Azərbaycan səhiyyəsində görülən işlər Dövlət Proqramına uyğun olaraq reallaşır

Son illər ölkədə gedən iqtisadi inkişaf səhiyyə sahəsinə töhfələrini verməkdədir

Hazırda Azərbaycan səhiyyəsi, bütün xüsusiyyətlərinə görə, özünün yeni inkişaf mərhələsini yaşayır. Bu gün ölkəmizdə səhiyyə sahəsində qəbul edilmiş dövlət proqramlarının icrası uğurla davam etdirilir. Bunun nəticəsi olaraq, yola saldığımız 2010-cu il ərzində səhiyyə sahəsində görülmüş işlərin sayı yetərincədir və bir sıra həyata keçirilən layihələr Azərbaycanda tibb sahəsində yenilik olaraq yadda qalıb.

Belə ki, il ərizində 45 iri səhiyyə müəssisəsində təmir-tikinti işləri aparılmış, tibbi müəssisələr avadanlıqla təchiz olunmuşdur. Fərəhləndirici haldır ki, səhiyyənin prioritet sahələri olan şəkərli diabet, irsi qan xəstəlikləri, qan xidməti, xroniki böyrək çatışmazlığı, vərəm, yoluxucu xəstəliklərin immunoprofilaktikası üzrə növbəti beş ili əhatə edən yeni proqramlar hazırlanaraq, Azərbaycan Respublikası Nazirlər Kabineti tərəfindən təsdiq edilmişdir. Dövlətin dəstəyi ilə həyata keçirilən tədbirlər nəticəsində tibbi xidmətin səviyyəsi xeyli yaxşılaşmış, ölüm hallarının sayı ötən illərlə müqayisədə azalmışdır.

Yola saldığımız il Azərbaycan səhiyyəsində nailiyyətləri ilə yadda qaldı. Bakı Baş Səhiyyə İdarəsinin həkim-mütəxəssisi Gülnarə Muxtarova Azərbaycan səhiyyəsindəki uğurları tibb sahəsinin nailiyyətləri kimi qiymətləndirdi: "Azərbaycan səhiyyəsində görülən işlər, bütövlükdə, respublikamızda davamlı olaraq reallaşır. Ölkənin hər bir yerində abadlıq, yenidənqurma işləri Dövlət Proqramına uyğun şəkildə həyata keçirilir. Son illər ölkədə gedən iqtisadi inkişaf səhiyyə sahəsinə töhfələrini verməkdədir. Yenidən tikilib və ya əsaslı təmirdən sonra istifadəyə verilən tibb müəssisələrinin sayı bu gün də artmaqdadır. Azərbaycan Respublikasının Prezidenti cənab İlham Əliyevin fərman və sərəncamları, ölkə səhiyyəsində islahatlar aparılması ilə bağlı göstərişləri və səhiyyə müəssisələrində təmir, tikinti və abadlaşdırma işləri, əldə olunan bütün nailiyyətlər ölkə başçısının diqqət və qayğısının bariz nümunəsidir. 2010-cu ilin son günləri səhiyyə sahəsində, xüsusilə, əhəmiyyətli oldu. Əsaslı təmir və yenidənqurma işlərindən sonra istifadəyə verilən akademik M.Topçubaşov adına Elmi Cərrahiyə Mərkəzinin açılışı dövlət başçısının ölkə səhiyyəsinə verilən ən yüksək qiymətinin bariz nümunəsidir. Azərbaycan səhiyyəsinə göstərilən diqqət davamlı olaraq həyata keçirilir. Belə ki, Prezident İlham Əliyevin iştirakı ilə Ə.Qarayev adına 2 saylı Klinik Uşaq Xəstəxanasının əsaslı təmir və yenidənqurma işlərindən sonra istifadəyə verildi. Daha sonra 15 saylı uşaq Poliklinikasının açılış mərasimi oldu. 20 mindən artıq əhaliyə xidmət edəcək poliklinikada uşaqların diaqnostikası üçün bütün lazımi şərait yaradılmışdır. Tibbi müəssisə müasir avadanlıqlarla təmin olunmuşdur. Maştağa qəsəbəsindəki 1 saylı Ruhi Əsəb Xəstəxanasının 4 qadın və bir qəbul şöbəsi dünya standartlarına uyğun şəkildə istifadəyə verildi. Bu gün əhalinin sağlamlığının qorunması Azərbaycan dövlətinin qarşıya qoyduğu prioritet istiqamətlərdən biridir. Son illərdə səhiyyə sisteminin inkişafı, bu sahənin maddi-texniki bazasının, kadr potensialının gücləndirilməsi və infrastrukturun yeniləşdirilməsi üçün mühüm addımlar atılır. Prezident İlham Əliyevin təşəbbüsü ilə bu sahədə həyata keçirilən tədbirlər Azərbaycan səhiyyəsinin işinin daha yaxşı təşkilinə geniş imkanlar açmışdır. Azərbaycanda səhiyyə sisteminin yenidən qurulması, əhalinin sağlamlığının daha yaxşı təşkili, bu sahədə yeni texnologiyaların tətbiqi və yeni kadr potensialının hazırlanmasını özündə əks etdirən dövlət proqramları tibbi xidmətin səviyyəsini yüksəltmişdir. Ümummilli Lider Heydər Əliyevin adını daşıyan fond bu xeyirxah tədbirlərə böyük dəstək verir.

