Yola saldığımız 2010-cu il siyasi və iqtisadi baxımdan Azərbaycan üçün uğurlu oldu

Prezident İlham Əliyev: “2010-cu ildə ölkə qarşısında duran bütün vəzifələr şərəflə yerinə yetirildi”

2010-cu ildə Azərbaycan iqtisadi göstəriciləri ilə regionda yenidən liderlik tempini saxladı. 2010-cu ildə ölkə qarşısında duran bütün vəzifələr şərəflə yerinə yetirildi. ÜDM-in artım tempi 5 faiz, əhalinin pul gəlirləri 12 faiz artdı, inflyasiya isə cəmi 5,7 faiz təşkil etdi. Ölkəmizə 15 milyard dollar sərmayə qoyuldu, valyuta ehtiyatlarımız 20 milyard dollardan 30 milyard dollara qalxdı.

"2010-cu il ölkəmiz üçün, Azərbaycan üçün uğurlu il olmuşdur. Baxmayaraq ki, 2010-cu ildə dünyada iqtisadi və maliyyə böhranı hələ də davam edirdi, Azərbaycan 2010-cu ildə böyük uğurlara nail olub"- Azərbaycan Prezidenti İlham Əliyev Dünya Azərbaycanlılarının Həmrəylik Günü və Yeni il münasibətilə Azərbaycan xalqına təbriki zamanı bəyan edib.

"Bizim iqtisadiyyatımız artmışdır, ölkədə bütün sosial proqramlar öz həllini tapmışdır, bütün infrastruktur layihələri icra edilmişdir, bir sözlə, 2010-cu ildə ölkə qarşısında duran bütün vəzifələr şərəflə yerinə yetirildi. İqtisadiyyatımız təxminən 5 faiz, əhalinin pul gəlirləri 12 faiz artmışdır, inflyasiya cəmi 5,7 faiz təşkil etmişdir.

Ölkəmizə 15 milyard dollar sərmayə qoyulmuşdur, bizim valyuta ehtiyatlarımız 20 milyard dollardan 29 milyard dollara qalxmışdır. Bütün bunlar, bu nəticələr onu göstərir ki, Azərbaycanın seçdiyi yol düzgün yoldur, Azərbaycanın seçdiyi yol tərəqqi və inkişaf yoludur,"- o, qeyd edib.

Qeyd edək ki, 2010-cu ilin 11 ayı ərzində ÜDM artımı 4,5 faiz təşkil edib. Bu göstərici Avropanın bir sıra ölkələrində və ABŞ-da olduğundan çoxdur. Qeyri-neft sektorunda ÜDM artımı 5,9 faiz, neft sektorunda isə 2,6 faizdir. Bu, onun bariz sübutudur ki, Azərbaycan iqtisadiyyatı şaxələndirilmiş iqtisadiyyatdır.

2010-cu ildə Bakıda böyük gəmiqayırma zavodunun tikintisi başlanıb. Bakıda Beynəlxalq Dəniz Ticarət Limanının tikintisi başlanıb, Oğuz-Qəbələ-Bakı su kəmərinin tikintisi başa çatdırılıb.

2010-cu ildə iqtisadiyyatımızın aparıcı sahəsi olan neft-qaz sektorunda da böyük uğurlar əldə edilib. Ölkəmizdə 51 milyon ton neft, 27 milyard kubmetr qaz hasil edilib. 2010-cu ildə Azərbaycan böyük qaz ölkəsinə çevrilib. Azərbaycanda kəşf edilən böyük qaz yatağı - "Ümid" yatağı dünyada böyük səs salıb və Azərbaycanın enerji potensialının dünya bazarlarına təqdim edilməsi üçün bu hadisənin böyük önəmi olacaq. Burada 200 milyard kubmetr qaz və 30-40 milyon ton kondensat var. İlkin məlumata əsasən, ümumi ehtiyatlar 250 milyard kubmetr təşkil edir.

Bununla yanaşı, 2010-cu ildə ölkənin xarici iqtisadi fəaliyyəti Xəzər dənizindən karbohidrogenlərin nəqlinin diversifikasiyasına da yönəlib. Belə ki, cari ilin iyununda Azərbaycan Respublikası Dövlət Neft Şirkəti və Türkiyənin BOTAŞ şirkəti arasında təbii qazın satışı və nəqli üzrə anlaşma memorandumu imzalanıb. 2010-cu ildə prezidentlər səviyyəsində "Azərbaycan Respublikası və Türkiyə Respublikası arasında strateji tərəfdaşlıq və qarşılıqlı yardım haqqında müqavilə"ni qeyd etmək lazımdır.

