Xalqın əbədiyaşar lideri

Qax

Dünən Qax rayon icra hakimiyyəti və YAP Qax rayon təşkilatının təşkilatçılığl ilə Ulu Öndər Heydər Əliyevin anadan olmasının 89-cu ildönümü münasibətilə elmi-praktik konfrans keçirilib. Tədbir iştirakçıları ilk öncə Ulu Öndər Heydər Əliyevin rayonun mərkəzində ucaldılmış abidəsi önünə tər gül-çiçək dəstələri düzdülər. Sonra konfrans rayon icra hakimiyyətinin iclas zalında davam etdirilib. Elmi-praktik konfransı giriş sözü ilə açan Qax rayon icra hakimiyyətinin başçısı Musa Şəkiliyev qeyd edib ki, Ümummilli Liderimizin doğum günü ərəfəsində bir araya gələrək, bu böyük şəxsiyyət barədə fikirlərimizi bölüşərkən, bir daha hiss edirik ki, Dahi Öndər Heydər Əliyev haqqında nə qədər ibrətamiz fikirlər deyilsə də, yenə də nəyi isə deməyiblər. Bax, bu hiss, bu fikir neçə illərdir ki, yaranır və bunun özü Heydər Əliyev şəxsiyyətinin əlçatmaz bir zirvə olduğunu göstərir: “Bu gün Ümummilli Liderimiz Heydər Əliyevin doğum günü təkcə ölkə vətəndaşlarının deyil, bütün dünya azərbaycanlılarının əziz bayramı kimi təntənə ilə qeyd edilir. Ümummilli Lider Heydər Əliyevin siyasi obrazı Azərbaycan xalqının dövlətçilik şüurunun, tarixin sınağından şərəflə çıxmış bütöv bir idarəçilik məktəbinin, müasir ictimai-siyasi fikrin ən davamlı keyfiyyətlərinin canlı mənzərəsidir.

Elmi-praktik konfransda YAP Qax rayon təşkilatının sədri Nizami Əhmədov “Heydər Əliyev-Yeni Azərbaycan Partiyasının yaradıcısıdır” mövzusunda çıxış edərək YAP-ın dövrün, zamanın, xalqın tələbindən doğmuş partiya olduğunu söylədi. Bildirdi ki, YAP-ın da yaranması məhz Heydər Əliyevin xilaskarlıq missiyasının tərkib hissəsindən biridir.

N.Əhmədov onu da qeyd etdi ki, Ulu Öndərə sonsuz hörmət və dərin məhəbbət rəmzi kimi çox yerlərdə Ona heykəllər qoyulub. Amma o abidələrin ən əzəmətlisi hər bir azərbaycanlının qəlbində ucaldılıb. Azərbaycanlı olması ilə fəxr edən, bu fəxarət duyğusunun ən böyük nemət olduğunu hər birimizə öyrədən də Ümummilli Lider Heydər Əliyev oldu: “Hər bir insan üçün onun milli mənsubiyyəti onun qürur mənbəyidir. Mən həmişə fəxr etmişəm, bu gün də fəxr edirəm ki, mən Azərbaycanlıyam.”

Tədbirdə rayon gənclər və idman idarəsinin rəisi, YAP Qax rayon təşkilatının idarə heyətinin üzvü Əlövsət Bayramov “Heydər Əliyev və Azərbaycan gəncliyi” mövzusunda, rayon təhsil şöbəsinin metodisti Vəli Əmirov “Heydər Əliyev və Azərbaycan təhsili” mövzusunda, rayon mərkəzi kitabxanasının müdiri, YAP Qax rayon təşkilatının şura üzvü Güllü Əhmədova “Heydər Əliyev və milli-mənəvi dəyərlərimiz” mövzusunda məruzə etdilər. Məruzələrdə Ümummilli Lider Heydər Əliyevin keçdiyi şərəfli ömür yolundan geniş danışdılar və qeyd etdilər ki, bu gün əsası Ulu Öndər Heydər Əliyev tərəfindən qoyulan mütərəqqi siyasət ölkə Prezidenti cənab İlham Əliyev tərəfindən uğurla davam etdirilir. Sonda Ulu Öndər Heydər Əliyevin həyat və fəaliyyətindən bəhs edən videoçarx nümayiş olundu.

