“Məhəbbət və ölüm" baleti sənətsevərlərə təqdim olunub

Ankaralı sənətsevərlər rus balet ustalarının və Azərbaycan bəstəkarının hədiyyəsini böyük məmnunluqla qarşılayıb

Ankara Opera və Balet Teatrında Azərbaycanın Türkiyədəki səfirliyinin dəstəyi, TÜRKSOY və Türkiyə Mədəniyyət və Turizm Nazirliyinin təşəbbüsü ilə ölkəmizin Rusiyadakı səfiri, xalq artisti Polad Bülbüloğlunun "Məhəbbət və ölüm" baleti sənətsevərlərə təqdim olunub. Türkiyənin mədəniyyət naziri Ərtoğrul Günay, Azərbaycanın qardaş ölkədəki səfiri Faiq Bağırov, müəllif Polad Bülbüloğlu, TÜRKSOY-un baş katibi Düsen Kaseinov tamaşaya baxanlar arasında olublar. İlk dəfə 2005-ci ildə səhnəyə qoyulan baletin librettosu "Dədə Qorqud" dastanının motivləri əsasında yazılıb. Əsəri Rusiya Federasiyasının məşhur Yekaterinburq Opera və Balet Teatrı səhnələşdirib. Baletdə klassik simfoniya, folklor və xalq rəqslərinin ecazkar sintezi diqqəti cəlb edir. Baletin librettosunun müəllifi və xoreoqrafı Nadejda Malıqina, orkestrin rəhbəri Pavel Kliniçevdir. Polad Bülbüloğlu jurnalistlərə müsahibəsində əsərinin Ankara Opera və Balet Teatrında tamaşaya qoyulmasını əlamətdar mədəniyyət hadisəsi kimi qiymətləndirmişdir. Bildirib ki, Rusiya sənətçilərinin Türkiyədə Azərbaycan əsərini təqdim etməsi dünyada mədəniyyətlərin necə yaxınlaşdığını göstərir. Düsen Kaseinov isə bu tamaşaya ötən il Moskvada baxdığını, Ankarada da nümayiş etdirilməsi üçün TÜRKSOY-un böyük səylər göstərdiyini bildirib. Ankaralı sənətsevərlər rus balet ustalarının və Azərbaycan bəstəkarının bu hədiyyəsini böyük məmnunluqla qarşılayıblar.

Zümrüd

Səs.- 2011.- 18 yanvar.- S. 12.