımızın normal həyat səviyyəsini bərpa etmək nə qədər məsuliyyətli, çətin və ağır bir yük idi. Hər bir insanın həyatında çətin anlar olduğu kimi, dövlətlərin və xalqların da tarixində ağır günlər olur. Bu yükü çiyninə götürmək və işıqlı gələcəyə aparmaq üçün Allah bu xalqlara böyük şəxsiyyətlər qismət edir. Ölkəmiz, insanlarımız çox çətin günlər yaşayarkən Heydər Əliyev xalqın müdrik tələbi ilə 1993-cü ildə yenidən hakimiyyətə qayıtdı. Ölkəmiz başının üstünü almış qara buludlardan, təhlükələrdən xilas oldu. Nailiyyətlərimizin təməl daşı məhz bu vaxtdan qoyuldu. Heydər Əliyev müstəqil Azərbaycanı siyasi fırtınaların cəngindən alıb, onun strateji mövqelərini bərpa etdi. Ona sabit ölkə imici qazandırdı.

O andan başlayan böyük uğurlardan biri də ölkədə yaranmış mürəkkəb ictimai-siyasi şəraitdə xalqımızı birləşdirmək və müstəqilliyimizi möhkəmləndirmək, demokratik, hüquqi, dünyəvi dövlətin qurulması, vətəndaşların firəvan həyatının təmin edilməsi məqsədilə H.Əliyevin Yeni Azərbaycan Partiyasını yaratmağı və 1992-ci ildə partiyanın rəsmi fəaliyyətə başlaması oldu. Bu hadisə Azərbaycan cəmiyyətində böyük sevinclə, maraqla qarşılandı.

Azərbaycanın xoşbəxt gələcəyi üçün böyük ümidlərlə, arzularla yaşayan Ulu öndər Heydər Əliyev qısa vaxtda böyük uzaqgörənliklə dünyanın enerji tələbatının günbəgün artdığını görür, neft diplomatiyası dövrünün başlandığını və bu diplomatiyada ölkəsinin qazanacağı iqtisadi və siyasi dividendi yaxşı duyaraq Yeni neft strategiyasını hazırladı. Bunun uğurlu nəticəsi olaraq 1994-cü ildə “Əsrin müqaviləsi”nin imzalanması ilə ölkəmizin inkişafının əsası qoyuldu. Xəzər dənizində yeni yataqlar aşkar olunmaqla və yeni infrastruktur yaradılmaqla neft-qaz hasilatı artırıldı. Azərbaycan Xəzər dənizinin nəhəng enerji potensialını ilk mənimsəyən və regionun inkişafında keyfiyyətcə yeni iqtisadi modeli formalaşdıran, Avropa və Asiya arasında siyasi və ticarət əlaqələrinin genişləndirilməsində, Qafqaz regionunda mühüm rol oynayan bir dövlətə, dünyanın neft mərkəzlərindən birinə çevrildi. Dünya ictimaiyyətinin böyük marağına səbəb olan və əfsanə hesab edilən nəhəng neft-qaz boru kəmərləri tikildi və istismara verildi.Ölkəmiz neft-qaz ixrac edən ölkələr sırasına qatıldı. Azərbaycan əzmkarlıq nümayiş etdirərək enerji təhlükəsizliyi baxımından etibarlı tərəfdaş və sabit ölkə kimi özünü dünya birliyinə təqdim edə bildi. Ölkəmizə böyük həcmdə investisiya axını başladı. Qısa müddətdə müstəqil Azərbaycan siyasi, sosial-iqtisadi, mədəni sahələrdə böyük nailiyyətlər qazanmağa başladı.

Bu 20 ildə Azərbaycanda demək olar ki, hər gün müsbət dəyişiklik nəzərə çarpıb. Sovet dövründən qalan parklar və xiyabanlar, mədəniyyət mərkəzləri, təhsil müəssisələri və səhiyyə obyektləri, qaz və su kanalizasiya, nəqliyyat infrstrukturu insanların istifadəsi üçün yararsız halda idi. Əmək haqqları və pensiyalar, insanların sosial təminatı yetərli səviyyədə deyildi.1993-ci ildən sonra isə ölkəmizdə iqtisadi durum get-gedə daha yaxşılaşdı, bütün bu çatışmamazlıqlar yavaş-yavaş həllini tapmağa, istehsalat və sənaye müəssisələri yenidən qurulmağa başladı.

Müstəqil Azərbaycanın həyatında başqa bir əlamətdar hadisə isə 1994-cü ilin əvvəlində milli valyutamız manatdan ölkədə yeganə ödəniş vasitəsi kimi istifadə olunması olmuşdur.

