"Berlin-Bakı"
qalereyasında azərbaycanlı rəssamın sərgisi
açılıb
Berlində fəaliyyət
göstərən "Berlin-Bakı" qalereyasında Azərbaycan
Dövlət Rəssamlıq Akademiyasının rektoru, xalq rəssamı,
akademik Ömər Eldarovun və Almaniyanın
tanınmış heykəltəraşı Bernhard
Nürnberqin əsərlərindən ibarət birgə sərgi
açılıb. Sərgidə Ömər Eldarovun
yaratdığı məşhur heykəllərin fotoşəkilləri
nümayiş etdirilib. Tədbiri giriş sözü ilə
açan qalereyanın direktoru İbrahim Əhrari iki
tanınmış heykəltəraşın əsərlərinin
qalereyada nümayişindən məmnunluğunu bildirib. Azərbaycanın
Almaniyadakı səfiri Pərviz Şahbazov Qərb və
Şərq dəyərlərini özündə ehtiva edən
Azərbaycan mədəniyyəti haqqında söz
açaraq, Ömər Eldarovu həm böyük mədəniyyət
xadimi, həm də gənc istedadlara yol göstərən
müəllim kimi səciyyələndirib. Səfir alman heykəltəraşı
B.Nürnberqin yaradıcılığının, əsasən,
insan anatomiyasına həsr olunduğunu, sənətkarın
heykəllərlə insan xarakterini ustalıqla
açdığını qeyd edib. Ömər Eldarov və
B.Nürnberq çıxış edərək, tədbirin təşkilatçılarına
və iştirakçılara təşəkkür etmiş,
sərgi haqqında fikirlərini diqqətə
çatdırıblar. Sərgidə Berlinin elmi mərkəzlərinin,
mədəniyyət ocaqlarının, ictimaiyyətin nümayəndələri,
habelə, Azərbaycan diasporunun üzvləri, səfirliyin əməkdaşları
iştirak ediblər.
Zümrüd
Səs.- 2011.- 19 yanvar.- S. 12.