Azərbaycan 2020: gələcəyə baxış

Son illər ərzində Azərbaycanın dinamik, davamlı inkişafı ölkəmizdə strateji hədəflərə yönələn mühüm dövlət proqramlarının, müvafiq konsepsiyaların gerçəkləşdirilməsini daha da aktuallaşdırır. Ölkəmizdə əldə edilən makroiqtisadi sabitlik, büdcə gəlirlərinin əhəmiyyətli dərəcədə artması, sosial-iqtisadi infrastrukturun modernləşməsi yenidən qurulması, müstəqil dövlətçiliyimizin bərpasından, möhkəmlənməsindən sonra formalaşan milli kadr potensialı dövlətimiz qarşısında duran strateji məqsədlərin reallaşmasına əlverişli zəmin yaradır.

Rifaha, firavan gələcəyə olan inam

Prezident İlham Əliyev Azərbaycanın strateji inkişaf prioritetlərini xüsusi olaraq, diqqətdə saxlayır və dövlət başçısının bilavasitə təşəbbüsü ilə ölkəmizin tərəqqisinə, rifahına, təhlükəsizliyinə, layiqli, sivil, demokratik inkişafına yönələn mühüm layihələr, dövlət proqramları, müxtəlif fəaliyyət sahələrini əhatə edən inkişaf konsepsiyaları qəbul olunur, müvəffəqiyyətlə həyata keçirilir.

Bütün bunlar strateji fəaliyyət yönümündə əldə edilən böyük nailiyyətlərdir və ölkəmizin hərtərəfli sosial-iqtisadi inkişafını, qlobal təhlükəsizlik sistemində aparıcı mövqe tutmasını, dövlətin, cəmiyyətin, bəşəriyyətin rifahına, firavan gələcəyinə olan inamı şərtləndirir. Bu baxımdan, Prezident İlham Əliyevin “Azərbaycan 2020: gələcəyə baxış” İnkişaf Konsepsiyasının hazırlanması barədə təşəbbüsü, gözlənildiyi kimi, cəmiyyətdə, ictimai rəydə çox müsbət reaksiya, pozitiv münasibət doğurub.

Mühüm dövlət proqramlarının, strateji konsepsiyaların məntiqi davamı

Bəlli olduğu kimi, bir müddət əvvəl, dövlət başçısı müvafiq Sərəncam imzalayıb və müvafiq konsepsiyanın ictimai müzakirələrin nəticələri, bütün adekvat səmərəli təkliflər nəzərə alınmaqla 2012-ci ilin sonunadək tam, dolğun şəkildə hazırlanıb başa çatdırılması və qəbul edilməsi nəzərdə tutulur. Prezident İlham Əliyev təşəbbüsü ilə hazırlanmaqda olan və çoxşaxəli sosial-iqtisadi, mədəni-mənəvi fəaliyyət istiqamətlərini əhatə edən bu konsepsiya birmənalı şəkildə Azərbaycanda əldə edilən iqtisadi uğurlara, yüksək, dinamik inkişaf tempinə söykənir və əhalinin rifahına, elmin, təhsilin inkişafına yönələn dövlət proqramlarının, konsepsiyaların məntiqi davamıdır. Bu mənada, hazırlanacaq müvafiq inkişaf konsepsiyasının başlıca müddəaları indiyədək ölkəmizin çoxcəhətli inkişaf göstəriciləri sahəsində əldə etdiyi mühüm nailiyyətlərə, yaxın gələcək üçün reallığa çevrilən böyük inkişaf potensialını əks etdirir.

Mövcud resursların səmərəli idarə olunması baxımından, təqdirəlayiq nəticə

Dövlət başçısının vurğuladığı kimi, müvafiq konsepsiyanın gerçəkləşdirilməsini mümkün edən, reallığa çevirən başlıca amil son onillikdə Azərbaycanda əldə olunan makroiqtisadi sabitlik, dinamik iqtisadi artımdır. Bu dövrdə yoxsulluğun azaldılmasında və əhalinin sosial rifahının yüksəldilməsində ciddi uğurlar nailiyyətlər əldə edilib, yoxsulluq səviyyəsi 5 dəfədən artıq azalaraq, 7 faiz həddinə düşüb. Digər inkişaf edən ölkələrlə müqayisədə bu çox uğurlu, yüksək göstəricidir və insan resurslarının səmərəli idarə olunması əhalinin sosial-iqtisadi rifahını daha da yaxşılaşdırmaq baxımından, əldə olunan təqdirəlayiq nəticədir.

Müasir, qloballaşan dünyada inkişaf pozitiv dinamika ilə, rasional, səmərəli fəaliyyətlə, konseptual yanaşma ilə sıx bağlıdır. Bu gün qlobal cəmiyyət səviyyəsində sosial-iqtisadi, siyasi, mədəni həyatda kəskin diferensiallaşma, geniş şaxələnmə müşahiədə edilir. Eyni zamanda, müxtəlif strateji fəaliyyət istiqamətlərinin yaxınlaşması, bir-birinə nüfuz etməsi baş verir.

