Mədəni-siyasi uğurumuz

“Eurovision” Mahnı Müsabiqəsinin başlanmasına 1 aydan az vaxt qalıb. Bu ərəfədə Azərbaycan əleyhinə dünya mətbuatında qərəz xarakterli fikirlər qeyd olunur. Dünya mətbuatında qeyd olunanları araşdırarkən, heç öz daxilimizdəki bəzi qüvvələrin də onlardan fərqli olmadığını görürük. Belə ki, çıxışları və fikirləri ilə düşmən mövqeyini xatırladan bəzi müxalif qüvvələrin məlumatları sadəcə Azərbaycanın dünyaya yanlış təqdim edilməsinə hesablanıb. Bütün bu məsələlərlə bağlı sualları Səs Tv-də yayımlanan “Gündəm” verilişinin qonaqları-“İki Sahil” qəzetinin baş redaktoru, Mətbuat Şurasının reket jurnalistlərə qarşı mübarizə komissiyasının sədri Vüqar Rəhimzadə, Mətbuat Şurasının şikayətlər komissiyasının sədri Müşfiq Ələsgərli cavablandırıb.

- “Eurovision” Mahnı Müsabiqəsi ərəfəsində Azərbaycanda hökm sürən ictimai-siyasi vəziyyətlə bağlı nə deyə bilərsiniz?

Vüqar Rəhimzadə:

-İlk olaraq, qeyd etmək istərdim ki, hazırda Azərbaycanda bayram əhvalı yaşanır. Dünyada da böyük əhəmiyyətə malik olan belə bir mötəbər tədbirin Azərbaycanda keçirilməsi son dərəcə əlamətdar hadisədir. Çoxları tərəfindən başqa cür qarşılansa belə, bu tədbir dünyanın Azərbaycana olan diqqətinin göstəricisidir. Ölkəmizdə gedən ictimai-siyasi proseslərə gəldikdə isə, bu gün Azərbaycanda kifayət qədər möhkəm əsaslara malik ictimai-siyasi sabitlik hökm sürür. Hər halda belə bir müsabiqənin ölkəmizdə keçirilməsi də buna sübutdur. “Eurovision” Mahnı Müsabiqəsinə Azərbaycanın ev sahibliyi etməsi ölkəmiz üçün mühüm hadisədir. Bu, bizim həm tarixi uğurumuz, həm mədəni və siyasi nailiyyətimizdir. Təbii ki, bu cür mədəniyyət hadisəsinin bəzən siyasiləşdirildiyi kimi hallarla da rastlaşırıq və bunu birmənalı şəkildə dəstəkləmirik. Çünki hər kəs bu müsabiqənin əhəmiyyətini dərk etməli və buna uyğun çərçivədə başa düşülməlidir.

Müşfiq Ələsgərli:

-Cəmiyyətimiz bir sıra sferalardan ibarət olsa da, mən ilk olaraq, ümumi dəyərləndirmə aparmaq istərdim. Belə ki, nikbinlik doğuran ən önəmli amil müsabiqənin keçirilməsində cavabdehlik daşıyan qurumların bu müsabiqəyə hazır olmasıdır. Bu müsabiqənin hazırlığı ilə məşğul olan dövlət strukturları, Azərbaycanın milli elitası, media qurumları kifayət qədər ciddi tədbirlər həyata keçirirlər və artıq, demək olar ki, hazırlıqlar tam başa çatmaq üzrədir. Televiziyalarda ölkəmizdəki hazırlıq işləri ilə bağlı kifayət qədər məlumat verilir və bütün bunlara əsaslanaraq, ictimaiyyətimizin bu müsabiqəyə tam hazır olduğunu deyə bilərəm. Azərbaycan xalqı bu məsuliyyətli nailiyyətin öhdəsindən layiqincə gələcək və müsabiqə öz simamızı dünyaya çatdırmağımıza kömək edəcək. Digər tərəfdən isə, “Eurovision” özlüyündə çox əhəmiyyətli hadisədir. Bildiyimiz kimi, postsovet məkanında Rusiya istisna olmaqla, başqa ölkələrdə keçirilməyən bu müsabiqənin indi Azərbaycanda keçirilməsi, ölkəmizin belə bir məsuliyyəti öz üzərində götürməsi çox dərin mənaları ifadə edir. Bu fakt Azərbaycanın beynəlxalq əhəmiyyətli tədbirlər keçirmək imkanına malik olduğunu göstərir. Cəmiyyətin aparıcı hissələrinin, dövlət nümayəndələrinin bu məsələyə hazır olduğu göz qabağında olsa da, təbii ki, bayaq da qeyd etdiyimiz kimi, cəmiyyət müxtəlif sferalardan ibarətdir. Məsələn, bu uğurumuzu ləkələməyə, gözdən salmağa çalışan həm yerli qüvvələr, həm də bir sıra xarici təşkilatlar mövcuddur. Lakin biz bütün bunların qarşısının alınması üçün gərəkli tədbirlər həyata keçiririk. Mətbuat Şurası, qeyri hökumət təşkilatları və bir sıra digər qurumlar ölkəmizdə gedən proseslərin aydın işıqlandırılması üçün lazımi tədbirləri görürlər.

