Qüdrətli Azərbaycan ordusu

Hazırkı şəraitdə sabitlik, davamlı, dinamik iqtisadi inkişafla yanaşı, güclü ordu quruculuğu müasir Azərbaycanı xarakterizə edən əsas amillərdən sayılır. Bu gün Azərbaycan mövcud nəhəng potensialdan səmərəli istifadə edərək, öz sosial-iqtisadi inkişafını daha da sürətləndirməklə yanaşı, ordu quruculuğuna da xüsusi diqqət yetirir. Bu baxımdan, ölkəmizin iqtisadi qüdrətinin getdikcə artması sosial məsələlərin həllinə və milli ordumuzun daha möhkəmlənməsinə, müasir silahlara, modern texnologiyaya yiyələnməsinə geniş imkan yaradıb.

Ordu quruculuğuna xüsusi diqqət yetirilir

Bəlli olduğu kimi, bu gün Azərbaycan torpaqlarının 20 faizi Ermənistanın işğalı altındadır. Ermənistanın işğal etdiyi ərazilərimizi sülh yolu ilə qaytarmaqdan yayınması ölkəmizi digər prioritet fəaliyyət sahələri ilə yanaşı, ordu quruculuğuna da xüsusi diqqət yetirməyə vadar edir.

Cəbhə xəttində atəşkəs rejiminin mövcudluğuna baxmayaraq, torpaqlarımızın bir hissəsində erməni işğalının və müharibə vəziyyəti davam edir. Bunu nəzərə alan Azərbaycan dövləti tamamilə haqlı olaraq öz ordusunun gücünü, hərbi kadrların peşəkarlıq səviyyəsini artırır, hərbi qüdrətini yüksəldir. Müasir dövrdə ölkəmizdə çox mühüm sahələr olan hərbi təhsil və hərbi səhiyyə də davamlı şəkildə inkişaf etməkdədir. Dövlət büdcəsindən hərbi sahəyə ayrılan xərclərin dəfələrlə artırılması ordumuzun bütün istiqamətlər üzrə potensialının yüksək səviyyəyə çatdırılmasına yol açıb.

Ölkə Prezidenti, Silahlı Qüvvələrin Ali Baş Komandanı İlham Əliyevin hərbi hissələrə, xüsusən, cəbhə xəttinə ardıcıl səfərlər etməsi ordumuzun mənəvi gücünü daha da artırır, hərbçilərimizin döyüş əhval-ruhiyyəsini əhəmiyyətli dərəcədə yüksəldir.

Ölkəmizin hərbi qüdrəti daha da artır

Dövlət başçısı ön xətdə xidmət edən əsgər və zabitlərimizlə hər görüşündə onlara qələbəyə böyük inam, sonsuz mübarizə əzmi aşılayır. Ali Baş Komandan bununla orduya xüsusi diqqət və qayğısını əyani şəkildə nümayiş etdirir.

Bu gün Azərbaycan hərbi potensial baxımından, işğalçı Ermənistandan dəfələrlə üstündür və müvafiq üstünlük heç də birdən-birə, təsadüfən meydana çıxmayıb. Ölkəmizin hərbi qüdrətinin artması ölkənin iqtisadi gücünün artması ilə qırılmaz şəkildə bağlıdır. Müasir dövrdə hər bir ölkənin uğurunu, inkişafını müəyyən edən amillər içərisində iqtisadi potensial və güclü ordunun mövcudluğu ön plandadır. Dövrün tələblərinə uyğun şəkildə qurulan müasir, mobil ordu həm müstəqilliyin möhkəmlənməsində, həm də ölkənin bölgədə geopolitik güc mərkəzinə çevrilməsində önəmli rol oynayır.