Bu il səhiyyə sahəsində yaddaqalan əlamətdar hadisələrdən biri də əsaslı təmir işlərinə 2008-ci ildə başlanılmış Səhiyyə Nazirliyinin yeni binasının istifadəyə verilməsi oldu. Ümumi sahəsi 12 min kvadratmetr olan inzibati binada nazirliyin əməkdaşlarının fəaliyyəti üçün hər cür şərait yaradılıb. Binanın ikinci mərtəbəsində Bakı şəhər Baş Səhiyyə İdarəsi yerləşir. Təxminən 100 il bundan əvvəl inşa olunan və indiyədək Musa Nağıyev adına təcili yardım xəstəxanası kimi fəaliyyət göstərən binada əsaslı təmir işləri aparılmışdır.

Qeyd edim ki, bu bina 1913-cü ildə milyonçu xeyriyyəçi Musa Nağıyev tərəfindən inşa edilmişdir. 1992-ci ildən xeyriyyəçinin adını daşıyan bina bu gün, bütövlükdə, səhiyyə mərkəzinə çevrilib. Səhiyyə Nazirliyinin yeni binası yüksək zövq və müasir dizaynla qurulmuşdur. Nazirlik ən qabaqcıl texnologiya və avadanlıqla təchiz edilmişdir. Qeyd edək ki, səhiyyəmizin dünya standartları üzrə inkişafının əsas istiqamətlərindən biri də tibbi təhsil və kadr islahatıdır". Gülnarə xanımın sözlərinə görə, ölkə daxilində bu sahədə müstəsna əhəmiyyətli tədbirlər həyata keçirilmişdir. Tibb işçilərinin bilik və peşə bacarıqlarının artırılmasına xüsusi diqqət yetirilir.

Azərbaycanda səhiyyə sektorunun təşkilati strukturunun təkmilləşdirilməsi, keyfiyyətinin artırılması və səmərəliliyini yüksəltməyə yönəlmiş islahatlar davam etdirilir: "Bildiyiniz kimi, artıq bir neçə ildir ki, problemin həlli yollarından biri olan, bütün dünyada qəbul edilən, tibb işçilərinin sertifikasiyanın tətbiqi üzrə gərgin iş aparılır. Artıq bu istiqamətdə hazırlıq işləri başa çatdırılmış və 2011-ci ilin ilk günlərində sertifikasiya prosesinə başlanılmışdır. Səhiyyə Nazirliyi tərəfindən praktik tibb və əczaçılıq fəaliyyəti ilə məşğul olan səhiyyə mütəxəssislərinin sertifikasiya prosesinə ilk imtahanlar keçirildi. Bunun da gələcəkdə Azərbaycan səhiyyəsini daha da yüksək səviyyədə inkişafına öz töhfələrini verəcəyi istisna deyil. Eyni zamanda, tibbi təhsilin müasir səviyyədə təşkili prinsiplərinə uyğun olaraq islahatlar davam edir. Respublikanın kənd yerlərində kadrların çatışmazlığını nəzərə alaraq, Azərbaycan Tibb Universitetinin məzunlarının bilavasitə vakant yerlərə təyinatla göndərilməsi işi də təqdirəlayiqdir. Respublikanın regionlarında kadr çatışmazlığının aradan götürülməsi, gənc mütəxəssisləri işlə təmin etmək məqsədilə məzunlar iş yerlərinə təyinat alaraq, səhiyyə idarələrinin nəzdinə yox, bilavasitə vakant yerlərə, əsasən, tibb müəssisələrinə göndərilirlər. 2010-cu ildə məzunların əksər qisminə bölgələrə təyinat verilmişdir. 2011-ci ildə də Azərbaycan səhiyəsində görüləcək işlər çoxdur. Bildiyimiz kimi, ötən il Prezident cənab İlham Əliyev Azərbaycan Respublikası Səhiyyə Nazirliyinin "Bakı Sağlamlıq Mərkəzi"nin yaradılmasına dair Sərəncam imzalamışdır. "Bakı Sağlamlıq Mərkəzi"nin istifadəyə verilməsi respublika əhalisinin sağlamlığının qorunması, ölkəmizin şəhər və rayonlarında tibbi müəssisələrin müasir avadanlıqlarla təchiz olunması məqsədini daşıyır. Yeri gəlmişkən, onu da deyim ki, 2008-2012-ci illəri əhatə edən müddət üçün ölkədə "Səhiyyənin maliyyələşdirilməsinin təkmilləşdirilməsi və icbari tibbi sığortanın tətbiqi konsepsiyası"nın icrası davam etməkdədir. Əvvəlki illərlə müqayisədə Azərbaycanda səhiyyə sektoruna çəkilən xərclər əhəmiyyətli dərəcədə artmışdır."

Mütəxəssis-həkim səhiyyə sahəsində son illər ərzində qazanılmış nailiyyətlərin nəticəsi olaraq Azərbaycan səhiyyəsinin beynəlxalq aləmdə nüfuzunun xeyli artmasına səbəb olduğunu da diqqətə çatdırdı. Təsadüfi deyil ki, İqtisadi Əməkdaşlıq Təşkilatı Ölkələrinin Səhiyyə Nazirlərinin birinci iclası Bakıda keçirildi və iclasda Bakı Deklarasiyası qəbul olundu. Ümumdünya Səhiyyə Təşkilatının Avropa üzrə Regional Komitəsinin növbəti sessiyası 2011-ci ildə Bakıda keçiriləcək. Bu da səhiyyəmizin bir uğurudur.

Səs.- 2011.- 14 yanvar.- S. 5.