Gənclər cəmiyyətin fəal, hərəkətverici qüvvəsidir

Gənclər hər zaman dövlətin, cəmiyyətin ən fəal, aparıcı, hərəkətverici qüvvəsi sayılır. Bu mənada, gənclərə, yeni nəslə diqqət və qayğı ictimai-siyasi sferada mühüm prioritetlərdən hesab edilir. Mahiyyət etibarı ilə, dövlətin gənclər siyasəti - gənclərin öz bilik və bacarıqlarının, təbii potensialının effektli reallaşdırılmasını, cəmiyyətdə layiqli yer tutmasını təmin edən şəraitin yaradılmasını nəzərdə tutur. Hazırkı şəraitdə sosial yönümlü siyasət, insan kapitalı amili əhalinin rifahının getdikcə daha da yaxşılaşdırılması qloballaşan dünyada başlıca hədəflərdəndir.

Gənclərimiz əsil vətəndaş kimi yetişməlidir

Gənclər xüsusi sosial-demoqrafik qrup kimi, bütün dəyişikliklərə, yeniliklərə çox həssasdırlar. Bu baxımdan, insan kapitalının əsas daşıyıcısı da gənclərdir. Bu mənada, onlara yönələn diqqət və qayğı ilə müqabilində cəmiyyətin, dövlətin, bəşəriyyətin gənclərdən öz gözləntiləri var. Bu, ilk növbədə, məsuliyyətli, anlayışlı rəftar, faydalılıq, sosial-siyasi həyatda əsil vətəndaş mövqeyi tutmaq, özünü layiqincə təsdiqləməklə bağlıdır.

Azərbaycanda bu strateji hədəflərə çatmaq üçün dövlət, hökumət, cəmiyyət səviyyəsində ardıcıl, məqsədyönlü, sistemli tədbirlər həyata keçirilir. Bu baxımdan, gənclərin hərtərəfli inkişafı ölkənin sosial-iqtisadi, elmi və mədəni inkişafı ilə sıx əlaqədədir. Hazırda bütün dünyada insan amilinə xüsusi önəm verilir, insan, onun bilik, bacarıq, qabiliyyət və keyfiyyətləri əsas dəyər, başlıca kapital kimi qəbul olunur. Bu, indi sosial-iqtisadi tərəqqinin, qlobal rəqabətə davamlılığın, milli təhlükəsizliyin vacib şərtlərindəndir. Ölkəmizdə gənclərin problemlərinə, arzu və istəklərinə, ideyalarına, təhsilinə, cəmiyyətin çoxşaxəli həyatında fəal iştirakına xüsusi diqqət yetirilir.

Gənclərlə bağlı mütərəqqi təşəbbüs

Bu, Ümummilli Lider Heydər Əliyevin adı ilə bağlıdır

Yeni nəslin inkişafı, cəmiyyətdə aparıcı mövqe tutması, Azərbaycanın müstəqilliyinin bərpasının ilk illərindən dövlətin əsas fəaliyyət prioritetlərindən sayılır. Gənclərə cəmiyyətin həssas zümrəsi kimi, xüsusi diqqət və qayğının göstərilməsi ilə bağlı təşəbbüs məhz Ümummilli Lider Heydər Əliyevin adı ilə bağlıdır. Ümummilli Lider Heydər Əliyev tərəfindən hələ 1995-ci ildə Azərbaycan Gənclərinin Forumunun keçirilməsi təşəbbüsü irəli sürülmüşdü. Bu təşəbbüs Azərbaycan gənclərinin cəmiyyətin inkişafında və öz problemlərinin həllində rolunu artırmağa yönəlmişdi və ölkənin gələcək inkişafında iştirakını və məsuliyyətini yüksəltmək, paytaxt və regionlarda yaşayan gənclərin fikir mübadiləsinə şərait yaratmaq, gənclər və dövlət qurumları, hökumət nümayəndələri ilə dialoqu, açıq ünsiyyəti asanlaşdırmaq, daha səmərəli etmək məqsədi daşıyırdı. Məhz bu təşəbbüs Azərbaycanda gənclər hərəkatının qüvvətlənməsinə, gənclərin təşəbbüskarlığının və fəallığının artmasına, ictimai-siyasi həyatda fəal, səmərəli iştirakına təkan verdi.

