Xalq yazıçısı
Elçin İstanbul Universitetinin fəxri doktoru adına layiq
görülüb
Xalq
yazıçısı Elçin türk dilinin və
Türkiyə-Azərbaycan əlaqələrinin
inkişafında xidmətlərinə görə İstanbul
Kültür Universitetinin fəxri doktoru adına layiq
görülüb. Universitetdə keçirilmiş mərasimdə
təhsil ocağının rektoru, professor Dursun Koçer fəxri
doktor diplomunu xalq yazıçısı Elçinə təqdim
edib. Mərasimdə Türkiyə Böyük Millət Məclisi
sədrinin müavini Meral Akşener, Azərbaycanın
İstanbuldakı baş konsulu Həsən Zeynalov, digər rəsmi
şəxslər və elm adamları iştirak ediblər.
Professor Dursun Koçer türk dilinin XX əsrdə sənət
və ədəbiyyat dilinə çevrilməsində
böyük xidməti olan xalq yazıçısı
Elçinin fəxri doktor adına layiq görülməsi
haqqında universitet Senatının qərarını oxuyub,
onun əsərlərinin Türkiyədə də
böyük maraqla qarşılandığını bildirib.
Universitet rəhbərliyinə təşəkkürünü
bildirən xalq yazıçısı Elçin iki qardaş
ölkənin arasında siyasi, iqtisadi və mədəni əməkdaşlığının
yüksək səviyyəsini vurğulayaraq, xalqlarımız
arasında mədəni əlaqələrin
qardaşlığımızı daha da möhkəmləndirdiyini
və digər sahələrdə əməkdaşlığa
təkan verdiyini bildirib. Elçin universitet tələbələri
ilə görüş də keçirib,
yaradıcılığı ilə bağlı suallara cavab
verib, kitablarına avtoqraf qoyub. Sonda tələbələrin
ifasında xalq yazıçısı İlyas Əfəndiyevin
“Mahnı dağlarda qaldı” tamaşası göstərilib.
Səs.- 2011.- 15 yanvar.- S. 12.