Dünya musiqisevərləri Odlar Yurdunun dostluq məşəlinin ətrafında cəmlənəcək

“Eurovision-2012” Mahnı Müsabiqəsində iştirak edəcək 43 ölkənin təmsilçilərinin Bakıya səfərinə qısa bir zaman qalır. Bir neçə aydan sonra bu günə qədər yaşanılan həyəcan sona yetəcək. Şounun yeni səhifəsini yazacaq təmsilçi gələcək mərhələnin təməlini qoyacaqdır.

Bakı səhnəsində Albaniya, Kipr, Danimarka, Macarıstan, İslandiya, İsrail, Latviya, Monteneqro, İsveçrə, Bosniya və Herseqovina, Xorvatiya, Makedoniya, Gürcüstan, Malta, Norveç, Türkiyə, Ukrayna və Almaniya kimi onlarla ölkələrin təmsilçiləri öz şoularının göstərəcəklər. Ölkəmizdə aparılan hazırlıq işləri, planauyğun həyata keçirilən layihələr müsabiqənin sivil şəkildə təqdiminə gətirib çıxaracaq. Azərbaycana səfərini səbirsizliklə gözləyən təmsilçi və qonaqlar üçün lazımi şəraitin yaradılması istiqamətində işlər görülüb və davam etdirilməkdədir.

Artıq bu günlərdə maraqla gözlənilən biletlərin satış qaydası və qiymətləri də açıqlandı. May ayında Bakıda keçiriləcək “Eurovision-2012” Mahnı Müsabiqəsi şousunun biletləri fevralın 29-dan etibarən eurovision.tv saytında online sistemdə satışdadır. Fevralın 29-dan yalnız mayın 22-də keçiriləcək birinci yarımfinal və onun əsas məşqinin biletləri satışda olacaq. Qeyd edək ki, ikinci yarımfinal və onun əsas məşqinin biletləri martın 5-dən, jüri finalının biletləri martın 12-dən, finalın biletləri isə martın 15-dən satışda olacaq.

Eurovision.tv-nin məlumatına istinadən bildirək ki, 2012 şousunun təşkil olunacağı arena - “Bakı Kristal Zal”ında məhz bu konsert üçün 20 minədək tamaşaçı yeri nəzərdə tutulur. Avropa Yayımları Birliyinin qaydalarına əsasən, biletlərin bir hissəsi iştirakçı ölkələrin nümayəndə heyətləri, şounun sponsorları, Avropa Yayımları Birliyinin nümayəndələri üçün nəzərdə tutulur. Bundan sonra biletlərin digər hissəsi satışa çıxarılır. Satışdakı biletlər ölkələr arasında proporsional sayda bölünəcək. Alınan hər bilet həmin bilet sahibinin adına olacaq.

Belə bir möhtəşəm layihəni seyr etməyə gələn qonaqlar ölkəmizin tarixi, mədəniyyəti, onun sərvətləri, inkişafı ilə də yaxından tanış olmaq imkanını qazanacaq. Dünyanın ecazkar diyarı Azərbaycan təkrarsız təbiəti, çoxəsrlik mədəniyyəti ilə zəngin ölkə oduğunu təsdiqələyir. Bəşər tarixinə nəzər saldıqda, ölkənin tarixi, onun mədəniyyətlər və sivilizasiyaları özündə birləşdirən adət və ənənələri diqqəti çəkir. Bəli, belə bir məkan bu gün mübaliğəsiz desək, dünyaca məşhurdur.

“ODLAR YURDU” DÜNYAYA SƏS SALAN MƏKANA ÇEVRİLİB

Dünya xəritəsində kiçik bir ərazini əhatə edən diyar dünyaya səs salan dövlətə çevrilib. Müstəqil dövlətin nailiyyətləri əsasında ölkə iqtisadiyyatı, mədəniyyəti, inkişaf edib, sosial sahədə uğurlar əldə olunub. Fərqli əsrarəngiz flora və faunaya malik diyarımız artıq dünyada məşhurlaşıb. Tarixi mənbələrdən bizə bəllidir ki, Azərbaycan ərazisində eradan çox-çox əvvəl yaşayan əhalinin əksəriyyətinin atəşpərəst olması onun coğrafi adının yaranmasına əsas verir. “Azər”- od, atəş deməkdir. Əbədi yanar od qədim zamanlardan paytaxt Bakının yerləşdiyi Abşeron yarımadasının simvolu hesab olunub. Çünki bu ərazidə təbii olaraq yanan məşəllər var. Təbiətdəki bu möcüzələrdən biri də Abşeron yarımadasındakı “Yanar dağ”dır. Suraxanıda isə heç vaxt sönməyən odun üzərində “Atəşgah” adlı qədim abidə var. Bu fenomen Azərbaycanın dünyada “Odlar Yurdu” kimi tanınmağına səbəb olub. Digər mənbələrdə isə onun Azərbaycan ərazisində qədim zamanlardan yaşayan türksoylu “Azər” tayfalarının adından götürüldüyü ehtiva olunur. Deməli, “Azərbaycan” bu ərazidə yaşayan qədim türkdilli qəbilənin adından əmələ gəlib.

AZƏRBAYCAN AVROPADA ERKƏN İNSANIN YAŞAYIŞ XƏRİTƏSİNƏ DAXİL EDİLİB

Mahnı yarışmasının iştirakçıları və təmsilçilər Odlar diyarı ilə bağlı çox maraqlı dəlilləri öyrənə biləcəklər. Bu ölkənin tarixi onun cəlbedici füsunkarlığı qədər orijinal və zəngindir. Azərbaycan ərazisində aparılıan arxeoloji qazıntılar zamanı Qarabağda Azıx mağarasında 2 milyon il əvvəl insan sivilizasiyasının izlərinin aşkarlanması nəticəsində Azərbaycan Avropada erkən insanın yaşayış xəritəsinə daxil edilmişdir. Bu və ya digər amillər Azərbaycanın hər zaman dünya ölkələrini diqqətində olduğunu göstərən dəlildir. Azərbaycanda dövlətçilik tarixinin isə beş min illik yaşı var. Bu ərazidə ilk dövlətlər bizim eradan əvvəl 4-3-cü minilliklərdə yaranıb.