- Bəzi xarici mətbuat orqanlarında Azərbaycanın müsabiqəyə hazır olmaması ilə bağlı qərəzli fikirlər səsləndirilir. Sizcə, burada əsas məqsəd nədir?

Vüqar Rəhimzadə:

-İlk olaraq, onu qeyd edim ki, bu müsabiqə yüksək səviyyədə hazırlanıb və uğurla da başa çatdırılacaq. Azərbaycanın iqtisadiyyatı, daxili-xarici siyasətinin gücü və bir sıra digər amillər regional deyil, beynəlxalq layihələrə ev sahibliyi etməyə hazır olduğunu sübut edir. Tarixən ölkəmiz imza atdığı bütün məsuliyyətlərin öhdəsindən layiqincə gəlib və bu da növbəti uğurumuzda bir daha özünü təsdiqləmiş olacaq. Azərbaycan bu gün bütün sahələrdə dinamik inkişafı ilə seçilən ölkədir. Ona görə də, uğurlarımızı, nailiyyətlərimizi qısqanan, bunun qarşısını müxtəlif maneələrlə almağa çalışan bir sıra dövlətlər mövcuddur. Təəssüf hissi ilə qeyd etməliyəm ki, burada həm beynəlxalq, həm də daxili qüvvələrin rolu var. Yəni beynəlxalq aləmdə qısqanılmağımız bəlkə normal qəbul oluna bilər, lakin öz daxilimizdə belə halların baş verməsi, təbii ki, baş ucalığı gətirən hal deyil. Fikir versəniz, görərsiniz ki, bu cür insanlar daima şəxsi maraqlarını dövlət maraqlarından üstün tutanlardır. Tarixi mövqlərinə nəzər salsaq, bu insanların yalnız öz şəxsi maraqlarına xidmət etdiyini görmək çətin deyil. Ona görə də bu insanlar ölkəmizin uğurlarını öz uğurları kimi görə bilmirlər. Onlar üçün Azərbaycanın nailiyyətləri faydasız və mənasızdır. Onlar sadəcə özlərinə sərf edəni etməyə çalışır, sərf etməyənlər isə dövlətin milli maraqlarını ifadə edən həqiqət də olsa, qarşısını almağa can atırlar. Azərbaycanın müxalifətyönlü qəzetlərinə nəzər saldıqda, burada “Azadlıq” qəzetinin adını xüsusilə qeyd etmək istərdim. Bu qəzet aqressiv və düşmən mövqeli çıxışları ilə bir növ Azərbaycanın uğurlarını qısqanan dövlətlərin, əsasən də, düşmən Ermənistanın dəyirmanına su tökür. Bu cür addımlarla çirkin niyyətlərini həyata keçirməyə çalışan müxalifət nümayəndələri bilməlidirlər ki, bu absurd niyyətlərdir. Lakin müxalifətin bu cür məsələlərə şərait yaratması, hansısa xarici təşkilatlardan gələn qrant hesabına dövlət maraqlarını öz şəxsi maraqlarına satmaları olduqca ürək ağrıdan və nifrət hissi oyadan hadisədir. Onların niyyətlərindən nəsə güdmələri isə, sadəcə, öz arzuları olaraq qalacaq.

- BBC kanalında “Eurovision-2012” Mahnı Müsabiqəsi ilə bağlı bir sıra məlumatlar və antitəbliğat aparılır. Sizcə, bütün bunlar nəyə işarədir?

