Şöhrətim Bakım

Söz və sənət xalqın mənəvi sərvəti olduğundan ondan istifadə böyük məsuliyyət tələb edir. Ta qədimdən bu günə qədər insan iradəsinin gücü, mənəvi düşüncələri, azərbaycançılıq meyilləri, ictimai-siyasi proseslərə olan münasibəti, bəşər tarixinin anlamı məhz söz ilə ifadədə öz əksini tapmışdır.

Bu baxımdan söz bütövlükdə bizim varlığımızı, cəmiyyətdə təsdiqimizi reallaşdıran bir amildir. Sözdən istifadə edən, cəmiyyətlə insan anlayışları arasında olan münasibətləri bir axara salıb böyük fikirlərin vəhdətində mövcud prosesləri göstərən qələm sahibləri hər zaman seçilən və daim izlənilən simalar olmuş və bu hal müasir dövrümüzdə bu gün də mövcuddur. Azərbaycan poeziyasında öz sözünün dəyəri, ifadə etdiyi fikirlərin yükü, görüşləri ilə tanınan Əvəz Süleymanoğlu da bir şair olaraq söz girdabında düşüncələrini nəzmə çəkib, insan ruhunu oxşayıb oxucuları ilə özü arasında bir münsibət qurmağa nail olmuşdur. Məhz bunun nəticəsidir ki, onun bu günə qədər oxuculara təqdim etdiyi kitabları daim izlənilir və poeziya aləmindəki fikir yükü insan düşüncəsinə nüfuz etmək qüdrətindədir. Onun bu günlərdə çapdan çıxan “Şöhrətim Bakım” kitabı da bu günə qədər olan yaradıcılığının davamıdır. Yeni nəşrdə şairin vətənə, torpağa olan ülvi hissləri həssas bir formada öz əksini tapıb. Kitaba şairin bu silsilədən olan “Ölkəm”, “Mənim bayrağım”, “Cənnətə çevrilsin qoy Azərbaycan”, “Xəzər”, “Şuşam”, “Əsgər”, “Lənkəran” və bu kimi başlıqlar altında qələmə aldığı şeirlərində Azərbaycanın bədiiləşmiş bir lövhəsi göz önündə canlanır. Böyük bir məmləkətin tarixi, bugünü və gələcəyi və coğrafi mövqeyi göz önündə real boyalarla təsvir edilir. Burada şairin axtarışları və illərlə olan təcrübəsi poeziyasının əsas ideyasının çılpaqlığı ilə təsviri yaranır. “Mənim bayrağım” adlı şeirində şair üçrəngli müqəddəs simvola çevrilən Azərbaycan bayrağının dəyər və mahiyyəti, onun dünya ölkələrində dalğalanması və yüksəlməsi onun vətənpərvərlik hissləri ilə coşğun və inandırıcı bir tərzdə ifadəsinə gətirib çıxarır:

Müstəqillik verdi bizə hürriyyət,

Xalqına gətirdi hörmət, ləyaqət.

Bu oldu millətə bir rəmzi-qeyrət.

Daim bərq vuracaq mənim bayrağım,

Gələcək hər yandan səsim-sorağım

- deyən şair xalqımızın öz tutduğu yolundan, mövqeyindən heç zaman dönməyəcəyini, bayrağımızın daim zirvədə duracağını, müstəqil ölkənin inkişaf yolunda olacağını və bu kimi amillərin qarşısında Azərbaycan bayrağının bütün bayraqlardan yüksəkdə dalğalanacağına əminliyini ifadə edir. Şan-şöhrəti dünyanı dolaşan Azərbaycanın real təcəssümü şairin diqqətindən kənarda qalmamış və Azərbaycanda gedən abadlıq-quruculuq işləri, xalqın firəvan həyatının təsviri poetik şəkildə yaradıcılıq təxəyyülünün məhsulu kimi meydana çıxır. Şair “Şöhrətim Bakım” kitabında Azərbaycan torpaqlarının işğal olunduğu zamanda bir vətəndaş qüruru ilə bu məsələyə münasibətini konkret və faktlar əsasında bildirir. Belə ki, qisasın qiyamətə heç zaman qalmayacağını, ər igidlərin öz torpaqları uğrunda mübarizəyə qalxacağını və Qarabağda bu gün həyat sürən erməni daşnaqlarının ədalətsiz mövqeyini, daim torpaq iddiası ilə Azərbaycana qarşı mübarizədə olmasını onların məxsusi keyfiyyətləri ilə əlaqəli bir şəkildə diqqətə çəkir. Əvəz Süleymanoğlu Şuşanın seyrinə gəlməyini, musiqi beşiyi olan bu diyarın milli-mənəvi sərvətləri ilə baş-başa qalmağı arzulayaraq, Cıdır düzünə qalxıb məhz vətən sevgisi ilə bu ab-havanı içinə çəkib, rahat nəfəs almağı ən müqəddəs bir məqsəd olaraq həyata keçməsini istəyir.