Cəmiyyətdə, insanların həyatında baş verən dəyişikliklər orduda da öz əksini tapır. Sabitlik, dinamik inkişaf və güclü ordu quruculuğu müasir Azərbaycan üçün əsas xarakterik cəhətlərdir və bu cəhətlər bir-birilə sıx bağlıdır. Güclü iqtisadi inkişaf, gəlirlərin durmadan çoxalması hərbi xərclərin ilbəil artmasına imkan verir.

Hər bir insan müəyyən gücə sahibdir və bu gücdən müəyyən məqamlarda istifadə etməyə zərurət yaranır. Cəmiyyət inkişaf etdikcə, bu zərurət kütləvi şüurda öz ifadəsini tapır və birgə müdafiə olunmaq, qorunmaq zərurəti yaranır. Bu mənada, son illərdə Azərbaycanda çox sürətlə və yüksək səviyyədə aparılan ordu quruculuğu işi artıq öz bəhrəsini verib. Bu gün Azərbaycan regionda ən güclü orduya malik olan dövlətə çevrilib.

Ordu cəmiyyətin bir hissəsidir

Nəzərə alınmalıdır ki, ordu cəmiyyətin bir hissəsidir, bu mənada, cəmiyyətdə baş verənlər bilavasitə orduya da sirayət edir.

Ordu quruculuğu elə bir spesifik sahədir ki, burada iş yalnız iqtisadi imkanlardan kifayət qədər bəhrələnməklə bitmir. Azərbaycan öz ordusunun gücünü, kadrların hərbi peşəkarlığını daim artırır, hərbi qüdrətini yüksəldir. Burada başlıca məqsəd, əsas niyyət isə, heç şübhəsiz, Azərbaycanın ərazi bütövlüyünü bərpa etmək, Qarabağın və ermənilərin zəbt etdikləri bütün bölgələri düşməndən təmizləməkdir. Artıq bu qəti mərhələyə doğru gedən yolda hərbi və siyasi baxımdan xeyli mühüm nəticələr əldə olunub və bu proses davam etməkdədir. NATO ilə sıx və səmərəli əməkdaşlığın əsas hədəfi də məhz ordu quruculuğu prosesini sürətlə təkmilləşdirmək, Silahlı Qüvvələri modernləşdirmək, müasir standartlara uyğunlaşdırmaqdır. Müşahidələr göstərir ki, Azərbaycan özünün potensial hərbi üstünlüyünü real nəticəyə çevirmək iqtidarındadır. Bu isə Azərbaycanın Ermənistan-Azərbaycan, Dağlıq Qarabağ münaqişəsi ilə bağlı aparılan danışqlarda mövqeyini daha da möhkəmləndirir, ölkəmizin müdafiə potensialını daha da artırır.

Mərkəzləşdirilmiş, nizami ordunun yaradılması Ümummilli Lider Heydər Əliyevin xidmətidir

Azərbaycan müstəqilliyini yenidən bərpa etdikdən sonra 1991-ci il sentyabrın 5-də Müdafiə Nazirliyinin yaradılması barədə qərar və həmin il oktyabrın 9-da Azərbaycan Respublikasının Ali Soveti tərəfindən Silahlı Qüvvələrin yaradılması haqqında qanun qəbul edilsə də, həmin dövrdə ordu quruculuğu ilə bağlı fəaliyyət olduqca yarıtmaz idi. Respublikamızın o vaxtkı rəhbərliyi bu qərarların həyata keçirilməsi üçün heç bir səy göstərmirdi.

