Azərbaycan başqa dövlətlərin daxili
işlərinə qarışmadığı
kimi...
Əli Əhmədov: “Başqa bir dövlət də
Azərbaycanın daxili işlərinə
qarışmamalıdır"
“Bizə qonşu dövlətlərdən biri
olan İranın televiziya kanalında Azərbaycanla bağlı
xoşagəlməz fikirlər
səsləndirilirsə, əlbəttə
bunu çox pis qiymətləndirirəm".
SİA-nın xəbərinə
görə, bu barədə jurnalistlərə
açıqlamasında Yeni
Azərbaycan Partiyasının
sədr müavini, İcra katibi, millət vəkili Əli Əhmədov deyib. O bildirib ki, İranla Azərbaycan təkcə qonşu dövlətlər
deyil, onları bir-birinə bağlayan çoxlu tarixi tellər var. Digər bir tərəfdən İranda
çoxlu sayda etnik azərbaycanlıların
yaşadığını deyən sədr müavini vurğulayıb
ki, bunların hamısı İran və Azərbaycan münasibətlərinə xüsusi
bir rəng verir. Onun sözlərinə görə, bütün bunların fonunda İranın kütləvi
informasiya vasitələrində,
elektron KİV-lərdə,
həmçinin "Səhər"
televiziya kanalında Azərbaycanla bağlı,
bizim qonşuluq siyasətimizin fəlsəfəsinə,
mahiyyətinə, tarixinə,
bəlkə də bu gününə uyğun gəlməyən təbliğat
aparılırsa, bütövlükdə
buna çox mənfi qiymət verirəm.
"Digər bir tərəfdən hesab edirəm ki, Azərbaycan müstəqil
dövlət olaraq həm daxili, həm də daxili siyasətini uğurla həyata keçirir. Kimin xoşuna gəlib-gəlməməsindən
asılı olmayaraq Azərbaycan xalqının
maraqlarına uyğun
şəkildə öz
dövlət siyasətini
müəyyənləşdirir və onun kifayət
qədər qətiyyətlə
həyata keçirir.
Hər hansı bir dövlətin Azərbaycanın həyata
keçirdiyi siyasəti
bəyənib-bəyənməməsindən
asılı olmayaraq bu siyasət yürüdüləcək. Azərbaycan
başqa dövlətlərin
daxili işlərinə
qarışmaq niyyətində
olmadığı kimi,
başqa bir dövlət də Azərbaycanın daxili işlərinə qarışmaq
kimi mənasız, faydası olmayan işlə məşğul
olmamalıdır. Biz İranla mehriban qonşuluq münasibətlərimizi
qiymətləndiririk, bunu
davam etdirmək fikrindəyik. Mən istərdim ki, İran tərəfi, KİV-ləri Azərbaycan
xalqının qəlbinə
toxunan, onu incidən, milli ruhuna toxuna biləcək
fikirlərə yol verməsin. Mən inanmaq istəyirəm ki, İran tərəfi,
rəhbərliyi bütün
bunların hamısına
diqqət verəcək,
Azərbaycana hörmətlə
yanaşacaq və bütün bu işlərə son qoyulacaq. Bütün bunları pisləyir və qonşuluq münasibətlərinə yaraşmayan
iş hesab edirik. Bu bizim
tarixi əlaqələrimizə
yaraşmayan haldır.
Mən inanıram ki, bu hala
tezliklə son qoyulacaq".
Əli Əhmədov həmçinin, İran mətbuatında Dağlıq
Qarabağın Ermənistanın
ərazisi kimi göstərilməsi məsələsinə
də münasibət
bildirib. O vurğulayıb
ki, İranın rəsmi dairələri Qarabağla bağlı dəfələrlə münasibətlərini,
o cümlədən Dağlıq Qarabağın
Azərbaycanın ərazisi
olması haqqında mövqelərini bildirib. Sədr müavinin sözlərinə
görə, İranda
fəaliyyət göstərən
saytlar, mətbuat, bütövlükdə təbliğat
vasitələri ölkənin
dəfələrlə bəyan
etdiyi rəsmi mövqeyinə əks olan fəaliyyət göstərməkdədirlər: "Əksinə onlar da İranın rəsmi mövqeyini əks
etdirən fikirlər səsləndirilməlidir. Əgər
bizə qonşu olan İranda kimlərsə Azərbaycanın
ayrılmaz hissəsi olan Dağlıq Qarabağı Azərbaycandan
ayırmaq və yaxud Ermənistanın tərkibindəki bir ərazi kimi göstərmək istəyirsə,
biz bunu qətiyyətlə pisləyirik. İlk növbədə hesab edirəm ki, İran rəsmi dairələri buna öz münasibətlərini
bildirməli, saytın
yarıtmaz fəaliyyəti
barədə addımlar
atmalıdır. Digər tərəfdən
isə Azərbaycan vətəndaşları olaraq
qonşumuzun belə hərəkət etməsinə
öz etirazımızı
bildiririk". Ə. Əhmədov
həmçinin Ermənistan
prezidenti Serj Sarkisyanın "Azərbaycana
bir qarış da torpaq verməyəcəyik"
bəyanatına da münasibət bildirib.
