BAKIMIZ GÜLƏ-ÇİÇƏYƏ BÜRÜNDÜ

“Eurovision-2012” müsabiqəsinə saylı günlər qaldığı bir ərəfədə, dünən Azərbaycan paytaxtı Bakı şəhər sakinlərinin və qonaqların zövqünü Gül bayramı ilə oxşadı. Bayramın rəngarəng keçməsini təmin etmək, uşaqlarla yanaşı böyüklərin də marağına səbəb olmaq üçün parklarda, xiyabanlarda güllərdən hazırlanan müxtəlif ekpozisiyalar qurulmuşdu. Bu məqsədlə Bakıya dünyanın müxtəlif ölkələrindən ekzotik, könülləri oxşayan gül və çiçək növləri gətirilmişdir.

Qeyd edək ki, bütün ekspoziyalar peşəkar rəssamlar tərəfindən işlənən möhtəşəm layihələrə uyğun bəzədilmişdi. Layihəyə uyğun olaraq park boyu güllərdən hazırlanan lövhələrdə Azərbaycanın tarixi keçmişini, mədəniyyətini və müasir inkişafını özündə əks etdirən müxtəlif fotolar, sərgilər nümayiş etdirilmişdir. Bayramın ən çox maraq doğuran ekpozisiyası isə xüsusi olaraq quraşdırılmış nəhəng səhnə üzərində yerləşdirilmişdir. Həmin ekspozisiya Ulu Öndər Heydər Əliyevin güllərdən hazırlanan portreti idi ki, həmin portretin tərtibatı həm şəhər sakinlərinin, həm də buraya gələn xarici qonaqların maraqlarına səbəb olub, onların zövqlərini oxşayıb. Bu il keçirilmiş bayramın digərlərindən fərqi odur ki, gül libasına bürünmüş uşaqlardan ibarət yürüş keçirilib. Bu yürüş “Sahil” bağından başlayaraq H.Əliyev adına Sarayın qarşısındakı parkda başa çatıb. Dünən Azərbaycan xalqının Ümummilli Lideri, dünya şöhrətli siyasi xadim Heydər Əliyevin anadan olmasının 89-cu ildönümü münasibətilə Bakıda, Ulu Öndərin adını daşıyan sarayın qarşısındakı parkda möhtəşəm Gül bayramı təşkil edilmişdir. Onu da qeyd edək ki, Azərbaycan Respublikasının Prezidenti İlham Əliyev, xanımı Mehriban Əliyeva və ailə üzvləri də Gül bayramında olmuşlar. Bakı Şəhər İcra Hakimiyyətinin başçısı Hacıbala Abutalıbov dövlətimizin başçısına məlumat verdi ki, səhər tezdən başlayaraq paytaxt sakinləri, şəhərimizin qonaqları dünyanın bir sıra ölkəsindən gətirilmiş gül-çiçəklə bəzədilmiş parka gəliblər. Müstəqil dövlətimizin xilaskarı və qurucusu, xalqımızın dahi oğlu Heydər Əliyevin əzəmətli abidəsinin ətrafı gül-çiçəyə qərq olmuş, postament bir növ ağ güllərlə hörülmüşdür. Prezident İlham Əliyev və ailə üzvləri Ulu Öndərin abidəsini ziyarət etmiş, başdan-başa bahar ətirli güllərə qərq olmuş parkın gözəlliyini seyr ediblər. Belə ki, müxtəlif güllərdən yığılmış “xalça”lar və türk dünyasının böyük oğlu Heydər Əliyevin tər çiçəklərdən “toxunmuş” portret xalçası orijinallığı ilə göz oxşayırdı. Cürbəcür çiçəklərdən yığılmış “89” rəqəminin təsvir olunduğu kompozisiya da diqqəti cəlb edirdi. Xüsusi görkəm almış parkda diqqəti çəkən kompozisiyalardan biri də tarixi abidələrimizin təsviri idi. Bu baxımdan “Qız qalası”, “Qoşa Qala” qapısının güllərdən hazırlanmış maketi də diqqətçəkici idi. Bu baxımdan park həm də nağıllar aləmini xatırladırdı. Burada Azərbaycanın və dünya xalqlarının nağıllarının əlvan güllərdən hazırlanmış qəhrəmanlarının güllərdən hazırlanmış eskizləri vardı. Gül və müxtəlif nağıl qəhrəmanları kimi bəzənmiş, bayramı daha da gözəlləşdirən balacalar Prezident İlham Əliyevi və ailə üzvlərini özlərinə xas səmimiyyətlə salamladılar. Dövlətimizin başçısı və ailə üzvləri uşaqlarla söhbət etdilər, Ulu Öndər Heydər Əliyevin gül-çiçəyə qərq olmuş abidəsi önündə fidan balalarla xatirə şəkli çəkdirdilər. Qeyd edək ki, BŞİH tərəfindən təşkil olunmuş bayram tədbirləri 11:00-dan 19:00-a qədər Heydər Əliyev Sarayının qarşısındakı parkda davam etmiş gecə saat 21:00-dan isə Milli Parkda incəsənət ustalarının iştirakı ilə konsert və möhtəşəm atəşfəşanlıqla başa çatmışdır.

RÖVŞƏN RƏSULOV

Səs.- 2012.- 11 may.- S. 10.