Xatırladaq ki, Gənclərin I Forumu - 2 fevral 1996-cı il tarixində keçirilib. Bu, Azərbaycan gənclərinin təşkilatlanması, sağlam düşüncəli, milli dövlətçiliyə sadiq, mütərəqqi qüvvə kimi formalaşması, kamilləşməsi baxımından, çox mühüm, əhəmiyyətli hadisə idi və Azərbaycan gəncliyinin strateji fəaliyyət hədəflərinin müəyyənləşdirilməsində həlledici rol oynadı. 1997-ci il fevralın 1-də hər il fevralın 2-nin Azərbaycan Gəncləri Günü kimi qeyd edilməsi ilə bağlı Sərəncam imzalandı. Həmin vaxtdan etibarən, fevralın 2-i, ənənəvi olaraq, ölkəmizdə Azərbaycan gənclərinin bayramı kimi təntənəli şəkildə qeyd olunur. Bundan sonra gənclərimiz daha üç dəfə bu mötəbər ümumrespublika toplantısı səviyyəsində bir araya gəliblər. Gənclərin II Forumu 1999-cu ildə, III Forum 13 oktyabr 2003-cü il tarixində, IV Forum 2005-ci ildə Bakı şəhərində keçirilib.

Gənc nəslin rifahına yönələn effektli siyasət

Prezident İlham Əliyevin hakimiyyəti dönəmində Azərbaycan gəncliyi ilə bağlı 2005-2009 və 2011-2015-ci illəri əhatə edən iki dövlət proqramı qəbul olunub. Bu dövrdə dövlətçiliyimizin daha da möhkəmlənməsi, ölkəmizin sosial-iqtisadi qüdrətinin yüksəlməsi sayəsində gənclərə göstərilən diqqət, qayğı daha da artıb, gənclərlə bağlı aktual məsələlərin həll olunması üçün köklü, sistemli tədbirlər həyata keçirilib. Bilavasitə gəncləri daha çox maraqlandıran sahələrdə - idman, təhsil, elm, mədəniyyət, səhiyyə sferasında böyük işlər görülüb. Ölkəmizin müxtəlif bölgələrini əhatə edən idman, olimpiya kompleksləri şəbəkəsi, gənclərlə bağlı həyata keçirilən effektli siyasət bunun bariz nümunəsidir.

Bəlli olduğu kimi, 2005-ci ildə Prezident İlham Əliyev tərəfindən imzalanmış “Azərbaycan Gəncliyi Dövlət Proqramı”nda (2005-2009-cu illər) aşağıdakı praktik vəzifələrin yerinə yetirilməsi nəzərdə tutulur:

- gənc nəslin Vətənə məhəbbət, Azərbaycan xalqının tarixinə, mədəni irsinə, dövlət dilinə və rəmzlərinə, milli-mənəvi dəyərlərinə hörmət ruhunda tərbiyə olunması;

- gənclərin hərbi vətənpərvərlik tərbiyəsi işinin gücləndirilməsi, onların hərbi xidmətə hazırlanması;

- gənclər arasında hüquq pozuntularının, narkomaniyanın və digər zərərli vərdişlərin profilaktikası sahəsində tədbirlərin həyata keçirilməsi;

- istedadlı gənclərin aşkar edilməsi, onların öz qabiliyyətlərini inkişaf etdirə bilmələri üçün şəraitin yaradılması;

- gənclərin sahibkarlıq fəaliyyətlərinin dəstəklənməsi, bazar iqtisadiyyatının əsaslarına dair biliklərə yiyələnməsi, peşə hazırlığının yüksəldilməsi və məşğulluğunun təmin edilməsi məqsədi ilə tədbirlərin həyata keçirilməsi;

- sosial müdafiəyə ehtiyacı olan gənclərin, o cümlədən, gənc ailələrin problemlərinin həllinə köməklik göstərilməsi;

- gənclərin sağlamlığının qorunması sahəsində tədbirlərin həyata keçirilməsi, kütləvi bədən tərbiyəsinin və idmanın inkişaf etdirilməsi;

- ölkənin ictimai-siyasi həyatında gənclərin fəal iştirakı, uşaq və gənclər üzrə təşkilatların formalaşması və inkişafı üçün şəraitin yaradılması;

- gənclərin beynəlxalq əməkdaşlığı sahəsində layihələrin həyata keçirilməsinə, gənclər təşkilatlarının beynəlxalq əlaqələrinin qurulmasına, onların nümayəndələrinin beynəlxalq tədbirlərdə iştirakına köməklik göstərilməsi.

Yeni, modern menecment düşüncəsi

Bu, müasir gənclər üçün olduqca vacibdir

Göründüyü kimi, Azərbaycan gəncliyi ilə bağlı ilk dövlət proqramı gəncləri maraqlandıran bütün məqamları əhatə edir. Prezident İlham Əliyev 6 aprel, 2011-ci il tarixli Sərəncamı ilə hazırlanan və qəbul edilən “Azərbaycan gəncliyi 2011-2015-ci illərdə” Dövlət Proqramı gənclər siyasətini daha da inkişaf etdirmək, onların menecment sahəsində fəal iştirakına şərait yaratmaq, gənc mütəxəssislərin işlə təminatı və digər sosial-iqtisadi problemlərinin həllini təmin etmək məqsədini nəzərdə tutur. Bu proqramın icrasına 80 milyon manat vəsait ayrılıb və növbəti beş il ərzində gənclərin internet səsverməsi ilə öz Azərbaycanın “Gənclər paytaxtı”nı seçməsi gənclərimizin informasiya texnologiyaları sahəsində biliklərinin artmasına, onların sosial yönümlü layihələrdə fəal iştirakına zəmin yaradır.