O bildirib ki, bu S.Sarkisyanın növbəti "sarsaq"
bəyanatlarından biridir.
Onun sözlərinə görə,
bizim indiyə qədər apardığımız
danışıqların dinc
yolla nizama salınmasında və bu istiqamətdə atdığımız addımlarda
qarşıya qoyduğu
məqsəd ondan ibarətdir ki, Azərbaycanın bütün
işğal olunmuş
torpaqları işğaldan
azad olsun, Azərbaycanın ərazi
bütövlüyü təmin
olunsun. Ə.Əhmədov
qeyd edib ki, Azərbaycanın haqq işi, beynəlxalq hüququ, Azərbaycan xalqının
iradəsi bunu həm tələb, həm də mümkün edir: "Bundan əlavə, Azərbaycanın gündən-günə
artan iqtisadi potensialı buna imkan yaradır. Azərbaycan Ordusunun artan qüdrəti, əsgərlərimizin mətinliyi,
qəhrəmanlığa hər
an hazır olması qarşımıza
qoyduğumuz şərəfli
və milli vəzifəyə çatmağımızı
mümkün edir. Bu mümkün mütləq olacaq. S.Sarkisyan başda olmaqla, kimin belə sərsəm bəyanat vermələrindən
asılı olmayaraq, Azərbaycan xalqı bir qarış belə torpağı kiməsə bağışlamaq
fikrində deyil. Azərbaycanın hər bir vətəndaşı
öz torpaqlarını
azad etmək üçün ölümə
getməyə qədər
hər bir fədakarlığa hazırdır.
Bu qüvvənin qarşısında heç
bir sərsəm bəyanatlar tab gətirə bilməz".
YAP-ın sədr müavini
qeyd edib ki, Ermənistanın Azərbaycan torpaqlarını
bu günə kimi işğal altında saxlaması bütövlükdə dünya
dövlətlərinin əksəriyyəti
tərəfindən pislənilib.
İranın da bu məsələyə rəsmi şəkildə
öz mövqeyini bildirdiyini deyən Ə.Əhmədov vurğulayıb ki, istəyimiz Azərbaycan torpaqlarının işğaldan
azad olmasıdır.
"Nə qədər ki, Ermənistan işğal altında saxladığı Azərbaycanın
torpaqlarını işğaldan
azad etmir, bu o qədər
Ermənistanın özü
üçün çox
ciddi iqtisadi və digər xarakterli problemlərə gətirib çıxaracaq.
Bu yalnız Ermənistanın işğalçılıq
siyasətinin nəticələridir
ki, onun ağır bəhrələrini
indi görməkdədir.
Təəssüf hissi
ilə bildirirəm ki, Azərbaycanın qonşuları içərisində
kimsə təcavüzkara
açıq şəkildə
olmasa da gizli şəkildə, mahiyyət etibarı ilə dəstək verir. Bizim üçün
çox ağırdır
ki, bu dəstəyi
verən bizim qonşumuzdur. Tarixi və mədəni tellərlə Azərbaycana
bağlı olan dövlətdir, əlbəttə
bu bizi incidir.
Biz çox istərdik ki, təcavüzkara öz təcavüzkarlıq
əməllərini davam
etdirmək üçün
kimsə dəstək
verməsin, xüsusilə
İrandan belə bir dəstək olmasın. İranın Azərbaycanın torpaqlarını
işğal etmiş bir dövlətə bu formada dəstək
verməsini qəti şəkildə pisləyirik", - deyə
o əlavə edib.
Səs.- 2011.- 28 yanvar.- S. 5.