Lənkəran teatrı 120 illik yubileyini qeyd edir

1891-ci ildə, 120 il bundan əvvəl, Nəcəf bəy Vəzirovun “Oddan alova və ya yağışdan çıxdıq, yağmura düşdük” pyesi əsasında hazırlanan tamaşa ilə Lənkəranda teatrın əsası qoyulmuşdur. Rusiyanın Sankt-Peterburq şəhərində təhsil almış bir qrup Lənkəran ziyalısı 120 il bundan əvvəl - 1891-ci il yanvarın 18-də rayondakı uşaq evində tərbiyə alan valideyn himayəsindən məhrum olan uşaqlar üçün həmin tamaşanı nümayiş etmişdir. Hazırda Nəcəf bəy Vəzirov adına Lənkəran Dövlət Dram Teatrı, nəinki cənub bölgəsində, o cümlədən, respublikada və xarici ölkələrdə tanınır və sevilir. Bu gün teatrda iki nəfər xalq artisti, bir nəfər əməkdar artist, bir nəfər əməkdar incəsənət xadimi çalışır. Bu yaxınlarda teatr truppası Türkiyənin paytaxtı Ankara şəhərində keçirilmiş Beynəlxalq Teatr Festivalında uğurla çıxış etmişdir. Dünyanın müxtəlif ölkələrindən 185 teatr kollektivi bu incəsənət yarışmasına tamaşalarını təqdim etsə də, onlardan yalnız 58-i, o cümlədən Lənkəran Dövlət Teatrı festivalda iştirak etmək hüququ qazanmışdır. Teatrın kollektivi türkiyəli sənətsevərlərə macar dramaturqu Mikloş Xubainin “Şeytanın oyunları” tamaşasını təqdim etmişdir. Bu il teatrın nəzdində fəaliyyət göstərən gənclərdən ibarət “Ümid” studiyasında Dünya Azərbaycanlıları Konqresinin təşəbbüsü ilə “Aşıq Qərib” xalq dastanı əsasında mimodrama (sözsüz tamaşa) hazırlanacaq. Teatrda, həmçinin, M.F.Axundovun “Lənkəran xanının vəziri”, Kamran Nəzirlinin “Şeytanın işığı”, Rəhman Əlizadənin “Əbləhlərin toyu” və digər əsərlərin tamaşaya qoyulması nəzərdə tutulmuşdur.

Zümrüd

Səs.- 2011.- 14 yanvar.- S. 12.