Müvafiq proqramda qeyd edildiyi kimi, burada əsas məqsəd gənclərin dövlətin və cəmiyyətin sosial-iqtisadi, ictimai-siyasi və mədəni həyatında iştirakının təmin edilməsidir. Cəmiyyətin mütərəqqi, aparıcı ictimai-siyasi qüvvələri də müasir gəncliyimizi çox yüksək dəyərləndirir, gənclərin böyük potensialının uğurlu, səmərəli şəkildə reallaşmasına səy göstərirlər. Bu baxımdan, yüz minlərlə mütərəqqi düşüncəli, fəal gənclərimizi öz sıralarında cəmləşdirən Yeni Azərbaycan Partiyası hər zaman gənclərə yönələn pozitiv diqqəti seçilir. Bu gün Yeni Azərbaycan Partiyası üzvlərinin 40 faizini gənclər təşkil edir. Müxtəlif radikal qüvvələrdən, qaragüruhçulardan, təfriqəçi, təriqətçi qruplaşmalardan fərqli olaraq, iqtidarda olan Yeni Azərbaycan Partiyası gənclərə sağlam, sivil, demokratik düşüncə, dövlətçiliyimizə, milli məfkurəyə sədaqət aşılayır. Gənclərimizin mütləq əksəriyyəti bunu layiqincə dəyərləndirir, Yeni Azərbaycan Partiyasının sıralarına fəal şəkildə qoşulurlar.

Gənclər siyasətinin əsas istiqamətləri

Dövlətin gənclər siyasətinin əsas istiqamətləri isə “Gənclər siyasəti haqqında” Azərbaycan Respublikasının Qanunu ilə aşağıdakı kimi müəyyənləşdirilir:

- Gənclərin mənəvi-əxlaqi tərbiyəsi və mədəni həyatda iştirakı;

- İstedadlı gənclərə dövlət qayğısı;

- Gənclərin sağlamlığının qorunması və fiziki inkişafı;

- Gənclərin məşğulluğunun təmin edilməsi;

- Gənc ailələrə dövlət yadımı;

- Gənclər təşkilatlarına dövlət yardımı.

Bu qanunda gənclər siyasətinin əsas istiqamətləri sırasında mənəvi-əxlaqi tərbiyənin və mədəni həyatda iştirakın önə çəkilməsi heç də təsadüfi deyil. Mənəvi-əxlaqi dəyərlərə bağlılıq və mədəni inkişaf səviyyəsinin mümkün qədər yüksək olması gənclərin ictimai həyatda sağlam mövqe tutması, uğurlu şəkildə özünü təsdiqləməsi baxımından, vacib şərtdir. Qanunvericilik səviyyəsində gənclərlə bağlı qəbul edilən müxtəlif qanunlar, “Azərbaycan gənclərinin xaricdə təhsil alması ilə bağlı Dövlət Proqramı”nın qüvvəyə minməsi, “Azərbaycan Milli Elm Fondu”nun yaradılması, ümumiyyətlə, dövlətin bu sahədə atdığı son addımlar onu deməyə əsas verir ki, ölkəmiz üçün yeni nəslin gələcəyi, bu mənada, insan kapitalı amili çox əhəmiyyətlidir. Bu, Azərbaycanın strateji hədəflərə yönəlmə baxımından, optimal, uğurlu, doğru seçimidir. Ölkənin təhsil səviyyəsinin artırılması, gənclərin nüfuzlu xarici ali təhsil müəssisələrində yüksək səviyyədə təhsil almaları, təcrübə keçmələri, elmi fəaliyyətlə məşğul olmaları Azərbaycan inkişaf potensialının getdikcə daha da artmasına xidmət edir. Gənclərin bilavasitə iştirakçısı olduğu müxtəlif elmi layihələrə, ixtiralara maliyyə vəsaiti ayrılması intellektual inkişaf prioritetlərinin genişlənməsinə əlverişli şərait yaradır. Hazırda ölkəmiz dünyanın neft, enerji, idman mərkəzlərindən biri olmaqla yanaşı, getdikcə elm, təhsil, mədəniyyət mərkəzinə çevrilir. Bu, gəncliyin, yeni nəslin inkişafına böyük, əhəmiyyətli töhfədir.

Səs.- 2012.- 5 aprel.- S.7.