İlham Əliyev - Dünya Azərbaycanlılarının Lideri

Fevralın 26-da Azərbaycanımız, xalqımız, millətimiz XX əsrin ən qanlı qətliamını - Xocalı soyqırımının 20-ci ildönümünü andı və həmin gün bir həqiqət, bir gerçəklik və bir mövcudluq bütün dünyaya agah oldu. Agah oldu ki, Azərbaycan xalqı sarsılmazdır, yekdildir və həmin birliyinin önündə dönməz, xarizmatik, xalqına xidmət edən mütərəqqi Lider var. O Lider Azərbaycan Respublikasının Prezidenti İlham Əliyevdir.

Yüz minlərlə insanı arxasınca aparan mütərəqqi Lider

O gün bütün dünya birliyi bir daha şahid oldu ki, Azərbaycanda xalq-lider və lider-xalq prinsipi dəyişməzdir, əbədidir. Çünki həmin vəhdəti əldə saxlayan, onu dönməz edən, xalqına güvənən, eyni zamanda, xalqının güvənc yeri olan dövlət başçısı var. O gün Azərbaycan ictimaiyyəti siyasi mənsubiyyətindən asılı olmayaraq, yalnız bir nöqtəyə doğru baxırdı, ona görə ki, həmin nöqtənin baxış bucağını vahid Lider müəyyənləşdirmişdi. Həmin baxış bucağı bizlərdən o qədər də uzaqda olmayan dağılmış, xaraba qalmış, bu gün də qətlə yetirilən insanlarımızın ah-nalələrinin, ruhlarının dolaşdığı Xocalı şəhəri idi. Azərbaycan xalqının Lideri Prezident İlham Əliyev Onun arxasınca axın edən nəhəng xalq kütləsinin önündə qətiyyətlə addımladı və hər addımında bu qanlı faciəni törədən erməni qaniçənlərinə mesaj yolladı. Həmin mesajın mükəmməlliyi, qətiyyətlilyli isə ondan ibarət idi ki, bu gün işğalçı Ermənistanın rəhbərliyi yekdil tərzdə yürüşə çıxan xalqdan çəkindi, qorxdu və susmağı üstün tutdu. Dünya birliyi qarşısında növbəti dəfə öz “günahsızlıq prezumpiyasını” qondarma məzlumluqları ilə sübuta yetirməyə cəhd göstərmədilər. Çünki həmin susqunluğun arxasında qəzəb mesajı dayanmışdı. Azərbaycan xalqının Ali Baş Komandanı İlham Əliyev Xocalı soyqırımının 20-ci ildönümü ilə bağlı xalqa etdiyi müraciətində deyib: “Sizi əmin etmək istəyirəm ki, Xocalı soyqırımını həyata keçirənlər gec-tez ədalət məhkəməsi qarşısında cavab verərək layiqli cəzalarını alacaq, şəhidlərimizin qanı yerdə qalmayacaq”.

Bu müraciət Onun həm də doğma xalqına olan Lider sözü idi. Həmin söz özünü məhz 26 fevral tarixində paytaxt Bakıda doğrultdu. Azərbaycan xalqı öz Liderinin arxasınca Qarabağa, əzəli və əbədi torpaqlarını erməni işğalçılarından azad etməyə hazır olduğunu bir daha nümayiş etdirdi.

Böyük Türk dünyası və dünya birliyi Xocalını andı

Bu qanlı-qadalı faciənin 20-ci ildönümü yalnız Azərbaycanda deyil, qardaş Türkiyədə, eləcə də, bütün dünya miqyasında izdihamlı etiraz mitinqləri ilə anıldı. Türkiyədə yüz minlərlə insanın qatıldığı yürüş-mitinqlər, kütləvi tədbirlər, müxtəlif istiqamətli aksiyalar bütün dünyaya səs saldı, xocalılıların 20 il öncəki ah-naləsini bəşəriyyət eşitdi. Həmçinin, ayrı-ayrı ölkələrdə yaşayan nəhəng türk toplumu da Xocalıda dinc insanlara qarşı bu bəşəri cinayəti törətmiş erməni cinayətkarlarını lənətlədilər. Dünya ictimaiyyəti, nüfuzlu mətbuat səhifələri, nəhəng media qurumları həmin gün Xocalıdan danışdı, Xocalıdan bəhs etdi. Bu, həm də Qarabağın işğaldan azadlığı, torpaqlarımızın suverenliyinin təhlükəsizliyinə yönəlmiş təcavüzkar erməni siyasətinə qarşı başlanılan qətiyyətli ümumxalq mübarizəsinin növbəti uğurlu fazası kimi dəyərləndirildi.

Bu yerdə Prezident İlham Əliyevin andiçmə mərasimindəki sözlərini xatırlamamaq olmur: “Mən bütün dünya azərbaycanlılarının Prezidenti olacağam”. Bəli, bu gün Prezident İlham Əliyev həm də bütün dünya azərbaycanlılarının Prezidentidir, Lideridir.

Və bu gün istər qardaş Türkiyədə, istər ABŞ-da, istər İngiltərədə, istər Pakistanda, istər Meksikada, istərsə də Azərbaycanda müxtəlif cəmiyyətlər, təşkilatlar Prezident İlham Əliyevin amalı ətrafında birləşərək, erməni faşizminə etirazlarını bəyan etdilər. Bütün dünyanı bəşər övladlarının “Xocalıya ədalət”, “Hamımız Xocalılıyıq” şüarları bürüdü. Prezident İlham Əliyev beynəlxalq aləmə Azərbaycan xalqının səsini duydurdu. Təbii ki, bütün bu önəmli hadisələrə təkan verən böyük güc, böyük qüdrət və tükənməz inam mövcuddur. Və bu gün bütün bu önəmli işləri həyata keçirməyə, reallaşdırmağa müvəffəq olan, Azərbaycan xalqının Prezidenti, Ali Baş Komandan İlham Əliyev, nəinki Azərbaycanın, o cümlədən, bütün Türk dünyasının haqq səsini dünyaya çatdıra biləcək Lider kimi qəbul olunmaqdadır.

BƏHRUZ QULİYEV

Səs.- 2012.- 29 fevral.- S.6.