Ən səmərəli, doğru, optimal seçim

Bu mənada, əldə olunan kifayətlənmək mümkün deyil və mövcud nailiyyətlər, əldə olunan, yaradılan uğurlu təməl əsasında, yeni inkişaf təmayüllərini mənimsəmək, inkişafa söykənərək, tərəqqiyə, inkişafdan-inkişafa doğru getmək ən səmərəli, doğru, optimal seçimdir. Bu gün ölkəmizdə sosial-iqtisadi islahatların əsas mərhələsi uğurla başa çatıb, ölkədə çoxminli azad sahibkar zümrəsi, sabitliyin, inkişafın dayaq sütunu sayılan geniş orta təbəqə formalaşıb. İnsanların sahibkarlıq fəaliyyəti, səmərəli iqtisadi, elmi, mədəni-kütləvi təşəbbüsləri dövlət səviyyəsində ciddi müdafiə və himayə edilir. Bütün bunlar azad bazar iqtisadiyyatı institutlarının yaranmasına, möhkəmlənməsinə səbəb olub. Sahibkar təşəbbüskarlığına söykənən iqtisadiyyat modelinin bərqərar olması, iqtisadi və sosial infrastrukturun təkmilləşdirilməsi sayəsində yüz minlərlə yeni iş yerləri açılıb, əhalinin məşğulluq səviyyəsi, güzəranı, rifahı əhəmiyyətli dərəcədə yüksəlib.

Növbəti 8 ili əhatə edəcək strateji konsepsiya

Bütün bunlar ölkəmizin gələcək inkişafı üçün geniş imkanlar, yeni üfüqlər yaradır. Belə şəraitdə Azərbaycanda növbəti 8 ili əhatə edəcək strateji inkişaf konsepsiyasının hazırlanması təşəbbüsünün ortaya atılması, müvafiq təşəbbüsün ictimai səviyyədə geniş, hərtərəfli şəkildə müzakirə olunması bütövlükdə Azərbaycan cəmiyyətini yeni, mütərəqqi, sosial rifahını, iqtisadi fəallığa yönələn müsbət dinamikaya, hər kəs üçün faydalı dəyişikliklərə kökləmək deməkdir.

Bu konsepsiyanın digər mühüm dövlət proqramlarından, sosial yönümlü strateji konsepsiyalardan mühüm fərqi onun nisbətən daha geniş müddəti - 8 ili əhatə etməsidir. Müvafiq müddət heç də təsadüfi seçilməyib. Dövlət və cəmiyyət qarşısında 8 ili əhatə edən konseptual vəzifələrin qoyulması onu göstərir ki, Azərbaycan bu gün mütərəqqi, sivil, demokratik inkişaf yolu seçən dövlət kimi yeniliyə, inkişafa, tərəqqiyə hər zaman hazırdır. Ölkəmizin bu istiqamətdə başlıca hədəfi inkişaf etmiş dövlətlər sırasına çıxmaqdır. Bu prosesdə dövlət-cəmiyyət harmoniyası mühüm əhəmiyyət kəsb edir.

Mühüm əhəmiyyət kəsb edən yeni prioritetlər

Bu mənada, Azərbaycan yeni, qlobal əhəmiyyət kəsb edən prioritetlərlə üz-üzədir, məzmunca, mahiyyətcə, əsas prinsiplər etibarı ilə daha çevik, rasional yanaşma tələb edən yeni inkişaf mərhələsinə qədəm qoyur. Dövlət başçısının vurğuladığı kimi, bu mərhələnin əsas hədəfi çoxşaxəli, səmərəli və innovasiya yönümlü iqtisadiyyatın formalaşdırılması, sosial sahədə önləyici inkişaf trendinin təmin olunması və əhalinin rifahının layiqli, qabaqcıl beynəlxalq standartlara uyğun səviyyəyə çatdırılması, habelə, elmin, mədəniyyətin inkişafında, ictimai həyatın bütün istiqamətlərində yeni nailiyyətlərin əldə olunmasıdır. Aydındır ki, belə mühüm konsepsiyanın hazırlanması nisbətən geniş vaxt, eləcə də, ictimaiyyətçilərin, peşəkar, ixtisaslı, yüksək kvalifikasiyalı mütəxəssislərin prosesdə fəal iştirakını tələb edir. Bu konsepsiya, ümumilikdə, Azərbaycanın perspektiv inkişaf hədəfi və istiqamətlərinin müəyyən edilməsi məqsədi daşıyır və 2020-ci ilədək olan dövrü əhatə edir. Müvafiq layihənin hazırlanmasına nisbətən geniş müddətin - bir ilə qədər vaxtın ayrılması “Azərbaycan 2020: gələcəyə baxış” İnkişaf Konsepsiyasının xüsusi əhəmiyyəti ilə bağlıdır.

İnkişaf, tərəqqi istiqamətində yeni perspektivlər

Bəlli olduğu kimi, müvafiq İnkişaf Konsepsiyası layihəsinin hazırlanmasına ümumi rəhbərlik, təşkilati və əlaqələndirici səlahiyyətlərin həyata keçirilməsi dövlət başçısının müvafiq Sərəncamı ilə Azərbaycan Prezidentinin Administrasiyasına həvalə edilib və bununla bağlı indiyədək rəsmi və ictimai təşəbbüslər səviyyəsində ziyalıların, elm xadimlərinin, ictimaiyyət nümayəndələrinin geniş tədbirlər, səmərəli müzakirələri keçirilib. Bütün bunlar ölkəmizin inkişaf perspektivi baxımından, əhalinin, vətəndaşların ictimai təşəbbüskarlığını artırır, ölkəmizin dünyada inkişaf səviyyəsinə görə, aparıcı, qüdrətli dövlətlərdən birinə çevrilməsi istiqamətində yeni perspektivlər yaradır.

“Səs” Analitik Qrupu

Səs.- 2012.- 27 aprel.- S.5.