Odlar Yurdu beynəlxalq şou ərəfəsində

Ölkənin artan iqtisadi gücü, potensialı onun görkəminin dəyişməsinə səbəb olur, bu dövlətini dünya dövlətləri arasında yerini mövqeyini ortaya qoyur. Qısa bir vaxt ərzində ölkə ərazisində aparılan abadlıq-quruculuq işləri, yeni binaların tikintisi, mədəniyyət ocaqlarının təmir və bərpası ölkənin zahiri görkəmini tamamilə dəyişmiş, onun inkişaf etmiş Avropa ölkələri ilə müqayisəsinə zəmin yaratmışdır. Belə bir yüksəlişə nail olan Azərbaycanın bütün sahələrdəki nəzərəçarpacaq irəliləyişləri ölkəmizin qonağı olan insanların da diqqətindən kənarda qalmır. Ölkəmizlə bağlı zəngin təəssüratı özündə ehtiva edən Azərbaycan qapısını açdığı hər bir ölkəyə rəmzlərini, Odlar Yurdu olduğunu göstəriciləri ilə təqdim edir.

Bu nailiyyətlər bizi müşayiət etdiyi bir zamanda “Eurovizion-2012” Mahnı Müsabiqəsinin Azərbaycanda keçirilməsi onun möhtəşəmliyini dünya xalqlarına nümayiş etdirməkdə əhəmiyyətlidir. Uzun illər sovet imperiyasının tərkibində olan bir dövlətin qısa zaman fasiləsindəki uğurları şəhərimizin qonağı olan hər kəsin təəccübünə səbəb olur. Elə beynəlxalq səviyyəli müsabiqənin də ölkəmizdə keçirilməsi mövcud olan dəyərlərimizə yüksək səviyyədə yetirilən diqqət səbəbdir. Müsabiqəni Azərbaycana gətirən cütlük musiqi sənəti tariximizdə yeni bir səhifəni yazdılar. Bu sətirlərin yazılmasına səbəb uzun illər mədəniyyət və incəsənətimizə, milli- mənəvi dəyərlərimizə dövlət tərəfindən yetirilən diqqət olmuşdur. Azərbaycanın müsabiqədə 4 illik iştirakı dövründəki bu qalibiyyət Azərbaycan musiqisinin hansı səviyyədə olduğunu göstərir. Birinci iştirakdan başlayaraq, son dövrə qədər Azərbaycan təmsilçiləri iştirakçıları təəccübləndirib. “Eurovision” Mahnı Müsabiqəsinin icraedici rəhbəri Yan Ola Sandın sözlərinə görə, Azərbaycanın müsabiqədə olduğu hər çıxışı yaddaqalan olub: “Azərbaycan müsabiqəyə qatıldığı ildən mən bu ölkənin qalib gələcəyinə əmin idim. Əslində, Azərbaycanın iştirakının 4-cü ilində qalib gəlməsi bizə qəribə gəlmədi və bizi şoka salmadı. Çünki Azərbaycan bu qalibiyyətə ilk ildən layiq idi. Düşünürəm ki, bu il də Azərbaycanın şansları yüksək olacaq və qalib gəlmək imkanı olacaq”.

Avropanın möhtəşəm televiziya şousu Azərbaycan auditoriyasında

Xatırladım ki, Azərbaycanın “Eurovision” Mahnı Müsabiqəsi layihəsində iştirakının ilk mərhələsi bu yarışmanı yayımlamaqla başlayıb. “Eurovision” Mahnı Müsabiqəsi Azərbaycanda ilk dəfə 2006-cı ildə yayımlanıb. Həmin ilin may ayında İctimai Televiziya Yunanıstanda keçirilən 51-ci “Eurovision” Mahnı Müsabiqəsini Azərbaycan izləyicilərinə təqdim edib. Bu ənənə 2007-ci ildə də davam edib və Finlandiyanın paytaxtı Helsinkidə təşkil olunan Avropanın möhtəşəm televiziya şousu - “Eurovision” Mahnı Müsabiqəsi ikinci dəfə Azərbaycan auditoriyasına yayımlanıb.

Artıq Azərbaycanın “Eurovision” Mahnı Müsabiqəsində fəal iştirakı üçün sosial tələbat var idi. 2007-ci ilin iyul ayında Azərbaycan İctimai Televiziya və Radio Yayımları Şirkətinin timsalında Avropa Yayımları Birliyinə (EBU) üzv qəbul olundu. Elə həmin ildən də ölkəmiz “Eurovision” Mahnı Müsabiqəsi layihəsinə iştirakçı kimi qoşulub. Həmin ildən başlayaraq müsabiqədə Azərbaycanın adı ön sıralarda çəkildi. Bu, Azərbaycan musiqisini əzəmətini, onun tarixi köklərinin möhtəşəmliyini əsaslandıran amildir.

