Xocalı soyqırımı-20

İlham Əliyev: “Xocalı soyqırımı haqqında həqiqətlər dünya ictimaiyyətinə, xarici ölkələrin parlamentlərinə çatdırılmalı, Azərbaycan xalqının və ümumən insanlığın əleyhinə yönəldilmiş bu son dərəcə ağır hərbi cinayət beynəlxalq miqyasda öz hüquqi-siyasi qiymətini almalıdır”

Bildiyimiz kimi, Prezident İlham Əliyev Xocalı soyqırımının 20-ci ildönümünün qeyd olunması haqqında Sərəncam imzalayıb. Ölkəmiz və bəşəriyyət üçün əhəmiyyət kəsb edən hə min Sərəncamda vurğulanır ki, azərbaycanlılara qarşı erməni şovinist dairələrinin XIX-XX əsrlərdə mərhələ-mərhələ həyata keçirdiyi etnik təmizləmə siyasətinin tərkib hissəsi olan Xocalı soyqırımı haqqında həqiqətlər dünya ictimaiyyətinə, xarici ölkələrin parlamentlərinə çatdırılmalı, Azərbaycan xalqının və ümumən insanlığın əleyhinə yönəldilmiş bu son dərəcə ağır hərbi cinayət beynəlxalq miqyasda öz hüquqi-siyasi qiymətini almalıdır.

Qeyd edək ki, Xocalı soyqırımının tanınması istiqamətində istər diaspora, istərsə də, Azərbaycanda və xarici ölkələrdə fəaliyyət göstərən ayrı-ayrı təşkilatlar tərəfindən davamlı işlər aparılmış və bu mühüm işlərin nəticəsi olaraq, bir çox dövlətlərdə Xocalı faciəsinə rəsmi münasibətlər bildirilmişdir.

Xocalı soyqırımı Belçika parlamentində

Azərbaycan-Belçika parlamentlərarası əlaqələr üzrə işçi qrupu Xocalı soyqırımı məsələsinin Belçika parlamentində müzakirə olunması ilə bağlı müəyyən iş aparıb. Azərbaycan-Belçika parlamentlərarası əlaqələr üzrə işçi qrupunun səyi nəticəsində, artıq bu il sözügedən məsələ Belçika parlamentində müzakirə olunacaq. Bundan əlavə, işçi qrupunun planına Azərbaycan haqqında məlumatların Belçika televiziyasında yayılması, iki ölkənin universitetləri arasında tələbə mübadiləsinin aparılması və digər məsələlər də daxildir.

Meksika Senatı Xocalı soyqırımını tanıyır

Meksika Senatı isə artıq Xocalı soyqırımını rəsmən tanıdığını bəyan edib. Senatın qərarının əhəmiyyəti ondan ibarətdir ki, ilk dəfə olaraq Xocalı soyqırımı xarici ölkənin parlamenti tərəfindən tanınıb. Bundan əlavə, bu qərar ən böyük və aparıcı Mərkəzi Amerika dövlətlərindən birinin parlamenti tərəfindən qəbul olunub.

Türkiyə Böyük Millət Məclisində qanun layihəsi

Türkiyə Böyük Millət Məclisində də Xocalı qətliamının ildönümü ərəfəsində XX əsrin ən ağır cinayətlərindən biri olan bu soyqırımının tanınması üçün parlamentə qanun layihəsi təqdim olunacaqdır.

Bundan başqa, Ankarada Xocalı soyqırımı qurbanlarının xatirəsinə abidə ucaldılması və Türkiyə paytaxtının mərkəzi küçələrindən birinin “Xocalı” adlandırılması təklifləri müzakirə olunacaqdır.

İslam Əməkdaşlıq Təşkilatına üzv dövlətlərin Parlament İttifaqının Xocalı soyqırımı ilə bağlı əhəmiyyətli qərarı

İslam Əməkdaşlıq Təşkilatına üzv dövlətlərin Parlament İttifaqının (İƏT Pİ) İndoneziyanın Palembanq şəhərində keçirilən 7-ci sessiyası öz işini başa çatdırıb. Belə ki, sessiyada “Azərbaycan Respublikasına qarşı Ermənistan Respublikasının təcavüzü” adlı ənənəvi olaraq qəbul edilən qətnaməyə İKGF-nin təşəbbüsü ilə xüsusi bir bənd əlavə edilib.

Xocalı faciəsinə həsr edilən paraqrafda qeyd edilir ki, konfrans üzv ölkələrin parlamentlərini 2012-ci ildən etibarən (faciənin 20 illiyi) 26 fevral 1992-ci ildə Ermənistan silahlı qüvvələri tərəfindən dinc azərbaycanlı əhaliyə qarşı həyata keçirilən və soyqırım xarakteri daşıyan kütləvi qırğını müvafiq şəkildə tanımağa çağırır və Xocalı qırğınını törədənləri məsuliyyətə cəlb etməyi tələb edir.

Xüsusilə, qeyd etmək yerinə düşərdi ki, bütün bu önəmli qərarlar Heydər Əliyev Fondunun vitse-prezidenti Leyla Əliyeva tərəfindən irəli sürülən “Xocalıya ədalət” kampaniyasının fəaliyyətinin nəticəsi olub. İƏT Pİ-nin faciəyə verdiyi qiymət İKGF və bu qurum arasında əməkdaşlıq haqqında müvafiq qətnamələrin tələblərindən irəli gəlir. Belə ki, İKGF-nin irəli sürdüyü əlavələrdən sonra konfrans yekun hesabatda qurumun katibliyinə üzv ölkələrin parlamentlərinin “Xocalıya ədalət” kampaniyasına milli və beynəlxalq səviyyədə dəstək göstərilməsinə çağıran qətnamənin həyata keçməsini diqqət mərkəzində saxlamağı tapşıran müvafiq qərar qəbul edib.

RÖVŞƏN RƏSULOV

Səs.- 2012.- 4 fevral.-S.7.