Azərbaycan müsəlman dünyasında nadir dünyəvi ölkələrindəndir

Azərbaycanın uğurları, əldə etdiyi davamlı nailiyyətləri hər zaman, xüsusilə, son vaxtlar dünya dövlətləri və nüfuzlu təşkilatlar tərəfindən yüksək qiymətləndirilməkdədir. Belə ki, ölkəmizdə aparılan quruculuq və abadlıq işləri, eləcə də, həmin işlər çərçivəsində daha qlobal layihələrin həyata keçirilməsi, bütövlükdə, bir amala, bir məqsədə xidmət edir: Azərbaycan dövlətçiliyinin möhkəmləndirilməsi və xalqımızın daha firavan yaşaması, bütün sahələri əhatə edən bu inkişaf tendensiyası, təbii ki, buraya gələn xarici nüfuzlu ictimai-siyasi xadimlərdə, qonaqlarda, media nümayəndələrində xoş təəssüratlar bağışlayır, ölkəmizin perspektivləri onlar tərəfindən yüksək dəyərləndirilir.

Azərbaycanın regionda liderliyi danılmazdır

Buna misal kimi, Fransanın “Alsazın son xəbərləri” qəzetində ölkəmizə həsr edilmiş məqaləni xatırlatmaq mümkündür. Mətbu nəşrdə vurğulanır ki, Azərbaycan son illər bütün sahələrdə irəliyə doğru böyük sıçrayış etmiş, Cənubi Qafqaz ölkələri arasında lider dövlətə çevrilmiş, Qərblə müsəlman dünyası arasında körpü rolu oynayaraq, Avropa dəyərlərinə inteqrasiya istiqamətində mühüm addımlar atılmışdır: “Ərazisinin işğalına və qaçqın və məcburi köçkünlərin probleminə baxmayaraq, iqtisadi inkişafa görə Azərbaycan bəzi Avropa ölkələrini arxada qoyub”.

Rusiyanın Avrasiya və beynəlxalq enerji siyasəti üzrə “Naslediye” Fondunun aparıcı eksperti Ariyel Koyenin fikrincə, isə tərəfdaşlıq münasibətlərini, strateji mövqeyini nəzərə alaraq, Azərbaycan elə bir dövlətdir ki, ABŞ ona öz hərbi-siyasi və diplomatik dəstəyini genişləndirməlidir. Belə ki, Azərbaycan həm də müsəlman dünyasında nadir dünyəvi ölkələrindəndir.

O cümlədən, tanınmış İsrail politoloqu Ariye Qut da bu barədə vurğulamışdır ki, istər iqtisadi, istərsə də siyasi nöqteyi-nəzərdən Azərbaycanın regionda liderliyi danılmazdır.

Bədxah qüvvələrin bəd əməlləri reallaşdırılmamış qalır

Lakin təəssüflər olsun ki, bu kimi önəmli hadisələrə kölgə salmaq istəyən bəzi xarici və daxili qüvvələr də mövcuddur ki, həmin qüvvələrin əsil məqsədləri onların iç üzlərini dəfələrlə ifşa edib. Belə ki, fevralın 28-də “Baku Expo” Mərkəzində “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın icrasının üçüncü ilinin yekunlarına həsr olunmuş konfransda çıxış edən Azərbaycan Prezidenti İlham Əliyev bu barədə vurğulayarkən, qeyd etmişdir ki, ölkəmizin uğurlarına sevinənlərin sayı kifayət qədər çoxdur: “Amma istəməyən qüvvələr də, bədxahlar da vardır”.

Həmin bədxah qüvvələri bir neçə qrupa bölən Prezident İlham Əliyev sözügedən yanaşmasında bildirib ki, bizim əsas düşmənlərimiz dünya ermənliyi və onların təsiri altında olan riyakar, korrupsioner, rüşvətxor siyasətçilərdir.

Digər qrup Azərbaycanın müstəqil siyasətini qəbul etməyənlərdir: “Biz müstəqil siyasət aparırıq və aparacağıq. Azərbaycanın müstəqil siyasəti Azərbaycan xalqının maraqlarına xidmət edir”.

Buradan belə qənaətə gəlmək mümkündür ki, bir sıra xarici və daxili qüvvələr ölkəmizin müstəqil siyasətinə qarşı zidd mövqe nümayiş etdirməklə, həmin müstəqilliyə kölgə salmağa cəhdlər göstərirlər. Lakin müstəqillik, bütövlükdə, xalqın maraqlarını təmin etdiyinə görə, onların bəd əməlləri reallaşdırılmamış qalır.

Üçüncü qrupa isə Azərbaycana paxıllıq edənlərin aid olduğunu qeyd edən dövlət başçısı vurğulayıb ki, ölkəmizin BMT Təhlükəsizlik Şurasına üzv seçilməsi, keçmiş Sovet İttifaqından ancaq Azərbaycanın “Böyük İyirmiliy”in tədbirlərinə dəvət olunması, “Eurovision” yarışmasında böyük uğur, “Standard Poors”, Davos İqtisadi Forumu və digər nüfuzlu iqtisadi və maliyyə qurumlarının yüksək qiymətləri bizi istəməyənləri narahat edir: “Bizim haqqımızda böhtanlı məqalələrin müəlliflərinə ən gözəl cavab bizim reallıqlarımızdır, işimizdir, uğurumuzdur”.

RÖVŞƏN NURƏDDİNOĞLU

Səs.- 2012.- 12 aprel.- S. 3.