Xarı bülbülünün ağlar gözünə,

Verirəm ümiddən ərməğan Şuşam

- deyən şair hicrana dözə bilməyib bu ağrını daxilində yaşadaraq daim kədər içərisində həyat sürdüyünü qeyd edir.

Kitaba daxil olan şeirlər sırasında Azərbaycanın tanınmış simalarına həsr olunmuş nümunələrə də təsadüf olunur. Belə ki, tanınmış tarixçi, akademik Ziya Bünyadovun faciəli ölümünə ithaf etdiyi “Ziya”, Azərbaycanın Milli Qəhrəmanı Mübariz İbrahimova həsr olunan “Ölməzlik qazanan insan”, Azərbaycanın Milli Qəhrəmanı, tanınmış jurnalist Salatın Əsgərovanın əziz xatirəsinə “Bizim Salatın” və digər şeirləri məhz xalqın mübarizə əzmini, onun böyük şəxsiyyətlərini diqqətə çəkən şeir parçalarıdır. Onun Mübariz İbrahimova həsr etdiyi şeiri də xalqın qəhrəmanlıq tarixinin bir neçə səhifəsini salnaməsini özündə əks etdirir.

Kitaba daxil olan vətənə həsr edilən “Bayatılar” bölməsində Əvəz Süleymanoğlunun vətən sevgisi, vətən məhəbbəti ülviləşdirilmiş bir şəkildə rəngarəng misralarda böyük bir mənzərənin yaranmasına və vətəndaşlıq mövqeyinin hansı səpkidə olmasına gətirib çıxarır. Bu misralarda nəsihətamiz, dəyər kəsb edən parçalara təsadüf olunur.

Pislik cavabsız qalmaz,

Verən verdiyin almaz,

Vətənin torpağını,

Yağıda qoymaq olmaz

- deyən şair vətənin böyüklüyünü nəzmə çəkdiyi misralarda qısa və yığcam şəkildə qələmə alır. Xocalının alınması, Şuşanın əldən getməsi və s. olayların baş verməsi onun qəlbini oda qalayır. Bəşəri hisslərlə yaşayan şair dünya xalqlarının yaşantılarına da biganə qalmır. Bu, Azərbaycan xalqına məxsus olan humanizm hisslərinin bir nümunəsi tək özünü göstərir. 2001-ci ildə Vaşinqtonda baş verən terror hadisəsi şairin qələmində məxsusi bir şəkildə qiymətini alır. Kim cavab verəcək bu günahlara - deyə sual edən şair İraqın, Fələstinin məhv olub getməsini, yaramaz insanların məhz əməllərinin güdazına gələn varlıqların başına açılan hadisələrin qarşısının alınmasına qarşı üsyankar səsini qaldırır. Qan tökən insanlar, terror aktı ilə çıxış edənlər Tanrının lənətlədiyi insanlardır ki, əməllərinə görə cəzalanacaqlar. Əvəz Süleymanoğlunu narahat edən məsələlər çoxdur. Müxtəlif mövzulara müraciət edən və hər bir mövzusunda öz qələminə məxsus olan xüsusiyyətləri işıqlandıran və yaradıcılığını səciyyələndirən cəhətləri ilə oxucularla təmasda olan şair bu və ya digər poetik nümunələri ilə çağdaş poeziyamıza fərdi üslub, nəfəs gətirərək, onun zənginləşməsinə töhfələrini verir.

Zümrüd

Səs.- 2011.- 27 sentyabr.-S. 12.