Bu gün ölkəmizdəki məktəblərin yeni müasir tələblərə uyğunlaşdırılması, kompüterləşdirilməsi istiqamətində layihələr həyata keçirilir. Dövlətimiz gənclərimizi dünyanın ən nüfuzlu ali məktəblərində təhsil alması üçün xaricə göndərir. Bununla yanaşı gənclərin idmanla məşğul olması üçün hər şərait var. Bu sahəyə xüsusi qayğı göstərilir və Azərbaycanın hər yerində idman kompleksləri tikilib gənclərin istifadəsinə verilib. Bunun nəticəsi olaraq cəmiyyətimizdə sağlam gənclər yetişir, ölkədaxili və beynəlxalq yarışlarda idmançılarımız böyük nəticələr əldə edir və bayrağımızı yüksəklərə qaldırır.Bu da Azərbaycanın 20 ildə keçdiyi inkişaf yolunun gözəl nəticələridir.

12 dekabr 2003-cü ildə Azərbaycan xalqı ağır itki ilə üzləşdi. Azərbaycan xalqının Ümummilli Lideri Heydər Əliyev 83 yaşında dünyasını dəyişdi. Azərbaycan xalqı öz dövlətçiliyini Heydər Əliyev ideyalarının sadiq davamçısı olan İlham Əliyevə həvalə etdi. 2003-cü il 15 oktyabrda 76% səs çoxluğu ilə Azərbaycanın Prezidenti seçilən İlham Əliyev 2003-cü il oktyabrın 31-də vəzifəsinin icrasına başladı.Azərbaycan yenidən etibarlı əllərdə idi. Heydər Əliyevin başladığı siyasi kurs İlham Əliyev tərəfindən yenidən uğurla icra olunmağa başladı. İham Əliyev Azərbaycanı inkişaf etmiş ölkəyə çevirməyi qarşısına məqsəd qoydu.

Təəssüflər olsun ki, uğurlarımız ilə yanaşı Dağlıq Qarabağ kimi bir problemimiz də var. 1 milyondan artıq vətəndaşımız qaçqınlıq həyatı yaşayır.Torpaqlarımızın 20%-i düşmən tapdağı altındadır.Artıq uzun illərdir ki, bu problem öz həllini tapmayıb.1994-cü ildə atəşkəsə nail olunduqdan sonra Azərbaycan çox böyük inkişaf yolu keçib. Xalqımız inanır ki, yaxın zamanlarda bu problem də öz həllini tapacaq. Dövlətimiz beynəlxalq hüquqa söykənərək və humanizm nümayiş etdirərək hələki sülh variantının üzərində dayanıb.Prezidentimiz “Bizim də səbrimiz tükənməz deyil” fikrini bəyan edərək, sülh yolu ilə mümkün olmasa, hərb yolu ilə torpaqlarımızın alınacağını bildirib.Buna isə ordumuzun gücü imkan verir.Ali Baş Komandanımızın döyüş əmrini gözləyən ordumuz və xalqımız torpaqlarımızın bütövlüyü naminə canından da keçməyə hazırdır.Yeri gəlmişkən bildirim ki, Azərbaycan Milli Ordusu Cənubi Qafqazda ən güclü, peşəkar hazırlıqlı, NATO standartlarına uyğun ordudur və işğal altında olan torpaqlarımızı hər zaman azad etməyə qadirdir. Azərbaycanın hərbi büdcəsi ildən ilə artır. 2011-ci ilin dövlət büdcəsində bu məbləğin 2,4 milyard manat olması və qarşıda bu məbləğin Ermənistanın dövlət büdcəsindən artiq olacağı nəzərdə tutulmuşdur. Ermənistanın qeyri-konstruktiv mövqeyinə cavab olaraq ölkəmiz hərbi qüdrətini artırmaq istiqamətində növbəti addımlarını atır.Bu məqsədlə yaranmış Müdafiə Sənayesi Nazirliyi ən müasir texnologiyalar tətbiq etməklə, Azərbaycan Silahlı Qüvvələrinin tələbatına uyğun silah və sursatlar istehsal edir, eyni zamanda silah ixracı potensialını gücləndirir. Bunu da müsəqilliyimizin uğuru kimi göstərmək lazımdır.

Qeyd edim ki, 2008-ci ildə dünyada hökm sürən qlobal maliyyə böhranına baxmayaraq, aparılan uğurlu iqtisadi siyasətin nəticəsi olaraq Azərbaycan bu sınaqdan üzü ağ çıxdı və dinamik inkişafını davam etdirə bildi.Bu da tarixə düşən uğurlu bir izdir.

2009-2013-cü illər üçün nəzərdə tutulmuş “Regionların sosial-iqtisadi inkişafı Dövlət Proqramı”nın icrası ölkə iqtisadiyyatının inkişafında mühüm əhəmiyyət kəsb edərək, makroiqtisadi sabitliyin təmin olunmasında, sahibkarlıq fəaliyyətinin genişlənməsində, yeni müəssisələrin və iş yerlərinin yaranmasında, infrastruktur və kommunal xidmətlərin səviyyəsinin daha da yüksəldilməsində, yoxsulluq həddinin aşağı düşməsində və əhalinin rifah halının yaxşılaşdırılmasında müstəsna rol oynamaqdadır. Ölkəmizin paytaxtı, eləcə də regionlarımız tanınmaz dərəcədə dəyişib və müasirləşib.

