“Eurovision-2012” möhtəşəm şousuna sayılı günlər qalıb

Bakı möhtəşəm “Eurovision-2012” Mahnı Müsabiqəsinin lap astanasındadır. Bir neçə gündən sonra müsabiqəyə start veriləcək. Dünya ölkələrinin təmsilçiləri Odlar Yurdunda məşəl ətrafına toplaşıb bir-birindən fərqli mahnıları ilə beynəlxalq aləmin diqqətini bir məkana cəmləyəcəklər. Həyəcan dolu yarışda Azərbaycan özünəməxsus olan dəyərləri ilə irqi, dini fərqli insanları təəccübləndirəcək. Onlara müsbət enerji bəxş edəcəkdir. Builki yarışmanın müsabiqənin 57 illik tarixində ən möhtəşəmi olacağı şübhə yaratmır. Elə yarışma təmsilçilərinin, Avropa Yayım Birliyinin və digər rəsmilərin yarışmaya hazırlığı, Bakı ətrafındakı müxtəlif fikirləri ölkəmizin böyük uğurla yarışmanı başa vuracağından xəbər verir.

Bakı sakinləri ilə bahəm, yarış iştirakçıları da müsabiqənin başlanacağı günü həyəcanla gözləyirlər. Belə ki, Azərbaycanın ev sahibliyi etdiyi “Eurovision Mahnı Müsabiqəsi 2012”-nin keçiriləcəyi “Bakı Kristal Zalı” builki yarışma təmsilçilərinin xüsusilə maraq dairəsindədir. Şəhərimizin qonağı olan Gürcüstan təmsilçisi Anri Joxadze “Bakı Kristal Zalı”nı ziyarət etdikdən sonra Xəzər dənizi sahilində inşa olunan bu möhtəşəm binaya heyranlığını dilə gətirib: “Mən bu məkanda möhtəşəm şounu səbrsizliklə gözləyirəm”- deyib. Xatırladaq ki, Anri “Eurovision Mahnı Müsabiqəsi 2012”-də mübarizəyə mayın 24-də keçiriləcək ikinci yarımfinalda qoşulacaq və müsabiqədə “İ’m a Joker” adlı mahnıyla çıxış edəcək.

Sloveniyanın 57-ci “Eurovision” Mahnı Müsabiqəsindəki təmsilçisi Eva Botoya isə bu möhtəşəm səhnədə yaradılan imkan və ab-hava nəticəsində, bütün bacarıqlarını nümayiş etdirəcəyini bildirib: “Mənim arzum gerçək oldu. Hazırda özümü yuxudakı kimi hiss edirəm.” Eva Bakıdakı çıxışının finaldakından fərqlənəcəyini bildirib. Bu və ya digər fikirlər yarışmanı həvəslə gözləyən təmsilçilərin “Eurovision-2012”yə necə diqqət ayırdıqlarını göstərir.

Bosniya və Herseqovina təmsilçisi Azərbaycan və şousu haqqında olan təəccübünü gizli saxlaya bilməyib. Bosniya və Herseqovinanın “Eurovision-2012” Mahnı Müsabiqəsi təmsilçisi Maya Sar builki müsabiqə mahnılarının özünəməxsus olduğunu və ifaçılara çox yaraşdığını bildirib. “Korake ti znam” adlı mahnısını doğma dildə oxumasının səbəbini o, belə izah edib: “Mahnı Bosniya dilində yazılıb. Düşünürəm ki, oradakı emosiya və ismarıcı dinləyicilər çox gözəl hiss edəcəklər.” Azərbaycana səfər edəcəyi günü səbirsizliklə gözləyən Maya Sarın builki “Eurovision” şousu ilə bağlı düşüncələri isə belədir: “Azərbaycanın möhtəşəm ölkə olduğunu eşitmişəm. Builki “Eurovision” təmsilçiləri arasında dostlarım çoxdur. Ona görə də birlikdə müsabiqəyə hazırlaşmaq və işləmək çox xoş olacaq”.

“BAKI KRİSTAL ZALI”NDA “EUROVİSİON-2012” NİN ALTI QEYRİ-ADİ ŞOUSU İZLƏNLƏCƏK

Bu gün “Bakı Kristal Zalı”nda şou hazırlıqları davam edir. May ayında paytaxtımızın yeni arenasında - “Bakı Kristal Zalı”nda “Eurovision-2012” Mahnı Müsabiqəsinin altı qeyri-adi şousunu izləmək mümkün olacaq. Belə ki, mayın 21-də birinci yarımfinalın əsas məşqi, mayın 22-də birinci yarımfinal, mayın 23-də ikinci yarımfinalın əsas məşqi, mayın 24-də ikinci yarımfinal, mayın 25-də jüri finalı və nəhayət, mayın 26-da “Eurovision-2012”nin finalı olacaq. Məhz həmin gün - mayın 26-da Azərbaycan təmsilçisi Səbinə Babayeva “Bakı Kristal Zalı”nın səhnəsinə çıxacaq. Səbinə xanımın hazırda arenada şou hazırlıqları sürətlə davam edir. Şounun detalları sürpriz ediləcək.