AZƏRBAYCAN DİNİ TOLERANTLIQ VƏ MÜXTƏLİF SİVİLİZASİYALARIN MƏSKƏNİDİR

Qədim daş kitabələr, əlyazmalar, əsrlərin dərinliklərindən yadigar qalan xalça naxışları bizə çox şeylərdən xəbər verir. Azərbaycanı tanımaq, onun haqqında həqiqəti bilmək üçün bu torpağa gəlmək, onu qarış-qarış gəzmək, onunla və xalqı ilə yaxından tanış olmaq gərəkdir. Bütün bəşəri dəyərlərə burada rast gəlmək mümkündür. Qədim mədəniyyət ölkəsi kimi tanınan Azərbaycan xalqının istedadı və yaradıcılıq qüdrəti olan “Kitabi-Dədə Qorqud”, “Oğuznamə”, “Koroğlu” və bir çox başqa epik abidələrdə özünü təsdiqləyir. Bu əsrarəngiz məmləkət filosofların, alimlərin, şairlərin, memarların, musiqiçilərin, rəssamların, tanınmış elm və ictimai xadimlərin vətənidir.

Azərbaycan qədim zamanlardan xalq sənətinin bir qolu olan memarlıq əsərləri ilə də zəngindir. Bakıdakı Qız Qalası və Şirvanşahlar Sarayı Kompleksi, Memar Əcəminin Naxçıvanda yaratdığı Möminə xatun və Yusif ibn Küseyir türbələri, Şuşadakı Pənahəli xanın sarayı, Natəvanın evi, Şəki xanları sarayının divarındakı rəsmlər və digərləri memarlıq sənətinin nadir inciləridir. Dünyaya qapı açan Azərbaycanın müasir dövrümüzdə rəssamlarının, heykəltəraşlarının əsərləri dünyada tanınır və sərgilənir. Parisin, Neapolun, Vyananın, Havananın, Berlinin, Dəməşqin, Beyrutun, Bağdadın və digər ölkələrin sərgi salonlarında nümayiş olunur. Londonun Viktoriya və Albert, Parisin Luvr, Vaşinqtonun Metropoliten, Vyananın, Romanın, Berlinin, İstanbulun, Tehranın, Qahirənin zəngin muzey kolleksiyalarında Təbriz, Naxçıvan, Gəncə, Qazax, Quba, Bakı, Şəki, Şamaxı və Qarabağ ustalarının sənət nümunələri yer alıb.

Azərbaycanın qədim milli-mənəvi dəyərləri, təbiətinin füsunkarlığı sanki musiqiyə, sənət əsərlərinə hopub. Azərbaycan incəsənəti təbiəti kimi rəngarəng, dolğun və zəngindir. Qədim milli-mənəvi dəyərləri, ənənələri özündə yaşadan Azərbaycan bu gün dünyada müxtəlif sivilizasiyaların qovşağı kimi tanınır. Müsəlman Şərqində operanın, baletin təməli Azərbaycanda qoyulub. İlk müsəlman qadın opera müğənnisinin vətəni Azərbaycandır.

Təbii ki, onun mədəniyyəti, dəyərləri ilə yanaşı, əsas sərvəti olan nefti də beynəlxalq məkanda çox həqiqətləri söyləyir. Neft təkcə sərvət yox, həm də şöhrətdir. Azərbaycanda hasil olan neft təkcə yandırmaq üçün yox, həm də bir çox xəstəliklərdə qiymətli dərman kimi istifadə edilib. Əsrlər bir-birini əvəz etdikcə neftə olan tələbat artıb və bu gün də Azərbaycan region və Avropa ölkələrinin əsas neft təchizatçılarındandır.

Dini tolerantlıq və müxtəlif sivilizasiyaların məskəni olan Azərbaycan öz tarixi missiyasını davam etdirir və Qərblə Şərqi mükəmməl şəkildə bir arada tutur və doğmalaşdırır.

Dünya miqyasında məşhur olan Azərbaycanla bağlı bu və ya digər reallıqlar dövlətin varlığını, dəyərləri özündə ehtiva edir. Bütün bunlar Azərbaycana səfər edəcək minlərlə xarici vətəndaşın vətənimizin hər daşı və qayası, zənginliyi, təbiətinin möcüzəsinə valeh edəcəyi şübhə yaratmır. Artıq Euravisin.az saytı vasitəsi ilə dünyaya yayımlanan məlumatlarda Azərbaycanın milli-mənəvi dəyərlərinə, maddi aləminə qarşı böyük maraq yaranmışdır. Elə bir sıra dünya mətbuatında dərc olunan məqalələrdə, müsahibə və televiziya verilişlərində bu münasibət təzahür edilir. Bu gün həqiqətlər, reallıqlar zaman və məkan hüdudlarını aşaraq, Azərbaycandan çox-çox uzaq ölkələrə gedib yol açıb.

Odlar Yurdu Azərbaycan bu il “Eurovision-2012” Mahnı Müsabiqəsinə özünə layiq formada ev sahibliyi edir və bütün dünyanın musiqisevərləri bu qonaqpərvər xalqın dostluq məşəlinin başına toplaşır.

ZÜMRÜD

Səs.- 2012.- 7 mart.- S.7.