Mübariz Qurbanlı: Ən çətin bir mərhələdə "Səs" qəzeti öz tarixi missiyasını uğurla yerinə yetirdi

"Səs" qəzetinin nəşr olunduğu dövr olduqca mürəkkəb bir dövr idi. "Səs" qəzetinin yaradılmasına dəstək verən insanların bu qəzetin mətbu orqanlar arasında özünəməxsus yer tutmasında böyük əməyi olmuşdur. "Səs" qəzeti həmin çətin dövrdə bu ağır vəzifəni öz üzərinə götürmüşdü. Mən deyərdim ki, çətin bir mərhələdə "Səs" qəzeti öz tarixi missiyasını uğurla yerinə yetirdi.

- Bizim "Səs" qəzeti gələn il 20 illiyini qeyd edəcək. Bununla bağlı ötən illərə nəzər salaq. "Səs" qəzetinin yarandığı dövrdə Azərbaycanda nə baş verirdi?

- Azərbaycanın ictimai-siyasi həyatında, o cümlədən, demokratik mətbuat tarixində "Səs" qəzetinin özünəməxsus yeri və rolu vardı. Azərbaycanın dövlət müstəqilliyinin əldə olunması ərəfəsində ölkəmizdə çox ciddi siyasi proseslər gedirdi. Ermənistanın Azərbaycana ərazi iddialarına cavab olaraq 1988-ci ildən başlayaraq, ölkəmizin hər yerində nümayişlər, mitinqlər keçirilirdi. Bu mitinqlərdə səslənən əsas fikirlərdən biri ölkəmizin ərazi bütövlüyünün saxlanması idisə, ikincisi həmin dövrdə Azərbaycana rəhbərlik edən dairələrin ölkəmizin milli maraqlarına zidd getməsinə qarşı yönəlmişdir. Həmin vaxt ölkəni idarə edənlər Azərbaycanın milli maraqlarını ifadə edə bilmirdilər. O dövrdə xalq hərəkatının ən yüksək zirvəyə çatdığı zaman meydanlara toplaşanların əllərində Ulu Öndər Heydər Əliyevin portretləri var idi. Ulu Öndərin portretlərinin meydana gətirilməsi xalqın Ona olan inamı ilə bağlı idi.

Həmin vaxt ictimai-siyasi həyatımızda azad mətbuata böyük ehtiyac duyulurdu. Ölkədə gedən prosesləri xalqa çatdırmaq ehtiyacı yaranmışdır. Belə bir vaxtda yaranmış olan "Əlincə" Cəmiyyəti və buraya toplanmış tanınmış insanları yeni bir mətbu orqanın yaradılması ideyasını irəli sürmüşdü. Bu ideya xeyirxah bir ideya idi. Çünki bir tərəfdən Azərbaycanda gedən prosesləri xalqa çatdırmaq lazım idi, digər tərəfdən blokada şəraitində olan Naxçıvanda gedən prosesləri obyektiv şəkildə işıqlandırmaq lazım idi. Ona görə də, "Əlincə" Cəmiyyətində bu ideya irəli sürülərkən, hər kəs tərəfindən dəstəkləndi və "Səs" qəzeti nəşr olunmağa başladı. "Səs" qəzetinin nəşr olunduğu dövr olduqca mürəkkəb bir dövr idi. "Səs" qəzetinin yaradılmasına dəstək verən insanların bu qəzetin mətbu orqanlar arasında özünəməxsus yer tutmasında böyük əməyi olmuşdur. Əməyi olan insanlar arasında "Səs" qəzetinin ilk baş redaktoru Ağabəy Əsgərovun rolunu xüsusi qeyd eləmək istəyirəm. O, həmin çətin dövrdə bu ağır vəzifəni öz üzərinə götürmüşdü. Mən deyərdim ki, çətin bir mərhələdə "Səs" qəzeti öz tarixi missiyasını uğurla yerinə yetirdi. Mən özüm o dövrdə "Səs" qəzetinə yazılar vermişdim, bu qəzetlə əməkdaşlıq etmişdim. Həmin vaxt "Səs" qəzeti 30-35 min tirajla çap olunurdu. Bir dənə də qəzet köşkdə qalmırdı. İnsanlar "Səs" qəzetində gedən yazılara böyük həvəs göstərirdilər. Bu da qəzetin günbəgün artan nüfuzu demək idi. "Səs" qəzeti Azərbaycan milli azadlıq hərəkatının ruporuna çevrilmiş qəzetlərdən biri idi. Azərbaycan mediasında özünə yer tutan "Səs" qəzeti ölkəmizdə başlanmış olan milli azadlıq hərəkatının meydanlarından biri idi.

- Həmin dövrdə prezident seçkilərində yaş senzinin tətbiq olunmasına qarşı ideoloji təbliğatın aparılmasında özlərini demokrat adlandıran "AXC-Müsavat"ın hakimiyyəti dövründə müxtəlif təzyiqlərin, yazıların baş alıb getməsi və buna qarşı "Səs" qəzetinin özünəməxsus mübarizəsi var idi...?

- "Səs" qəzetinin fəaliyyətini bir neçə mərhələyə bölmək olar. "Səs" qəzetinin təsis olunduğu ərəfədə bunun təsis olunması ideyasının ortada olduğu dövr birinci dövrdür. İkincisi, "Səs" qəzetinin təsisindən 1993-cü ilə qədər olan dövrdür. Həmin vaxt "Səs" qəzeti 1992-ci ildə prezident seçkilərində qoyulmuş yaş senzi ilə bağlı məhdudiyyətə qarşı geniş izahat işi aparmışdı. "Səs" qəzetində gedən yazılarda ana xətt ondan ibarət idi ki, Azərbaycanda keçirilən prezident seçkilərinin demokratik olması üçün hansısa bir məhdudiyyət qoyulmamalıdır. Qeyd edim ki, hələ bundan əvvəl məhdudiyyəti hələ Ayaz Mütəllibov tətbiq eləmişdi. Mütəllibov rejimi Azərbaycanda keçirilən prezident seçkilərində yaş məhdudiyyətini tətbiq eləməklə Ulu Öndər Heydər Əliyevin seçkilərə qatılmasına əngəl olmaq istəyirdi. Təəssüflər ki, Mütəllibov rejimi 1992-ci ilin mayında Azərbaycanda hakimiyyətdən devrildikdən sonra hakimiyyəti zəbt etmiş olan Azərbaycan Xalq Cəbhəsi və onun ətrafınıda olan qruplaşmalar, o cümlədən, Müsavat partiyası 1992-ci il prezident seçkilərində yaş senzini saxlamışdılar. Özlərini demokrat adlandıran dairələrin də yaş senzinin saxlaması onların da Ulu Öndər Heydər Əliyev amilindən və şəxsiyyətindən nə qədər çəkindiklərinin bariz nümunəsi idi. "Səs" qəzetində əsas ana xətt Azərbaycanda demokratiya çağırışları idi. "Səs" qəzeti əhalini lazımi informasiyalarla təmin edirdisə, geniş maarifçilik işi də aparırdı. Eyni zamanda, "Səs" qəzetində ermənilərin Azərbaycana təcavüzü və bu təcavüzün qarşısının alınması ilə bağlı təhlili yazılar verirlirdi. Bütövlükdə götürdükdə, həmin dövrdə "Səs" qəzetində maarifçiliyi, operativ məlumat verməyi və milli vəzifələrin izahını görmək olurdu.

Səs.- 2011.- 11 yanvar.- S. 11.