Müşfiq Ələsgərli:

-Təbii ki, bu gün dünyanın ictimai rəyinin formalaşmasında yaxından iştirak edən bir sıra transmilli korporasiyalar mövcuddur. Bəli, BBC ilə bağlı verdiyiniz sual hazırda gündəmi məşğul edən məsələlər sırasındadır. Lakin mən ilk olaraq qeyd etmək istərdim ki, bunu məhz BBC-nin Azərbaycana qarşı apardığı kampaniya kimi qiymətləndirmək lazım deyil. Çünki bir sıra tarixi hadisələrə nəzər yetirsək, rahatlıqla görərik ki, bu transmilli korporasiya yanlış informasiyalara söykənərək, dəfələrlə həqiqətdənkənar məlumatlar yayımlayıb. Məsələn, 2000-ci illərdə İraqda xüsusi kəşfiyyat orqanları tərəfindən kimyəvi silahların tapılması ilə bağlı xəbər yayan BBC-nin bu yanlış məlumatı bu günə qədər də qalmaqal yaratmaqda davam edir. Digər bir misal yenə BBC kanalının ictimai rəyi çaşdırması ilə bağlıdır. Yaxın keçmişdə Liviyada baş verən hadisələr zamanı həmin transmilli korporasiya Liviyada insan cəsədlərindən ibarət məzarlıq olduğu ilə bağlı xəbərlər yaymışdı. Lakin artıq Liviyada hakimiyyət devrilib və hadisələr demək olar ki, başa çatıb, belə bir məzarlıq isə tapılmayıb. Yenə məlum olur ki, BBC kanalı ictimai rəyi çaşdırır və bəzən yanlış informasiyalar yayır. Sayı onlarla olan bu cür misalların sırasına indi də bizim ölkəmizin adı daxil edilmək üzrədir. BBC kanalı bu gün Azərbaycan haqqında yanlış kampaniya aparır. Lakin “Eurovision” qabağı belə bir kompaniyanın onlara qazandıracağı heç nə olmayacaq. Çünki insanlar bütün həqiqətləri öz gözləri ilə görəcəklər. Lakin burada yenə məsuliyyət Azərbaycan cəmiyyətinin üzərinə düşür. Belə ki, biz bir cəmiyyət olaraq bütöv formada öz simamızı təqdim etməyə çalışmalıyıq. Bu prosesdə də bizə mane olmaq istəyən daxili qüvvələrin qarşısını almaq üçün əlimizdən gələni etməli, onları ictimai qınaq obyektinə çevirərək, bu məsələdən kənarlaşdırmalıyıq.

- Azərbaycan müxalifətinin belə bir ərəfədə ölkəmizin maraqlarına zidd çıxışlar etməsi nə məqsəd güdür? Onlar Azərbaycanda söz azadlığının olmadığını iddia edirlər. Söz azadlığı olmadığındanmı müxalifət nümayəndələri ermənilərin informasiya mənbəyinə çevrilib?

Vüqar Rəhimzadə:

-İlk olaraq, qeyd edim ki, Azərbaycanda söz azadlığı model olaraq bir çox dünya ölkələrinə nümunə göstərilə bilər. Bu gün Azərbaycan mətbuatının inkişaf etdirilməsi üçün dövlət tərəfindən təqdirəlayiq addımlar atılır və bütün bunlar göz qabağında baş verir. 2008-ci ildə Azərbaycan Respublikası Prezidenti Yanında Kütləvi İnformasiya Vasitələrinin İnkişaf Dövlət Dəstəyi Konsepsiyasının yaradılması və 2009-cu ildə həmin fondun yaradılması bütövlükdə Azərbaycan mətbuatının inkişafına ciddi təsir edib. Bu gün Azərbaycanda jurnalistlərin sosial rifahının yaxşılaşdırılması, peşəkarlıqlarının artırılmasında bir sıra addımlar atılır. Ona görə də, bu gün Azərbaycan mətbuatında söz azadlığını müzakirə etmək heç bir düşüncəyə sığmır. Azərbaycanda söz azadlığının olmadığını iddia edənlərə demək lazımdır ki, söz azadlığı olmasa mətbuatda bu cür radikal fikirlər səsləndirilə bilərmi? Qətiyyən yox! Ona görə də həmin insanların bu cür çıxışlar edərək, çərçivəni bu qədər keçməsi sadəcə onların milli hisslərində olan problemlə əlaqəlidir. Onlar sadəcə öz milli vətənpərvərlik hisslərini itirmiş insanlardır. Onlar üçün vətən anlamı yoxdur. Təsəvvür edin ki, bu gün erməni mətbuatında Azərbaycan müxalifətinin məlumatları yerləşdirilir. Bu cür insanlar ictimaiyyətin qınağına tuş gəlməlidir. Onlar şansından uzaqlaşdırılmalıdırlar.

GÜNAY MƏMMƏDOVA

Səs.- 2012.- 26 aprel.- S. 7.