Səbail

Respublikamızın hər yerində olduğu kimi, Səbail rayonunda da Ümummmilli Lider Heydər Əliyevin anadan olmasının 89-cu ildönümü ilə bağlı silsilə tədbirlər davam etməkdədir. Əlamətdar günlə əlaqədar təsdiq olunmuş tədbirlər planına uyğun olaraq, Səbail rayonunda RİH tərəfindən rayonun qəsəbələrində həyata keçirilən “Abad həyət” layihəsi əsasında Badamdar qəsəbəsi, Sahib İbrahimxəlilov küçəsi 1 ünvanda növbəti “Abad həyət” sakinlərin istifadəsinə verildi. Rayonda aparılan abadlıq və yenidənqurma işləri ilə bağlı məlumat verən Səbail rayon icra hakimiyyəti başçısı aparatının ictimai təşkilatlar və siyasi partiyalarla iş şöbəsinin müdiri İsrafil Kərimov bildirdi ki, rayonun idarə, və təşkilatlarında, təhsil, səhiyyə, elm və mədəniyyət müəssisələrində keçirilən çoxsaylı tədbirlərlə yanaşı, əlamətdar gün ərəfəsində sosial yönümlü obyektlərin əsaslı təmiri və yenilərinin istifadəyə verilməsi işləri də aparılır: “Bu RİH tərəfindən həyata keçirilən “Abad həyət” layihəsi təkcə Badamdar qəsəbəsində 13-cü təmirli həyət olmuşdur. Rayonun Badamdar qəsəbəsində Ulu Öndər Heydər Əliyevin adını daşıyan parkda əsaslı təmir və yenidənqurma işləri çox böyük sürətlə davam etdirilir. Artıq burada Ulu Öndərin əzəmətli büstü quraşdırılmışdır. Qəsəbədə həm də yeni orta məktəb və uşaq bağçasının tikintisi işləri aparılır. Qəsəbənin mərkəz hissəsindəki həyətdə, ilk növbədə, binanın fasadında təmir işləri aparılmış, fasad rənglənmiş, binanın giriş qapıları yeniləri ilə əvəz olunmuş, binanın birinci mərtəbəsində yerləşən 34 saylı poliklinikanın qarşısında da təmir işləri görülmüşdür. Binaların giriş hissəsi və pilləkənlər də təmir olunmuş, eyvanlar dekorativ ağaclarla bəzədilmişdir. Həyətin səkiləri aqlay üzlüklə üzlənmiş, həyət boyu səkilərə yeni bordyur daşları düzülmüşdür. 1500 kv. metr sahəsi olan həyət tam abadlaşdırılmış, təmizlik işləri aparılmış, həyətdə işıqlandırma məsələləri də həll olunmuş, yeni asfalt örtüyü çəkilmişdir. Sakinlərin istirahəti üçün 2 ədəd söhbətgah quraşdırılmış, burada yeni oturacaqlar, həyətə skamyalar qoyulmuşdur. Həyətin uşaqları da yaddan çıxarılmamış, onların oynaması üçün bir neçə əyləncə qurğuları quraşdırılmışır. Eyni zamanda, həyətlərdə yeni ağaclar əkilmiş, yaşıllıqlar salınmış, məişət tullantılarından təmizlənmiş əraziyə torpaq qatı salınmışdır”.

Tədbirdə çıxış edən həyət sakinləri Ümummilli Lider Heydər Əliyevin doğum günü ərəfəsində görülən işlərin keyfiyyətindən çox razı qaldıqlarını, onların istirahəti üçün yaradılan şəraitə görə ölkə rəhbərliyinə minnətdarlıqlarını bildirdilər.