Torpaqların müdafiəsi yalnız pərakəndə fəaliyyət göstərən könüllü dəstələrin ümidinə qalmışdı. Həmçinin, şəxsi mənafelərə qulluq edən ayrı-ayrı başıpozuq silahlı dəstələr vardı. Bütün bunlara yalnız Ümummilli Lider Heydər Əliyev 1993-cü ildə yenidən hakimiyyətə qayıtdıqdan sonra son qoyuldu. Ulu Öndər Silahlı Qüvvələrin Ali Baş Komandanı kimi hərbi sahədə vahid komandanlığın təmin edilməsinə, nizamlı ordunun yaradılmasına nail ola bildi. O, yerli özünümüdafiə və könüllü batalyonlar adı altında fəaliyyət göstərən silahlı birləşmələri ləğv edərək, vahid komandanlıq sistemində təşkil olunan nizami ordu yaratdı. Ali Baş Komandanın ön xəttə səfər edərək döyüşçülərimizlə səngərdə görüşməsi və onları döyüşə ruhlandırması öz real bəhrəsini verdi. Ali Baş Komandanın səngərlərə baş çəkməsini ordunun döyüş əhval-ruhiyyəsini yüksəltdi, 1994-cü ilin əvvəllərində Füzuli rayonunun Horadiz qəsəbəsi istiqamətində düşmənə qarşı uğurlu hərbi əməliyyat həyata keçirildi. 1994-cü il mayın 12-də elan olunan atəşkəsdən sonra Azərbaycanda nizami, müasir səviyyyəli ordunun qurulması prosesinə start verildi, nizami, müasir tələblərə uyğun ordu formalaşdırılmağa başladı.

Varislik prinsipi əsas tutularaq, Ümummilli Lider Heydər Əliyevin 22 may 1998-ci il tarixli Sərəncamı ilə 26 iyun Silahlı Qüvvələr günü kimi, 16 avqust 2000-ci il tarixli Sərəncamı ilə isə 18 avqust Sərhəd Qoşunları əməkdaşlarının peşə bayramı kimi qeyd edilir.

Cəmiyyətdə orduya böyük inam var

Prezident İlham Əliyev ordunun maddi təminatına da böyük diqqət ayırır. Bir qayda olaraq, dövlət büdcəsindən ən böyük ayırmalar məhz müdafiə sahəsinə olur. Son bir neçə il ərzində hərbi xərclərimiz 13 dəfədən çox artıb. 2010-cu ildə Azərbaycanın hərbi xərcləri qonşu Gürcüstan və Ermənistanın birgə götürülmüş hərbi xərclərindən təqribən iki dəfə çox olub. 2011-ci ildə də Azərbaycanın xeyirinə olan bu müsbət fərq daha da artıb. 2012-ci ildə isə Azərbaycan artıq regionda aparıcı hərbi gücə malik ölkə kimi dəyərləndirilir. Ölkəmizin hərbi sənaye sahəsində əldə etdiyi uğurlar da burada əhəmiyyətli rol oynayır. Diqqəti çəkən odur ki, Azərbaycanda Ermənistanla müqayisədə büdcənin nisbətən az qismi hərbi xərclərə yönəldilir. Başqa sözlə, Azərbaycanın hərbi büdcəsi məhz dövlət büdcəsinin ümumi göstəricilərinin artması hesabına yüksəlir. Belə vəziyyətdə Azərbaycan Cənubi Qafqazda ən güclü iqtisadiyyata malik olan ölkə olmaqla yanaşı, həm də ən qüdrətli orduya sahibdir.

Bütün bunlar məhz Azərbaycan Prezidentinin ordu quruculuğuna göstərdiyi böyük diqqətin, qayğının nəticəsində baş verib. Ordu və Ali Baş Komandan arasında mövcud olan bu möhkəm bağlılıq cəmiyyətin orduya münasibətinin formalaşmasına da öz təsirini göstərir. Bu gün Azərbaycan hərbçisi birbaşa ölkə rəhbərliyinin himayəsi və qayğısı ilə əhatə olunub. Cəmiyyət də Silahlı Qüvvələri kifayət qədər nüfuzlu və səviyyəli bir institut kimi qəbul edir və artıq hərbçi peşəsi sanballı bir peşə hesab olunur. Bu, cəmiyyətin orduya və dövlətə inamının artmasının, möhkəmlənməsinin əyani göstəricisidir.

Naib NİFTƏLİYEV

Səs.- 2012.- 26 aprel.- S.4.