MƏTBUAT MƏRKƏZİNDƏ YÜKSƏK SÜRƏTLİ WI FI SİSTEMİ QURAŞDIRILIB

“Eurovision -2012” Mahnı Müsabiqəsinin Mətbuat Mərkəzi mayın 13-də açılacaq. Burada 1500-dən artıq jurnalistin fəaliyyət göstərmək imkanı var. “Bakı Kristal Zalı”nın yaxınlığında inşa olunan Mətbuat Mərkəzində yüksək sürətli WI FI sistemi quraşdırılıb. Eurovision.az saytı xəbər verir ki, burada 1500-dən artıq yerli və xarici jurnalistin eyni vaxtda işləməsinə imkan olacaq. Jurnalistlər xüsusi kabinələrdə müxtəlif müsahibələr ala biləcək. Mərkəzin bir küncündə yaradılan studiyada isə televiziya müsahibələrinin çəkilişlərini həyata keçirmək olacaq. Mətbuat Mərkəzində, həmçinin, eyni vaxtda 500 jurnalistin iştirak edə biləcəyi konfrans zalı fəaliyyət göstərəcək. Bundan başqa, jurnalistlərin rahatlığı üçün kafeteriyanın olduğu istirahət zonası da yaradılıb. Bütün bunlar Azərbaycanın möhtəşəm şouya hazırlığını ifadəsidir. Dünya ölkələrindən gələcək xarici qonaqların tam rahat şəkildə qarşılamaq üçün görülən işlər xalqın qonaqpərvəriliyin də bir nümunəsidir. Təbii ki, bu dəyərlərin təqdimində dövlətin iqtisadi gücü əsas amillərdən olduğundan ölkəmizdə bu və ya digər hazırlıq işləri aprılır.

AZƏRBAYCANDAKI UNİKAL AKSİYA “LİGHT YOUR FİRE” ŞÜARINI SİMVOLİZƏ EDİB

Onu da qeyd edək ki, yarışmanın möhtəşəm şəkildə təşkili məqsədi ilə müxtəlif layihələr də gerçəkləşir. “Eurovision”un Azərbaycandakı rəsmi Fan Klubu tərəfindən təşkil edilən aksiyalar müsabiqəyə diqqəti artırır. Belə ki, keçirilən moto-yürüş zamanı moto-Bakı və digər moto klubların üzvləri bir ayara gəlib. “Eurovision-2012” Mahnı Müsabiqəsinin şüarını birlikdə səsləndirən yürüş iştirakçıları diqqəti üzərilərinə cəmləşdirə biliblər. Fan Klubunun üzvləri tərəfindən müsabiqə ərəfəsində bu cür aksiyalar davamlı olacaq. Onu da qeyd edək ki, “Eurovision”un Azərbaycandakı rəsmi Fan Klubu ilk dəfə olaraq “Muğam” flashmobu da keçirib. Bu layihənin davamı kimi Azərbaycanda ilk dəfə olaraq, unikal aksiya da start verilib. Dənizkənarı Milli Parkda “Eurovision 2012” ərəfəsində unikal layihənin reallaşması Azərbaycanın yarışmaya tam diqqətlə yanaşmasını göstərir. Dəniz sahilinə toplaşan çoxsaylı gənc hava fənərlərini yandıraraq, səmaya uçurdub. “Eurovision” Mahnı Müsabiqəsinin Azərbaycandakı rəsmi Fan Klubunun təşəbbüsü ilə Dənizkənarı Milli Parkda təşkil olunan aksiyada müxtəlif rənglərdə olan hava fənərlərinin yandırılaraq havaya uçurdulması “Eurovision Mahnı Müsabiqəsi 2012”-nin “Light Your Fire” şüarını simvolizə edib. Aksiyanın əsas məqsədi “Eurovision” Mahnı Müsabiqəsinə sayılı qalan günlər ərəfəsində əhalidə müsabiqəyə qarşı marağı daha da artırmaqdır.

Nəzakət ƏLƏDDİQIZI

Səs.- 2012.- 28 aprel.- S. 5.