Gəncə

Dünən Gəncə şəhərində Ümummilli Lider Heydər Əliyevin anadan olmasının 89-cu ildönümünə həsr edilən silsilə tədbirlər çərçivəsində “Heydər Əliyev və Azərbaycanın müasirləşdirilməsi strategiyası” adlı elmi-praktik konfrans keçirilib.

Yeni Azərbaycan Partiyasının Gəncə şəhər təşkilatının Gəncə şəhər icra hakimiyyəti ilə birgə təşkil etdiyi elmi-praktik konfransda Ulu Öndərin Azərbaycanın müstəqilliyi və güclü dövlət quruculuğunda müstəsna xidmətlərindən danışılıb, Ümummilli Liderin keçdiyi ömür yolu və siyasi fəaliyyətinə geniş nəzər salınıb. Xatırladılıb ki, həmişə azərbaycanlı olmağı ilə fəxr edən Heydər Əliyev ömrünü bu xalqa xidmət etməyə həsr edib. Çıxış edənlər bildiriblər ki, zaman tələb edəndə xalqın qəhrəman oğulları milləti bəladan qurtarmaq üçün meydana atılır, xalqın xoşbəxtliyi gözəl gələcəyi müstəqilliyi naminə canından keçməyə hazır olurlar və tarixi şəxsiyyət olaraq ictimai-siyasi prosesləri dəyişə bilir.

Gəncə şəhər icra hakimiyyətinin başçısı Elmar Vəliyev məruzəsində qeyd etmişdir ki, xalqımızın qarşısında göstərdiyi xidmətlərə görə Ümummilli Liderimizə daim borcluyuq və ona görə də hamımız böyük ehtiramla hörmətlə Dahi Liderin xatirəsini yad edirik: “Çünki O, dahi bir şəxsiyyətdir. Onun müdrikliyi artıq göz qabağındadır ki, Azərbaycan nə qədər böyük bir inkişaf yolu keçib. Dönüb arxaya baxsaq, görərik ki, haradan gəlib, haraya gedirik. Uzağa yox, Gəncəyə baxsaq, kifayət edir”.

Elmar Vəliyev onu da bildirib ki, Ulu Öndər Heydər Əliyevin Gəncəyə xüsusi sevgisi olub və gəncəlilər bu sevginin daim şahidi olublar. Bu səbəbdən də Gəncə sakinlərinin Dahi Liderlə bağlı xatirələrindən ibarət kitab hazırlanır: “Təklifə əsasən Heydər Əliyevin Gəncəyə səfəri ilə bağlı 5 cilddən ibarət kitablar toplusu çıxarılacaq. Artıq 2 cild çap edilib. Digər 3 cildin üzərində işlər gedir. Ulu Öndərimizin həyat və fəaliyyəti dövründə Gəncə ilə bağlı bütün məqamlar bu cildlərdə öz əksini tapacaq. Heydər Əliyevlə təmasda olanların xatirələri şəhər ziyalılarının bu səfərlər haqda fikirləri bu kitabda öz əksini tapacaq”.

Çıxış edən digər tədbir iştirakçıları Ümummilli Lider haqda öz fikirlərini səsləndiriblər və bildirilib ki, görkəmli siyasi xadim və fenomenal yaddaşa malik olan Heydər Əliyev gələcəyi görərək, hələ sovet dönəmində milli dövlət quruculuğu üçün vacib addımlar atıb. Azərbaycan gənclərini xaricə təhsilə göndərib. Ölkədə geniş sənayeləşmənin əsasını qoyub, ən əsası isə Azərbaycan dilinin dövlət dili kimi qəbul olunmasına nail olub.

Tədbirdə, həmçinin, Azərbaycanın beynəlxalq aləmdə əldə etdiyi uğurlardan danışılıb. Müstəqilliyimizin ötən 20 ili ərzində Azərbaycan BMT təhlükəsizlik şurasının üzvünə çevrilib. Ciddi iqtisadi sıçrayışa nail olunub.

RÖVŞƏN RƏSULOV,

RƏFİQƏ

Səs.- 2012.- 11 may.- S. 13.