Azərbaycan tarixində ən dəyərli amillərdən biri də müstəqilliyimizin ilk illərində Heydər Əliyev Fondunun yaradılması oldu.Fond yarandığı vaxtdan Azərbaycanın müxtəlif sahələrini əhatə edən genişmiqyaslı layihələr həyata keçirir.Fondun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın uğurlu fəaliyyəti dövlətimizə və onun siyasətinə böyük töhvələr verir.

Son 20 ildə ölkəmiz demokratik inkişaf baxımından da böyük yol keçib. Növbəti irəliyə atılmış addımların biri də Ulu öndər Heydər Əliyevin təşəbbüsü və rəhbərliyi ilə Konstitusiyamızın hazırlanması və 1995-ci ildə qəbul olunması oldu. Burada ana dilimiz, xalqımızın, dövlətimizin adını daşıyan Azərbaycan adı burada əbədiləşdirildi. Azərbaycanda insan hüquq və azadlıqlarının qorunması, təmin olunması və demokratik prinsiplərin bərqərar olmasında yeni mərhələ açıldı. 1998-ci ildə Şərqdə ilk dəfə olaraq Azərbaycanda ölüm hökmü ləğv olundu. Bu gün Azərbaycan vətəndaşının hər bir hüququ Konstitusiya ilə qorunur. Ölkəmizdə azad söz, vicdan azadlığı, seçki hüququ mövcuddur. İnsanların ictimai-siyasi prosesdə fəal iştirakı üçün münbit zəmin yaradılıb. Bu da Azərbaycanda sivil siyasi münasibətlərin inkişafına öz töhfəsini verir. Məhz bütün bu uğurlar xalqın öz liderinə inamını daha da artırdı və bunun nəticəsi olaraq, xalqın mütləq əksəriyyətinin etibarını qazanan və ölkədə demokratik islahatlar aparılmasında, hüquqi dövlət quruculuğunda, Azərbaycan Respublikasının dövlət müstəqilliyinin möhkəmlənməsində uğurlu xidmətlər göstərən İlham Əliyev növbəti dəfə 2008-ci ildə Azərbaycan Respublikasının prezidenti seçildi. Hal-hazırda bu ali vəzifəni şərəf və ləyaqətlə icra edir.

Azərbaycanın müstəqillik və inkişaf yolu həddindən artıq keşməkeşlidir.Bu ötən 20 ilə nəzər salanda görürük ki, dövlətin xalqla sıx birliyi və xalqın hakimiyyətə,onun siyasətinə böyük inamı nəticəsində Azərbaycan müstəqilliyini göz bəbəyi kimi qorudu və böyük nailiyyətlər əldə etdi. Müstəqil dövlətimizin qədrini bilmək, onu qorumaq, inkişafına əlimizdən gələn köməyi göstərmək isə hər birimizin müqəddəs borcudur.

Pezident İlham Əliyev Dünya Azərbaycanlılarının III Qurultayında çıxışı zamanı, bu gün Azərbaycanın dinamik inkişaf edən, öz ehtiyaclarını özü ödəyən müasir bir ölkə olduğunu və Azərbaycan iqtisadiyyatının Cənubi Qafqaz iqtisadiyyatının 75 faizini təşkil etdiyini deyib. Bu doğrudan da böyük göstəricidir. Bu gün müasir Azərbaycan bu möhkəm təməl üzərində uğurla inkişaf edir. Azərbaycan bu gün Heydər Əliyev yolu və ilə gedir, bu siyasəti və ənənəni yaşadır və sadiq qalır.

Ötən 20 il ərzində böyük inkişaf yolu keçən Azərbaycan gələcəkdə daha güclü və qüdrətli dövlətə çevriləcək. Çünki hazırda həyata keçirilən siyasət bu fikri əminliklə söyləməyə əsas verir. Bütün bunların sayəsində respubilikamızda həyat dəyişir, insanların rifah halı yaxşılaşır, yeni-yeni sosial layihələr həyata keçirilir, paytaxda, bölgələrdə genişmiqyaslı tikinti-abadlıq işləri aparılır. Yeni tikilən göydələnlər, nəhəng körpülər, rahat yollar müstəqil Azərbaycanın getdikcə artan iqtisadi qüdrətindən xəbər verir. İnsanlarımız müstəqil Azərbaycanın vətəndaşı olmaqdan qürur duyur, fəxarət hissi keçirir və bunun xoşbəxtliyini yaşayır. Mən sevinirəm. Ona görə ki, dünyanın ən qabaqcıl qanunları ilə səsləşən ədalətli qanunlarım, güclü dövlətim, müstəqilliyimizin və sabitliyimizin təminatçısı olan prezidentim var.Yaşasın müstəqil Azərbaycan!

Mehman Əliyev

Səs.- 2011.- 20 sentyabr.- S. 10.