Yanan, yaradan, yaşadan “Səs”

Müstəqillik aktının qəbul edilməsinin ilk anlarından Azərbaycan Respublikası təcrübəsiz, lakin özündənrazı, ambisiyalı dırnaqarası rəhbərlərin səriştəsiz fəaliyyəti nəticəsində məhvolma təhlükəsi ilə üzləşdi. Ölkəmizin üzərini qara buludlar bürüməyə başladığı andan xalqımız faciəli günlərini yaşamaq məcburiyyətində qaldı. Bu həmin vaxt idi ki, 1918-ci ildə olduğu kimi, bu dəfə də xaricdən idarə olunan dünyanın məkrli siyasi qüvvələri Azərbaycanın daxildəki separatçı qüvvələri ilə əl-ələ verərək müstəqilliyimizi boğmağa, ölkəmizi bir müstəqil dövlət kimi dünyanın siyasi xəritəsindən silməyə çalışırdılar. Nəticədə Vətən torpaqları düşmən tapdaqları altında tapdalanır və Azərbaycan adlı gəmi dünya meridianlarında istiqamətini itirirdi. Amma Azərbaycan dövlətçiliyinə qarşı yönəldilmiş bütün şər qüvvələr əsas və başlıca məsələni unudurdular. Çünki xalqımızın qeyrət və namus simvolu olan Böyük Heydər Əliyev dühası bununla heç vaxt barışa bilməzdi. O bu anlar gecəni gündüzə qataraq, yorulmaq bilmədən respublikamızın nicat yollarını özünəməxsus müdrikliklə axtarırdı. Məhz həmin böhranlı günlərdə bir qrup vətənpərvər ziyalımızın ilk dəfə “Səs” qəzetində dərc olunan müraciətinə, Naxçıvanda çətin və ağır şəraitdə yaşayan qeyrətli vətəndaş, Bəhruz Kəngərlilərin, Cəlil Məmmədquluzadələrin, Hüseyn Cavidlərin vətən və xalq qayğılı narahat ruhlarının nigarançılığına layiqli bir varis kimi yanaşan Heydər Əliyevimiz oldu.

Çoxları şahiddir ki, tariximizin müdhiş günlərində Azərbaycanla əlaqələrini itirməkdə olan qədim diyarımız Naxçıvan blokada şəraitində yaşayır, erməni qəsbkarlarının həmlələrinə mərdliklə sinə gərir, sosial-iqtisadi çətinliklərin,əzablı yükünü daşıyır, yeni zamanda ilk dəfə müstəqillik, azadlıq ideyalarımızın bayraqdarı kimi çıxış edirdi. Belə bir vaxtda qışın soyuq, şaxtalı günlərində Heydər Əliyevimiz ilk dəfə “Səs” qəzetinin səhifələrində dərc olunacaq Yeni Azərbaycan Partiyasının Nizamnaməsi üzərində işləyir, imperiya əsarətindən qurtulmaq istəyən Azərbaycanımızın bu gününü və sabahını düşünür, onun parlaq zəkasından həmin anlar güc alan məsləkdaşlar məhz Naxçıvanda Heydər Əliyevimizin ətrafında toplaşırdılar. Bu anlar Böyük Öndər soydaşlarımıza, həmvətənlərimizə, Azərbaycanın qeyrətli və qəhrəman övladlarına milli qurtuluş, nicat yolunu göstərirdi. Tarixi dövlətçilik ənənələrinə və milli- əxlaqli mənəvi dəyərlərimizə, qeyrətli vətən oğullarına arxalanan Heydər Əliyevimiz müqayisəedilməz və bənzərsiz bir lider kimi cəmiyyət tərəfindən sonsuz və dərin bir məhəbbətlə sevildiyinə görə xalqımızın təkidli çağırışı ilə vətəndaş müharibəsi ərəfəsində yenidən hakimiyyətə qayıtdı. Vəzifə, kürsü davası, separatizmin tüğyan etdiyi bir zamanda Heydər Əliyevimiz ölkədə stabilliyi bərpa edə bildi, xalqın itirilmiş inamını özünə qaytardı.

Düz 20 il öncə nəşrə başlamış “Səs” qəzeti o vaxt olduğu kimi, indi də xalqımızın ictimai-siyasi, mədəni-mənəvi və intellektual intibahında əvəzsiz yeri olan bir KİV kimi təşəkkül tapmışdır.

Artıq danılmaz həqiqətdir ki, ictimai-siyasi həyatımızda aparıcı rol oynayan “Səs” qəzetini özünə doğma tribuna seçən Yeni Azərbaycan Partiyası Vətənimizin çox dəhşətli təhlükələrlə üz-üzə durduğu bir vaxtda, iqtisadi-siyasi səbatsızlığın, separatizmin hökm sürdüyü bir dövrdə, mədəni-mənəvi böhranlar zamanında, bir sözlə, məmləkətimizin ziddiyyətlər, təzadlar burulğanında boğulan anında meydana gəlməsi bilavasitə Heydər Əliyevimizin fenomenal şəxsiyyətilə bağlıdır. Azərbaycanın üçrəngli bayrağının dünya bayraqları arasında əzəmətlə dalğalanması Heydər Əliyev zəkasının parlaq qələbəsidir. Bir zamanlar Azərbaycanın böyük filosof- şairi Məhəmməd Hadi xalqımızın və Vətənimizin taleyini düşünərək,

“İmzasını qoymuş millətlər övraği həyata,

Yox millətimin xətti bu imzalar içində”.

Misralarını ürək ağrısıyla qələmə almışdı. Çox şükürlər olsun ki, indi qürurla, fəxrlə deyə bilərik ki, imzamızı Azərbaycan xalqının dünya şöhrətli oğlu Heydər Əliyevimiz imzalar arasında yazmaqla, unudulmaz şairimiz Məhəmməd Hadinin ruhuna bir sevinc bəxş etdi.

Azərbaycanın gələcəyi xoşbəxtdir və firavandır. Çünki onu bu xoşbəxt gələcəyə Böyük Heydər Əliyev siyasi məktəbinin layiqli davamçısı İlham Əliyevimiz kimi parlaq siyasi lider aparır. İlham Əliyevimizin şəxsiyyətində Heydər Əliyev siyasətinin incəliklərini, Heydər Əliyev diplomatiyasının əvəzsiz davamçısını görən xalqımız haqlı olaraq tükənməz enerji mənbəyini, yaşamaq, yaratmaq eşqini, Heydər Əliyevimizin dühasını, qüdrətini və əzəmətini özündə əks etdirmiş İlham Əliyevimizlə fəxr edir.

Azərbaycanın çox mürəkkəb tarixi dövründə dövlətçiliyin qorunması və inkişafında, xalqın ictimai-siyasi, mədəni həyatında özünəməxsus rolu olan “Səs” qəzetinin kollektivini və özünü “Səs” qəzetinin kollektivindən ayrı hiss etməyən partiya üzvlərini qəzetin 20 illik yubileyi münasibətilə ürəkdən təbrik edirəm və onlara gələcək fəaliyyətlərində daim uğurla müşayiət olunan yaradıcılıq və mübarizə əzmi arzulayıram. Bir də Sizə arzum budur ki, YANIN, YARADIN, YAŞADIN!

Hacıbala ABUTALIBOV

Səs.- 2011.- 11 yanvar.- S. 14.