Paytaxt Bakı xarici qonaqların gözü ilə...

Bakı 2012-ci ildə keçiriləcək yarışmaya hazır vəziyyətdədir. “”Eurovision”-2012” Mahnı Müsabiqəsi ilə bağlı həyata keçirilən bütün tədbirlər bu məqsədə xidmət edir. Azərbaycanın simasının dəyişməsi paytaxtımızın qonağı olan hər kəsin diqqətini çəkir. Sözsüz ki, məsuliyyət və diqqət möhtəşəm musiqi bayramı ilə bağlı təəssüratları zənginləşdirir. Bakının küçələri, onun möhtəşəm otelləri, insanların mehriban və gülərüzlüyü hər kəsdə xoş izlər buraxır.

Abadlıq-quruculuq işləri ilə yanaşı, Azərbaycanda olan qonaqpərvərlik qeyri-millətləri valeh edir. Bunu yüksək dəyərləndirən “Eurovision” Mahnı Müsabiqəsinin icraedici rəhbəri Yan Ola Sand 2012-ci ilin mayında bu qonaqpərvərlikdən çoxsaylı insanların bəhrələnəcəyinə əminliyini bildirib: “Hər gəlişimdə Bakını daha çox sevirəm. Azərbaycan barədə düşüncələrim çox yaxşıdır. Xüsusi ilə Azərbaycan mətbəxindən doymaq olmur”. “”Eurovision”-2004”-ün qalibi Ruslana Bakıdakı hər çıxışından məmnunluq hissi keçirdiyini bildirib: “Buradakı insanları sevirəm. İl ərzində bura çox tez-tez gəlirəm”. “”Eurovision”-2009”-un qalibi Aleksandr Rıbak Bakının indi daha da gözəlləşdiyini bildirib: “Burada çoxlu sayda yeni binalar gördüm. Bakıda iki il bundan əvvəl olmuşam. Şəhər tamamilə fərqli idi. Bakı sürətlə dəyişir. Mən Bakını onda da sevirdim. İndi isə o, daha da gözəldir.”

Bütün Avropaya bacarığını təqdim edən Azərbaycanın milli seçiminin qalibləri

Dünya ölkələrində olduğu kimi, Azərbaycanda da “Eurovision” Mahnı Müsabiqəsində iştiraka hazırlaşır. “Eurovision” Mahnı Müsabiqəsi 2012-ci il Azərbaycan təmsilçisinin müəyyənləşməsi üçün keçirilən milli seçimlərin sonuncu həftəsinin qalibi müəyyən olundu. Xatırladaq ki, milli seçimlərin canlı efir həftəsinə ötən il noyabrın 28-də start verilib. Seçimlərdə səkkiz həftə ərzində 72 iştirakçı növbəti mərhələyə çıxmaq uğrunda mübarizə aparıb. Bütün Avropaya öz bacarığını təqdim edən Azərbaycanın milli seçimlərin yarımfinalının 8 iştirakçısı məlum olub. Bunlar Orxan Kərimli, Məryəm Sadıqova, Xəyyam Mustafazadə, Fəqan Səfərov, Elton İbrahimov, Adil Baxışlı, Səbinə Babayeva və Arzu İsmayılovadır. Qeyd olunan ifaçılar milli seçimlərin final mərhələsi uğrunda mübarizə aparacaq.

Yeni mətbuat mərkəzi inşa olunur

Azərbaycanda keçiriləcək belə bir qələbəni izləmək üçün 1600 nəfər xarici jurnalist ölkəmizə səfər edəcək. Bunun müqabilində Azərbaycan həm də öz mədəniyyətini yüksək səviyyədə əks etdirmək imkanını əldə etmiş olacaq. Bu tərkibdə olan jurnalistlər üçün mətbuat konfranslarını keçirilməsi məqsədi ilə “Baku Kristall Nall”ın yaxınlığında mətbuat mərkəzinin tikintisinə başlanılıb. Bu mətbuat mərkəzində jurnalistlərin peşə fəaliyyətini həyata keçirmək üçün hər bir şərait yaradılacaq. İnşa olunacaq bu məkan digər ölkələrdə indiyədək olan mətbuat mərkəzlərindən fərqlənəcək. Bütün jurnalistlərin işlərini mükəmməl şəkildə həyata keçirmələri üçün hər bir şəraitin yaradılması nəzərdə tutulub.

Azərbaycanın təşkil edəcəyi bu beynəlxalq musiqi yarışması uzun illər yaddaşlarda qalacaq. Bu fikri söyləməyə əsas verən amillər günümüzə qədər görülən işlər və layihələrin reallaşmasıdır.

Zümrüd BAYRAMOVA

Səs.- 2012.- 1 fevral.- S. 5.