Bu il “Zirvə”də Musiqili Komediya Teatrı oldu

Mədəniyyət və Turizm Nazirliyinin teatr sahəsində 2011-ci il üçün “Zirvə” mükafatı Musiqili Komediya Teatrına təqdim edilib. Respublikanın teatr ictimaiyyəti tərəfindən böyük maraqla qarşılanan N.Qoqolun “Evlənmə” komediyası ötən ilin ən yaxşı səhnə əsəri kimi bu yüksək mükafata layiq görülüb.

Mükafatı alarkən teatrın direktoru, əməkdar incəsənət xadimi, fəlsəfə doktoru Əliqismət Lalayev bildirib: “Ötən il 200 illiyi qeyd edilən rus yazıçısı Nikolay Qoqolun Azərbaycan peşəkar teatr səhnəsində ilk dəfə oynanılan “Evlənmə” komediyası dövlət tetarları tarixində ilk antrepriz tamaşa kimi yadda qaldı. Bu tamaşada Azərbaycanın müxtəlif teatrlarının aktyorları bir araya gəldilər. Tamaşaya əməkdar incəsənət xadimi Bəhram Osmanov quruluş verdi. “Evlənmə”, ümumiyyətlə, bütünlükdə milli teatrımızın uğurudur. Tamaşa çox uğurlu alınıb və onun bir sıra məziyyətləri var ki, teatrımız, doğurdan da, bununla öyünə bilər. Məsələn, ilk dəfə bizim teatrda Qoqol qoyuldu. Bu, Azərbaycan səhnə sənətində öz yeri olan əməkdar incəsənət xadimi Bəhram Osmanovun bizim teatrda ilk işi oldu. Dramatik aktrisa kimi tamaşaçı qəlbində öz yeri olan xalq artistləri Şükufə Yusupova və Məleykə Əsədova, ilk dəfə olaraq, heç nədən qorxmadan, çəkinmədən Musiqili Komediya Teatrının səhnəsinə gəldilər. Tanınmış gülüş ustaları Arif Quliyevlə, Elçin Həmidovla, Emma Məlikova ilə, Ramiz Məmmədovla, Çingiz Əhmədovlə, Ülviyyə Əliyeva ilə eyni tamaşada çıxış etdilər. Mən deyim ki, bu addım, doğrudan da, hər iki aktrisadan böyük cəsarət tələb edirdi və onlar bunu bacardılar. Onların ətrafında yaranan stereotipləri, sərhədləri tamamilə qırdılar. Səhnə tərtibatındakı səliqə-sahman diqqətləri çəkdi. Və ümumiyyətlə, Musiqili Komediya Teatrı da “yalnız musiqili komediya” qoymaq kimi “böyük boyunduruqdan” qurtuldu. Bu gün dünyanın Musiqili Komediya və ümumiyyətlə, operetta teatrlarında ən müxtəlif janrlarda tamaşalar qoyulur. Biz isə bu çərçivələrdən çıxa bilmirdik. Nəhayət ki, bunu bacardıq. “Evlənmə”nin uğuru hamını düşünməyə vadar etdi ki, sən demə belə də olarmış”.

Ə.Lalayev onu da vurğulayıb ki, yazıldığı 130 ildə “Evlənmə”nin dünyanın ən müxtəlif səhnələrində tamaşaya qoyulmasının əsas sirri, ilk növbədə, pyesdəki parlaq, bir-birlərindən fərqli obrazların olmasındadır. Özünün rejissor istedadını, aktyorlarla işləmək məharətini dəfələrlə sübut etmiş Bəhram Osmanov tamaşanın hazırlanmasında təkcə Azərbaycan Dövlət Musiqili Komediya Teatrının deyil, eyni zamanda, Akademik Milli Dram Teatrı və Gənc Tamaşaçılar Teatrının aktyor qüvvəsindən istifadə edərək, istedadına, statusuna, ad-sanına, aktyor imicinə, nəhayət, səhnə ampluasına görə tamam fərqli aktyorları bir araya gətirdi, bütöv bir ansambl yarada bildi.

Qeyd edək ki, tamaşanın musiqi tərtibatçısı əməkdar incəsənət xadimi Yalçın Adıgözəlov, dirijoru Fəxrəddin Atayev, baletmeysterləri isə Zakir Ağayev və Yelena Ağayevadır.

Sənət adamlarının Azərbaycanın “Oskar”ı kimi dəyərləndirdikləri “Zirvə” mükafatı bu dəfə Musiqili Komediya Teatrının oldu. Direktorun sözlərinə görə, bu mükafat teatrın kollektivi üçün, hələlik, başlanğıcdır. Uğurlar isə hələ qarşıdadır.

Zümrüd

Səs.- 2012.- 10 mart.- S.12.