Ötən il Azərbaycan Prezidenti 17 xarici səfər edib. Prezidentin gündəliyində Ermənistan-Azərbaycan münaqişəsi prioritet məsələ olaraq qalıb. Beynəlxalq tədbirlərdə ölkəmizin mövqeyi daha çox dəstək qazanıb və Ermənistan diplomatik dolanbaca salınıb.

Prezident İlham Əliyev çıxışında bunu belə ifadə edib: "Bizim dostlarımızın, Azərbaycanla əməkdaşlıq etmək istəyən ölkələrin sayı artır. Biz həm ikitərəfli müstəvidə, həm regional formatda, həm çoxtərəfli formatda uğurlu xarici siyasət aparırıq. Beynəlxalq təşkilatlarla bizim əlaqələrimiz artıq oturuşmuş əlaqələrdir, qarşılıqlı hörmət, qarşılıqlı inam, qarşılıqlı maraqlar üzərində qurulmuş münasibətlərdir".

Azərbaycan xarici siyasət sahəsində 2010-cu ildə böyük uğurlara nail olub. 2010-cu ildə Avropa Parlamenti Ermənistan-Azərbaycan münaqişəsinə dair çox önəmli və ədalətli qətnamə qəbul edib.

Dövlət başçısı işğal olunmuş ərazilərimizlə bağlı bildirib: "Bizim ərazi bütövlüyümüzün bərpası mütləq baş verməlidir. Azərbaycan heç vaxt bu vəziyyətlə barışmayacaq, heç vaxt bizim əzəli torpağımız olan Dağlıq Qarabağda ikinci erməni dövlətinin yaradılmasına icazə verməyəcəkdir. Biz hamımız yaxşı bilirik ki, bugünkü Ermənistan dövləti tarixi Azərbaycan torpaqlarında yaradılıbdır. İrəvan xanlığı, Zəngəzur mahalı, digər bölgələr bizim tarixi torpaqlarımızdır. İkinci erməni dövlətinin Azərbaycan torpağında yaradılmasına Azərbaycan dövləti və Azərbaycan xalqı heç vaxt icazə verməyəcəkdir. Bu münaqişə yalnız beynəlxalq hüquq normaları əsasında, Azərbaycanın ərazi bütövlüyü çərçivəsində öz həllini tapmalıdır. Dağlıq Qarabağda yaşayan əhali və ora qayıdacaq azərbaycanlılar muxtariyyət statusu çərçivəsində yaşayacaqlar və bu, məsələnin həlli üçün yeganə variantdır".

Məlum olduğu kimi, Azərbaycan Prezidentinin təşəbbüsü ilə 2010-cu il "Ekologiya ili" elan edilmişdi. Bu çərçivədə ətraf mühitin qorunması, ekoloji sağlamlığın təmin edilməsi üçün xeyli iş görüldü. Təkcə onu demək kifayətdir ki, ötən il ölkə ərazisində 5 milyondan çox ağac və kol bitkisi əkilib ki, bu, tarixi rekorddur.

Azərbaycanın iqtisadi potensialı bu gün ölkə vətəndaşının həyat fəaliyyətini, rifah səviyyəsini təkmilləşdirməyə imkan verir. Belə ki, təkcə 2010-cu ildə Azərbaycan Prezidenti regionlara 20-dən çox səfər edib və arasında müəssisə və digər infrastruktur obyektlərinin olduğu 100-dək çox açılışda iştirak edib.

Demokratikləşmə və son 10 ildə həyata keçirilən uğurlu xarici siyasətin davam etdirilməsi, Azərbaycan vətəndaşlarının rifah səviyyəsinin yaxşılaşdırılması, regional inkişaf proqramının həyata keçirilməsinin davam etdirilməsi, ekoloji durumun stabilləşdirilməsi və təkmilləşdirilməsi əsas prioritetlərdən olub.

2010-cu ildə Azərbaycanda siyasi proseslər də müsbət istiqamətdə inkişaf edib. Azərbaycanda demokratiyanın inkişafı yolunda böyük və uğurlu addımlar atılıb. 2010-cu ildə Azərbaycanda parlament seçkiləri şəffaf, ədalətli şəkildə keçirilib. Azərbaycan xalqının iradəsi parlament seçkilərinin nəticələrində tam şəkildə öz əksini tapıb.

2010-cu ildə ölkəmizin paytaxtında çox əlamətdar hadisə baş verib. Bakıda Dövlət Bayrağı Meydanı yaradılıb və dünyanın ən böyük, ən hündür bayrağı Bakıda ucaldılıb. Başqa sözlə, ötən il bütün sahələrdə inkişaf Azərbaycan bayrağı kimi ən yüksəkdə dayanıb.

Elçin Bayramlı

Səs.- 2011.- 7 yanvar.- S. 3.